KA BUKE NO NĀ LUNA KĀNĀWAI 15 - Ka Baibala Hemolele

1 Ka huhū o Samesona, a me kona puhi ʻana i ka palaoa o ko Pilisetia. 9 No kona paʻa, a me kona luku ʻana iā lākou.

MOKUNA XV.

¹ ¶ A ma hope iho, i nā lā o ka hōʻiliʻili ʻana i ka huapalaoa, hele akula ʻo Samesona, me ke kao keiki, e ʻike i kāna wahine; ʻī ihola, “E komo aku nō wau i loko o ke keʻena i kaʻu wahine.” ʻAʻole naʻe i hāʻawi mai kona makua kāne iā ia ke komo i loko.

² ʻĪ maila kona makua kāne, “Manaʻo maopopo aʻela au, ua hoʻowahāwahā loa ʻoe iā ia nei; no laila hāʻawi aku au iā ia i kou hoa. ʻAʻole anei i ʻoi aku ka maikaʻi o kona kaikaina ma mua o kona? Nāu ia, ʻeā, a kaʻawale kēia.”

³ ʻĪ ihola ʻo Samesona no lākou, “ʻAʻole au e hewa e like me ko Pilisetia, ke hana au i mea e pōʻino ai lākou!”

⁴ Hele akula ʻo Samesona, hopu ihola i nā ʻalopeke, ʻekolu haneri, a lawe i nā lamakū, a hui aʻela i kahi huelo i kahi huelo, a waiho ihola i ka lamakū i waena o nā huelo ʻelua.

⁵ A puhi iho ia i nā lama i ke ahi, a laila kuʻu akula, e hele lākou i loko o ka huapalaoa o ko Pilisetia e kū ana, a puhi i ke ahi i nā puʻu huapalaoa a me ka huapalaoa e kū ana, a me nā pā waina, a me nā ʻoliva.

⁶ A laila, nīnau aʻela ko Pilisetia, “Na wai i hana i kēia?” ʻĪ maila lākou, “Na Samesona, na ka hūnōna a kekahi o ko Timenata; no ka mea, ua lawe ʻo ia i kā ia lā wahine, a ua hāʻawi iā ia na kona hoa.” Piʻi maila ko Pilisetia, a puhi ihola i ua wahine lā, a me kona makua kāne i ke ahi.

⁷ ʻĪ aʻela ʻo Samesona iā lākou, “Ua hana nō ʻoukou i kēia; akā, e hoʻopaʻi aku au iā ʻoukou, a ma hope iho, oki au.”

⁸ Luku aʻela ia iā lākou, ke kīkala a me ka ʻūhā, he luku nui loa. A laila iho akula ia a noho ma kekahi ana o ka pōhaku, ma ʻEtama.

⁹ ¶ A laila hele aʻela ko Pilisetia, a hoʻomoana ihola ma ko Iuda, a hoʻopālahalaha akula ma Lehi.

¹⁰ Nīnau akula nā kānaka o kā Iuda, “No ke aha lā ʻoukou i piʻi mai nei e kūʻē iā mākou?” ʻĪ maila lākou, “Ua piʻi mai nei mākou e nakinaki iā Samesona e hana aku iā ia, e like me kāna i hana mai ai iā mākou.”

¹¹ A laila, iho akula ʻekolu tausani kānaka o kā Iuda i ke ana i loko o ka pōhaku ma ʻEtama, ʻī akula iā Samesona, “ʻAʻole anei ʻoe i ʻike, ʻo ko Pilisetia nō ko kākou poʻe haku? He aha kēia mea āu i hana mai nei iā kākou?” ʻĪ maila kēlā iā lākou, “E like me kā lākou i hana mai ai iaʻu, pēlā nō wau i hana aku ai iā lākou.”

¹² ʻĪ akula lākou iā ia, “Ua iho mai nei mākou e nakinaki iā ʻoe, a e hāʻawi aku iā ʻoe i ka lima o ko Pilisetia.” ʻĪ maila ʻo Samesona iā lākou, “E hoʻohiki mai ʻoukou iaʻu, ʻaʻole ʻoukou e pepehi mai iaʻu.”

¹³ ʻŌlelo akula lākou iā ia, ʻī akula, “ʻAʻole; akā, e nakinaki mākou iā ʻoe a paʻa, a hāʻawi aku iā ʻoe i ko lākou lima, ʻaʻole loa mākou e pepehi aku iā ʻoe.” Nakinaki ihola lākou iā ia i nā kaula hou ʻelua, a lawe mai iā ia, mai ka pōhaku mai.

¹⁴ ¶ Hele aʻela ia a Lehi, hoʻōho kūʻē maila ko Pilisetia iā ia; a kau maila ka ʻUhane o Iēhova ma luna ona, lilo ihola nā kaula ma luna o kona mau lima e like me ke olonā i pau i ke ahi, a popo ihola kona mea paʻa ma kona lima.

¹⁵ A loaʻa iā ia ka iwi ā o ka hoki, he iwi ā maka, hohola akula i kona lima, lālau ihola ia mea, a me ia nō ia i luku aku ai i hoʻokahi tausani kānaka.

¹⁶ ʻĪ ihola ʻo Samesona: “Me ka iwi ā o ka hoki, ʻO ka puʻu o nā puʻu, Me ka iwi ā o ka hoki Kaʻu i luku aku ai i hoʻokahi tausani kānaka!”

¹⁷ A pau kāna ʻōlelo ʻana, hoʻolei akula ia i ka iwi ā mai loko aku o kona lima, a kapa aku ia wahi ʻo Ramata Lehi.

¹⁸ Make wai loa ihola ia, a hea akula iā Iēhova, ʻī akula, “Ua hāʻawi mai ʻoe i kēia ola nui ma ka lima o kāu kauā nei; a e make anei au i ka make wai, a hāʻule i loko o ka lima o ka poʻe i ʻoki poepoe ʻole ʻia?”

¹⁹ Wāhi aʻela ke Akua i puka ma loko o ka iwi ā, a puka maila ka wai, mai loko mai o ia mea; a inu ia, a laila, hoʻi mai ka hanu, a ola aʻela ia; no laila, kapa akula ʻo ia i ka inoa o ia wahi ʻo ʻEne Hakore, aia ma Lehi, a hiki mai i kēia lā.

²⁰ Nāna nō i hoʻoponopono i kā ʻIseraʻela i nā lā o ko Pilisetia, i nā makahiki he iwakālua.