KA BUKE NO NĀ LUNA KĀNĀWAI 16 - Ka Baibala Hemolele

1 No Samesona, a me Delila. 4 Lilo ʻo Samesona i ka hoʻowalewale ʻia. 19 Paʻa i ko Pilisetia, a pōʻalo ʻia nā maka ona. 29 Kona make ʻana.

MOKUNA XVI.

¹ ¶ Iho akula ʻo Samesona i Gaza, a ʻike ihola i laila i kekahi wahine hoʻokamakama, a komo akula i ona lā.

² Haʻi ʻia akula i ko Gaza, “Ua hiki mai nei ʻo Samesona!” Hoʻopuni ihola lākou ia wahi, a hoʻohālua iā ia, ia pō a ao, ma ka puka o ke kūlanakauhale, a moe mālie nō ia pō a pau, ʻī ihola, “A kakahiaka, i ke ao ʻana aʻe, make nō ʻo ia iā kākou.”

³ Moe ihola ʻo Samesona, a i waenakonu o ka pō; a laila, ala maila ia i waenakonu o ka pō, a lawe ihola i nā pani o ke kūlanakauhale, a me nā lapauila ʻelua, unuhi aʻela iā lāua me ka hoaka o ka puka, kau ihola ma luna o kona mau poʻohiwi, a lawe akula i luna pono o kahi puʻu, ma ke alo o Heberona.

⁴ ¶ A ma hope iho, aloha aʻela ia i kekahi wahine ma ke kahawai ʻo Soreka, ʻo Delila kona inoa.

⁵ Piʻi aʻela nā aliʻi o Pilisetia i ona lā, ʻī aʻela iā ia, “E hoʻowalewale ʻoe iā ia, a e nānā hoʻi i kahi o kona ikaika nui, a me ka mea e lanakila ai mākou ma luna ona, i nakinaki mākou iā ia, a pilikia ia; a laila, e uku aku mākou iā ʻoe, i hoʻokahi tausani ʻāpana kālā, a me ka haneri keu.”

⁶ ʻĪ akula ʻo Delila iā Samesona, “Ke nonoi aku nei au iā ʻoe, e haʻi mai ʻoe iaʻu i kou mea e ikaika nui ai, a me ka mea a paʻa ai ʻoe, i pilikia ai ʻoe.”

⁷ ʻĪ maila ʻo Samesona iā ia, “Inā nakinaki mai lākou iaʻu i nā kaula maka ʻehiku, i hoʻomaloʻo ʻole ʻia, a laila, e nāwaliwali au, a like auaneʻi me kekahi kanaka.”

⁸ A laila, lawe mai nā aliʻi o ko Pilisetia iā ia i ʻehiku kaula maka, i hoʻomaloʻo ʻole ʻia, a me ia nō ia i nakinaki ai iā ia.

⁹ E moe malū ana nō nā kānaka ma loko o ia keʻena me ia. ʻĪ maila kēlā, “Ma luna ou auaneʻi ko Pilisetia, e Samesona!” Moku aʻela iā ia nā kaula, e like me ka moku ʻana o ke kaula ʻoka, i kona wā e honi ai i ke ahi, ʻaʻole hoʻi i loaʻa kahi o kona ikaika.

¹⁰ ¶ ʻĪ maila ʻo Delila iā Samesona, “Aia hoʻi, ua hoʻowahāwahā mai ʻoe iaʻu, a ua hoʻopunipuni mai iaʻu. No laila, ke nonoi aku nei au iā ʻoe, e haʻi mai ʻoe iaʻu i kou mea e paʻa ai.”

¹¹ ʻĪ akula kēia iā ia, “Inā nakinaki paʻa loa mai lākou iaʻu i nā kaula hou, ʻaʻole i hoʻohana ʻia, a laila e nāwaliwali au, a e like auaneʻi me kekahi kanaka.”

¹² Kiʻi aʻela ʻo Delila i nā kaula hou, a nakinaki ihola iā ia me ia, ʻī aʻela, “Ma luna ou auaneʻi o ko Pilisetia, e Samesona!” E moe malū ana no nā kānaka ma loko o ia keʻena. Moku aʻela iā ia nā kaula, mai kona lima aku, me he lopi lā.

¹³ ¶ ʻĪ mai ʻo Delila iā Samesona, “Ua hoʻowahāwahā mai ʻoe iaʻu, a hiki mai i kēia manawa, a ua hoʻopunipuni iaʻu. E haʻi mai ʻoe iaʻu i kou mea e paʻa ai.” ʻĪ akula kēia iā ia, “Inā e ulana pū ʻoe i nā wili ʻehiku o koʻu poʻo, me ka lole.”

¹⁴ A laila, mākia ihola ia i ke kui, ʻī aʻela, “Ma luna ou auaneʻi ko Pilisetia, e Samesona!” Ala aʻela ia mai kona hiamoe ʻana, a hele akula me ke kui o ka mea nāna i ulana, a me ka lole pū.

¹⁵ ¶ ʻĪ maila ʻo ia iā ia, “Pehea lā ʻoe e ʻōlelo ai, ‘Ua aloha au iā ʻoe?’ ʻAʻole hoʻi kou naʻau me aʻu. ʻEkolu ou hoʻowahāwahā ʻana mai iaʻu, ʻaʻole hoʻi i haʻi mai iaʻu i kahi o kou ikaika nui.”

¹⁶ I kona koi ʻana iā ia i nā lā a pau, i kāna ʻōlelo ʻana, a hoʻokaumaha loa iā ia, a pilikia kona manaʻo, ʻaneʻane make;

¹⁷ a laila, haʻi akula ʻo ia iā ia i kona naʻau a pau, ʻī akula iā ia, “ʻAʻole i kau mai ka pahi kahi ma luna o koʻu poʻo; no ka mea, ua laʻa au i ke Akua, mai ka ʻōpū mai o koʻu makuwahine. Inā e kahi ʻia au, a laila, lilo aku hoʻi koʻu ikaika mai oʻu aku nei, a nāwaliwali auaneʻi au e like me kekahi kanaka.”

¹⁸ ¶ A ʻike ihola ʻo Delila, ua haʻi mai kēlā iā ia i kona naʻau a pau, a laila kiʻi akula ia, a hoʻākoakoa maila i nā aliʻi o ko Pilisetia, ʻī aʻela, “E piʻi hou mai ʻoukou; no ka mea, ua haʻi mai ʻo ia iaʻu i kona naʻau a pau.” A laila, piʻi aʻela nā aliʻi o ko Pilisetia i ona lā, a lawe aʻela i ke kālā, ma ko lākou lima.

¹⁹ Hoʻomoe ihola ʻo ia iā ia ma kona ʻūhā; a hea akula i ke kanaka a hāʻawi iā ia e kahi i nā wili ʻehiku o kona poʻo a hemo; a hoʻomaka ia i ka hoʻopilikia ʻana iā ia, a lilo akula kona ikaika, mai ona aku lā.

²⁰ ʻĪ maila ia, “Ma luna ou auaneʻi ko Pilisetia, e Samesona!” Ala aʻela ia, mai kona hiamoe ʻana, ʻī maila, “E hele au i waho e like me nā wā ma mua, e hoʻoluliluli!” ʻAʻole ia i ʻike, ua haʻalele ʻo Iēhova iā ia.

²¹ Hoʻopaʻa ihola ko Pilisetia iā ia, pōʻalo akula i kona mau maka, a lawe aʻela iā ia i Gaza, a hoʻopaʻa ihola iā ia i nā kūpeʻe keleawe; a wili aʻela ia i loko o ka hale paʻahao.

²² Hoʻomaka ihola ka lauoho o kona poʻo i ka ulu hou, e like me ia i ka wā i kahi ʻia ai.

²³ ¶ A laila hoʻākoakoa maila nā aliʻi o ko Pilisetia e kaumaha aku i mōhai nui no Dagona, ko lākou akua, a e ʻoliʻoli; no ka mea, ʻōlelo maila lākou: “Ua hāʻawi mai ko kākou akua iā Samesona I ko kākou ʻenemi, i loko o ko kākou lima!”

²⁴ A ʻike akula nā kānaka iā ia, hoʻomana akula lākou i ko lākou akua; no ka mea, ʻōlelo maila lākou, “Ua hāʻawi mai ko kākou akua i loko o ko kākou lima, i ko kākou ʻenemi, I ka mea i ʻānai ai i ko kākou ʻāina, A luku nui mai iā kākou.”

²⁵ A i ka wā i leʻaleʻa ai ko lākou naʻau, ʻī aʻela lākou, “E kiʻi aku iā Samesona, i hula mai ia no kākou.” Kiʻi akula lākou iā Samesona ma ka hale paʻahao, a hula maila ia i mua o lākou. A hoʻokū ihola lākou iā ia i waena o nā kia.

²⁶ ʻĪ aʻela ʻo Samesona i ke keiki e paʻa ana i kona lima, “E hoʻomaha mai ʻoe iaʻu i hāhā aku au i nā kia e paʻa ai ka hale, i hilinaʻi hoʻi au ma ia mau mea.”

²⁷ Ua piha ka hale i nā kānaka, a me nā wāhine. Ma laila nō nā aliʻi a pau o ko Pilisetia. ʻEkolu tausani kānaka a me nā wāhine ma luna o ka hale i nānā mai i ko Samesona hula ʻana.

²⁸ ¶ Hea akula ʻo Samesona iā Iēhova, ʻī akula, “E ka Haku, e Iēhova ē, e hoʻomanaʻo mai ʻoe iaʻu; ke nonoi aku nei au iā ʻoe, e hoʻoikaika mai ʻoe iaʻu, e ke Akua ē, i kēia manawa hoʻokahi nō, i uku koke ʻia mai au e ko Pilisetia, no koʻu mau maka ʻelua!”

²⁹ Lālau ihola ʻo Samesona ma nā kia waenakonu ʻelua, a ʻo ia hoʻi nā mea e paʻa ai ka hale. Hilinaʻi ihola ʻo ia ma ia mau mea, ʻo ka lima ʻākau ma kekahi, a ʻo ka lima hema ma kekahi.

³⁰ ʻĪ ihola ʻo Samesona, “E make pū au me ko Pilisetia!” Kūlou ihola me ka ikaika nui, a hina ihola ka hale ma luna o nā aliʻi, a ma luna o nā kānaka a pau ma loko. Ua nui ka poʻe make, āna i luku ai i kona make ʻana, he hapa ka poʻe āna i luku ai i kona wā i ola ai.

³¹ Iho akula kona poʻe hoahānau, a me ko ka hale o kona makua kāne, lālau ihola iā ia, a lawe aʻela, a kanu ihola ma waena o Zora, a me ʻAsetaola, ma ka ilina o Manoa, ʻo kona makua kāne. He iwakālua makahiki āna i hoʻoponopono ai i kā ʻIseraʻela.