KA BUKE NO NĀ LUNA KĀNĀWAI 14 - Ka Baibala Hemolele

1 No Samesona a me ka wahine o Timenata. 8 Ka palapala a Samesona, a me kāna nane, a me kona pepehi ʻana i nā kānaka he kanakolu.

MOKUNA XIV.

¹ ¶ Iho akula ʻo Samesona i Timenata, a ʻike akula i kekahi wahine ma Timenata, no nā kaikamāhine a ko Pilisetia.

² Piʻi maila ia, a haʻi maila i kona makua kāne, a me kona makuahine, ʻī maila, “Ua ʻike au i kekahi wahine ma Timenata, no nā kaikamāhine a ko Pilisetia; no laila ʻeā, e kiʻi aku iā ia, i wahine naʻu.”

³ ʻĪ akula kona makua kāne, a me kona makuahine iā ia, “ʻAʻole anei he wahine i waena o nā kaikamāhine o kou poʻe hoahānau, a me kou poʻe kānaka a pau, i hele aku ai ʻoe, e lawe i wahine no ka poʻe ʻoki poepoe ʻole ʻia o ko Pilisetia?” ʻĪ maila ʻo Samesona i kona makua kāne, “E kiʻi aku iā ia naʻu; no ka mea, ua pono ia i koʻu mau maka.”

⁴ ʻAʻole i ʻike kona makua kāne a me kona makuahine, na Iēhova mai ia mea, no kona ʻimi hala ʻana nō i ko Pilisetia. Ia manawa e noho lanakila ana ko Pilisetia ma luna o kā ʻIseraʻela.

⁵ ¶ A laila, iho akula ʻo Samesona, a me kona makua kāne a me kona makuahine i Timenata, a hiki i nā pā waina o Timenata; uō maila kekahi liona ʻōpiopio, i kona hālāwai ʻana me ia.

⁶ Kau maila ka ʻUhane o Iēhova ma luna ona, a haehae ihola ʻo ia iā ia, e like me ka haehae ʻana o ke kao keiki, ʻaʻohe mea ma kona lima; ʻaʻole hoʻi ia i haʻi aku i kona makua kāne, a me kona makuahine, i ka mea āna i hana ai.

⁷ Iho akula ia, a kamaʻilio pū ihola me ua wahine lā; a ua pono ia i nā maka o Samesona.

⁸ A ma hope iho hoʻi maila ia e lawe iā ia, kipa aʻela ia e nānā i ke kino o ka liona; aia hoʻi, he poʻe nalo meli, a me ka meli pū ma loko o ke kino o ua liona lā.

⁹ Lālau akula kona mau lima ia mea, a i ka hele ʻana, hele nō ia e ʻai ana, a hiki i kona makua kāne, a me kona makuahine, a hāʻawi akula iā lāua, a ʻai ihola lāua; ʻaʻole naʻe ia i haʻi aku iā lāua, i kona lawe ʻana i ka meli, mai loko aku o ke kino o ka liona.

¹⁰ ¶ Iho akula kona makua kāne i ua wahine lā, a ma laila i hana ai ʻo Samesona i ʻahaʻaina pālala; no ka mea, pēlā i hana ai nā kānaka uʻi.

¹¹ A ʻike lākou iā ia, lawe lākou i kanakolu hoa, e noho pū ai me ia.

¹² ʻĪ akula ʻo Samesona iā lākou, “E nanenane aku au iā ʻoukou, a inā e koho mai ʻoukou ia iaʻu, i kēia mau lā ʻehiku o ka ʻahaʻaina ʻana, a loaʻa pono, a laila, e hāʻawi aku au iā ʻoukou i kanakolu pālule, a me nā paʻa kapa he kanakolu.

¹³ “Akā, inā ʻaʻole hiki iā ʻoukou ke haʻi mai iaʻu, a laila, na ʻoukou e hāʻawi mai iaʻu, i kanakolu pālule, a me nā paʻa kapa he kanakolu.” ʻĪ maila lākou iā ia, “E nane mai ʻoe, i lohe mākou.”

¹⁴ ʻĪ akula ʻo ia iā lākou: “Mai loko mai o ka mea e ʻai ana i puka mai ai ka ʻai, A mai loko mai hoʻi o ka mea ikaika, i loaʻa mai ai ka ʻono.” A i nā lā ʻekolu, ʻaʻole hiki iā lākou, ke koho mai iā ia i ua nane lā.

¹⁵ ¶ A i ka hiku o ka lā, ʻī aʻela lākou i ka wahine a Samesona, “E hoʻowalewale ʻoe i kāu kāne, i haʻi mai ai ʻo ia iā kākou i ka nane, o puhi auaneʻi mākou iā ʻoe, a me ka hale o kou makua kāne i ke ahi. Ua kiʻi mai anei ʻoukou iā mākou e hoʻohune iā mākou, ʻaʻole anei?”

¹⁶ Uē ihola ka wahine a Samesona i mua ona, ʻī akula iā ia, “Ke hoʻowahāwahā wale mai nei ʻoe iaʻu, ʻaʻole aloha mai iaʻu. Ua nanenane mai ʻoe i nā keiki a koʻu poʻe kānaka, ʻaʻole hoʻi i haʻi mai iaʻu.” ʻĪ maila kēlā iā ia, “Aia hoʻi, ʻaʻole au i haʻi aku i koʻu makua kāne, a me koʻu makuahine, a e haʻi anei au iā ʻoe?”

¹⁷ A ia mau lā ʻehiku o ko lākou ʻahaʻaina ʻana, uē ihola ʻo ia i mua ona; a i ka hiku o ka lā, haʻi maila kēlā iā ia; no ka mea, koi ikaika loa maila iā ia; a haʻi aʻela ka wahine i ua nane lā i nā keiki a kona poʻe kānaka.

¹⁸ A i ka hiku o ka lā, ʻaʻole i komo ka lā, ʻī maila nā kānaka o ke kūlanakauhale iā ia, “He aha ka mea i ʻoi aku ka ʻono ma mua o ka meli? A he aha hoʻi ka mea i ʻoi aku ka ikaika ma mua o ka liona?” ʻĪ akula kēia iā lākou: “Inā ʻaʻole ʻoukou i ʻōʻō palau me kaʻu bipi wahine ʻōpiopio, Inā ua loaʻa ʻole iā ʻoukou kaʻu nane!”

¹⁹ Kau maila ka ʻUhane o Iēhova ma luna ona, a iho akula ia i ʻAsekelona, a pepehi ihola i kanakolu kānaka o lākou, a lawe i ko lākou lole, a hāʻawi aʻela i paʻa kapa no ka poʻe i haʻi mai i ka nane. Wela ihola kona huhū, a piʻi akula ia i ka hale o kona makua kāne.

²⁰ Lilo aʻela ka wahine a Samesona i kona hoa, āna i hoʻolauna aku ai.