KA BUKE NO NĀ LUNA KĀNĀWAI 13 - Ka Baibala Hemolele

1 No Manoa a me kāna wahine. 24 Ka hānau ʻana o Samesona.

MOKUNA XIII.

¹ ¶ Hana hewa hou ihola nā mamo a ʻIseraʻela i mua o Iēhova; a hāʻawi maila ʻo Iēhova iā lākou i ka lima o ko Pilisetia, i hoʻokahi kanahā makahiki.

² ¶ Aia nō kekahi kanaka, no Zora, no kā Dana ʻohana, ʻo Manoa kona inoa, ua pā kāna wahine, ʻaʻole i hānau.

³ ʻIkea mai ka ʻānela o Iēhova e ka wahine, ʻī maila iā ia, “Aia hoʻi, ua pā ʻoe, ʻaʻole i hānau; e hāpai auaneʻi ʻoe, a hānau mai i keiki kāne.

⁴ “No ia mea lā ʻeā, mai inu ʻoe i ka waina, ʻaʻole hoʻi i ka wai ʻawaʻawa, mai ʻai hoʻi i kekahi mea haumia.

⁵ “Aia hoʻi, e hāpai ana ʻoe, a e hānau mai i keiki kāne, ʻaʻole e kau ka pahi ʻumiʻumi ma kona poʻo; no ka mea, e lilo ia keiki i Nazarite iā Iēhova, mai ka ʻōpū aku; nāna e hoʻomaka i ka hoʻōla i kā ʻIseraʻela, mai ka lima aku o ko Pilisetia.”

⁶ A laila, hele aʻela ka wahine, a haʻi aʻela i kāna kāne, ʻī aʻela, “Ua hele mai nei ke Kanaka o ke Akua iaʻu, ua like kona helehelena me ka helehelena o ka ʻānela o ke Akua, weliweli loa. ʻAʻole au i nīnau aku iā ia i kona wahi, ʻaʻole hoʻi ia i haʻi mai iaʻu i kona inoa.

⁷ “ʻĪ maila ia iaʻu, ‘Aia hoʻi, e hāpai auaneʻi ʻoe, a e hānau mai i keiki kāne. No laila ʻeā, mai inu ʻoe i ka waina, ʻaʻole hoʻi i ka wai ʻawaʻawa, ʻaʻole hoʻi e ʻai i kekahi mea haumia; no ka mea, e lilo ua keiki lā i Nazarite i ke Akua mai ka ʻōpū mai, a hiki i ka lā o kona make ʻana.’”

⁸ ¶ A laila, nonoi akula ʻo Manoa iā Iēhova, ʻī akula, “E kuʻu Haku ē, e kuʻu mai i ko ke Akua Kanaka āu i hoʻouna mai ai, e hele hou mai iā māua, e aʻo mai iā māua i nā mea a māua e hana aku ai i ke keiki e hānau mai ana.”

⁹ Hoʻolohe maila ke Akua i ka leo o Manoa, a hele hou mai ka ʻānela o ke Akua i ua wahine lā, i kona noho ʻana, ma ke kula; akā, ʻo Manoa, ʻo kāna kāne ʻaʻole ia pū me ia.

¹⁰ Wikiwiki ihola ka wahine, a holo, a hōʻike aʻela i kāna kāne, ʻī akula iā ia, “Aia hoʻi, ua ʻike hou ʻia maila iaʻu ke Kanaka i hele mai ai iaʻu i kēlā lā!”

¹¹ Kū aʻela ʻo Manoa a hahai akula i kāna wahine, a hiki i ua Kanaka lā, ʻī akula iā ia, “ʻO ʻoe anei ke Kanaka i ʻōlelo mai ai i ua wahine nei?” ʻĪ maila kēlā, “ʻO wau nō.”

¹² ʻĪ akula ʻo Manoa, “E hoʻokō ʻia kāu ʻōlelo. Pehea lā māua e hoʻoponopono ai i ke keiki? He aha hoʻi ka hana nāna?”

¹³ ʻĪ maila ka ʻānela o Iēhova iā Manoa, “E mālama pono ka wahine i nā mea a pau aʻu i ʻōlelo aku ai iā ia.

¹⁴ “Mai ʻai ʻo ia i kekahi mea o ke kumu waina, mai inu i ka waina, ʻaʻole hoʻi i ka mea ʻawaʻawa, mai ʻai ʻo ia i ka mea haumia. ʻO nā mea a pau aʻu i kauoha aku ai iā ia, e mālama pono ia.”

¹⁵ ¶ ʻĪ akula ʻo Manoa i ka ʻānela o Iēhova, “E kāohi paha māua iā ʻoe, a hoʻomākaukau ʻia he kao keiki, i mua ou.”

¹⁶ ʻĪ maila ka ʻānela o Iēhova iā Manoa, “Inā kāohi mai ʻoe iaʻu, ʻaʻole loa au e ʻai i kāu berena; a inā e mōhai ʻoe i ka mōhai kuni, e mōhai ʻoe ia no Iēhova”; no ka mea, ʻaʻole i ʻike ʻo Manoa he ʻānela ia no Iēhova.

¹⁷ ʻĪ akula ʻo Manoa i ka ʻānela o Iēhova, “ʻO wai kou inoa? I hoʻomaikaʻi aku ai māua iā ʻoe i ka wā e kō ai kāu mau ʻōlelo.”

¹⁸ ʻĪ maila ka ʻānela o Iēhova iā ia, “No ke aha lā ʻoe i nīnau mai ai i koʻu inoa; no ka mea, he kupanaha ia?”

¹⁹ Kiʻi aʻela ʻo Manoa i kao keiki, a me ka mōhai makana, a kaumaha akula no Iēhova ma luna o ka pōhaku; a hana kupanaha ihola ia; a nānā akula ʻo Manoa a me kāna wahine.

²⁰ I ka piʻi ʻana aku o ka lapalapa i luna i ka lani, mai ka lele aku, piʻi pū akula ka ʻānela o Iēhova ma loko o ka lapalapa o ke ahi o ka lele. Nānā akula ʻo Manoa a me kāna wahine, a hina ihola i lalo ke alo i ka honua.

²¹ ʻAʻole ʻike hou ʻia ka ʻānela o Iēhova iā Manoa a me kāna wahine. A laila ʻike pono ihola ʻo Manoa, he ʻānela ia no Iēhova.

²² ʻĪ aʻela Manoa i kāna wahine, “E make auaneʻi kāua; no ka mea, ua ʻike kāua i ke Akua!”

²³ ʻĪ maila kāna wahine iā ia, “Inā i manaʻo mai ʻo Iēhova e pepehi mai iā kāua, inā ua lawe ʻole ʻo ia i ka mōhai kuni, a me ka mōhai makana mai ko kāua lima aku, ʻaʻole hoʻi e hōʻike mai iā kāua i kēia mau mea a pau, ʻaʻole hoʻi e haʻi mai iā kāua pēnēia.”

²⁴ ¶ Hānau maila ua wahine lā, he keiki kāne, a kapa akula i kona inoa ʻo Samesona. Nui aʻela ua keiki nei, a hoʻomaikaʻi mai ʻo Iēhova iā ia.

²⁵ Hoʻomaka ihola ka ʻUhane o Iēhova e hoʻoikaika iā ia, ma Mahane Dana, ma waena o Zora a me ʻAsetaola.