KA BUKE NO NĀ LUNA KĀNĀWAI 12 - Ka Baibala Hemolele

1 Ke kūʻē ʻana o kā ʻEperaima, a pio lākou. 7 Ka make ʻana o Iepeta.

MOKUNA XII.

¹ ¶ ʻĀkoakoa maila nā kānaka o kā ʻEperaima, a hele aʻela i ka ʻaoʻao ʻākau, ʻī akula iā Iepeta, “No ke aha lā ʻoe i hele aku e kaua aku i nā mamo a ʻAmona, ʻaʻole kiʻi mai iā mākou e hele pū me ʻoe? E puhi ana mākou i kou hale i ke ahi ma luna ou!”

² ʻĪ maila ʻo Iepeta iā lākou, “He kanaka hakakā nui loa au me nā mamo a ʻAmona, a ʻo koʻu poʻe kānaka kekahi; a i koʻu hea ʻana aku iā ʻoukou, ʻaʻole ʻoukou i hoʻopakele mai iaʻu, mai ko lākou lima mai.

³ “A ʻike akula au, ʻaʻole ʻoukou i hoʻopakele mai iaʻu, a laila waiho ihola au i koʻu ola ma kuʻu lima, a hele kūʻē akula i nā mamo a ʻAmona. Hāʻawi mai nō ʻo Iēhova iā lākou i loko o kuʻu lima. No ke aha lā hoʻi ʻoukou i hele mai ai iaʻu i kēia lā e kaua mai iaʻu?”

⁴ A laila hoʻākoakoa maila ʻo Iepeta i nā kānaka o Gileada, a kaua pū ihola me kā ʻEperaima. Luku akula nā kānaka o Gileada i kā ʻEperaima; no ka mea, ʻōlelo lākou, “ʻO ʻoukou, ʻo ko Gileada, he poʻe ʻaeʻa ʻoukou no ʻEperaima, e noho ana ma waena o kā ʻEperaima, a me kā Manase.”

⁵ Lilo ihola nā āhua o Ioredane i kā Gileada, ma mua o kā ʻEperaima. A inā i hele mai kekahi o kā ʻEperaima, i pakele, a ʻōlelo mai, “E hele paha wau i kēlā ʻaoʻao”; a laila nīnau aʻela nā kānaka o Gileada iā ia, “No kā ʻEperaima ʻoe?” A inā ʻōlelo mai ʻo ia, “ʻAʻole”;

⁶ a laila, ʻōlelo mai lākou iā ia, “E ʻī iho ʻoe, ‘Sehiboleta!’” ʻĪ maila kēlā, “Siboleta”; no ka mea, ʻaʻole hiki iā ia ke ʻōlelo pololei pēlā. A laila hoʻopaʻa lākou iā ia, a pepehi nō ma nā āhua o Ioredane. Ia manawa hāʻule nā kānaka o ʻEperaima, he kanahākumamālua tausani.

⁷ Hoʻoponopono ʻo Iepeta i kā ʻIseraʻela, i ʻeono makahiki. A laila, make ʻo Iepeta no Gileada, a kanu ʻia ʻo ia ma kekahi o nā kūlanakauhale o Gileada.

⁸ ¶ A ma hope iho ona, na ʻIbezana o Betelehema i hoʻoponopono i kā ʻIseraʻela.

⁹ He kanakolu āna keiki kāne, a he kanakolu kaikamāhine. Hoʻouna akula ia iā lākou i kahi ʻē, a lawe mai i kanakolu kaikamāhine, mai kahi ʻē, na kāna poʻe keiki kāne. Nāna i hoʻoponopono i kā ʻIseraʻela, i ʻehiku makahiki.

¹⁰ A laila make ʻo ʻIbezana, a kanu ʻia ma Betelehema.

¹¹ ¶ A ma hope iho ona, hoʻoponopono ʻo ʻElona, no kā Zebuluna i kā ʻIseraʻela. Hoʻoponopono ia i kā ʻIseraʻela, he ʻumi makahiki.

¹² A make ihola ʻo ʻElona, no kā Zebuluna, a kanu ʻia ihola ia ma ʻAialona, ma ka ʻāina ʻo Zebuluna.

¹³ ¶ A ma hope iho ona, na ʻAbedona, ke keiki a Hilela, no ka Piratona, i hoʻoponopono i kā ʻIseraʻela.

¹⁴ He kanahā kāna poʻe keiki kāne, a he kanakolu moʻopuna kāne, a holo lākou ma luna o nā hoki keiki, he kanahiku. Nāna i hoʻoponopono i kā ʻIseraʻela, i ʻewalu makahiki.

¹⁵ Make ihola ʻo ʻAbedona, ke keiki a Hilela no Piratona, a kanu ʻia ihola ia ma Piratona, ka ʻāina ʻo ʻEperaima ma ka mauna o kā ʻAmeleka.