KA BUKE NO NĀ LUNA KĀNĀWAI 11 - Ka Baibala Hemolele

1 Kiʻi aku ko Gileada iā Iepeta i aliʻi no lākou. 12 Ka ʻōlelo ʻana a me ke kaua ʻana o Iepeta me ka ʻAmona.

MOKUNA XI.

¹ ¶ He kanaka koa loa ʻo Iepeta, no Gileada, a he keiki ia na kekahi wahine hoʻokamakama; na Gileada ʻo Iepeta.

² Hānau maila kā Gileada wahine i mau keiki kāne nāna; a oʻo aʻela nā keiki kāne a kāna wahine, kipaku akula lākou iā Iepeta, ʻī akula iā ia, “ʻAʻole ou kuleana ma ka hale o ko mākou makua kāne; no ka mea, he keiki ʻoe na kekahi wahine ʻē.”

³ Holo akula ʻo Iepeta, mai ke alo aku o kona poʻe hoahānau, a noho ma ka ʻāina ʻo Toba. ʻĀkoakoa maila nā kānaka lapuwale i o Iepeta lā, a hele pū me ia.

⁴ ¶ A ma hope iho o ia mau lā, kaua akula nā mamo a ʻAmona i kā ʻIseraʻela.

⁵ A i ka manawa i kaua aku ai nā mamo a ʻAmona i kā ʻIseraʻela, a laila, hele akula nā lunakahiko o Gileada e lawe mai iā Iepeta, mai ka ʻāina mai ʻo Toba.

⁶ ʻĪ akula lākou iā Iepeta, “E hele mai ʻoe i luna kaua no mākou, i kaua aku mākou i nā mamo a ʻAmona.”

⁷ ʻĪ maila ʻo Iepeta i nā lunakahiko o Gileada, “ʻAʻole anei ʻoukou i hoʻowahāwahā mai iaʻu, a kipaku mai iaʻu, mai ka hale mai o koʻu makua kāne? No ke aha lā ʻoukou e hele mai ai i oʻu nei, i kēia wā a ʻoukou i pilikia ai?”

⁸ ʻĪ akula nā lunakahiko o Gileada iā Iepeta, “Ke hoʻi hou mai nei mākou iā ʻoe, e hele pū ʻoe me mākou, e kaua aku i nā mamo a ʻAmona, a i lilo ʻoe i poʻo ma luna o ka poʻe a pau e noho ana ma Gileada.”

⁹ ʻĪ maila ʻo Iepeta i nā lunakahiko o Gileada, “Inā hoʻihoʻi ʻoukou iaʻu e kaua aku i nā mamo a ʻAmona, a hāʻawi mai ʻo Iēhova iā lākou i mua oʻu, e lilo anei au i poʻo no ʻoukou?”

¹⁰ ʻĪ akula nā lunakahiko o Gileada iā Iepeta, “Na Iēhova nō e hoʻolohe mai ma waena o kākou, ke hana ʻole mākou e like me kāu ʻōlelo.”

¹¹ A laila hele pū ʻo Iepeta me nā lunakahiko o Gileada, a hoʻonoho ihola nā kānaka iā Iepeta, i poʻo, a i luna hoʻi ma luna o lākou. ʻŌlelo akula ʻo Iepeta i kāna ʻōlelo a pau i mua o Iēhova ma Mizepa.

¹² ¶ Hoʻouna akula ʻo Iepeta i ʻelele, i ke aliʻi o nā mamo a ʻAmona, ʻī akula, “He aha kāu iaʻu, i hele mai ai ʻoe e kaua i koʻu ʻāina?”

¹³ ʻĪ maila ke aliʻi o nā mamo a ʻAmona i nā ʻelele o Iepeta, “No ka mea, lawe lilo kā ʻIseraʻela i koʻu ʻāina, mai ʻArenona a hiki i Iaboka, a me Ioredane, i ka wā a lākou i hele mai ai, mai loko mai o ʻAigupita; no laila, e hoʻihoʻi mai ʻoe ia, me ka malu.”

¹⁴ Hoʻouna hou akula ʻo Iepeta i ʻelele i ke aliʻi o nā mamo a ʻAmona;

¹⁵ ʻī akula iā ia, “Ke ʻōlelo mai nei ʻo Iepeta, ʻAʻole i lawe kā ʻIseraʻela i ka ʻāina ʻo Moaba, ʻaʻole hoʻi i ka ʻāina o nā mamo a ʻAmona;

¹⁶ i ka manawa i hele mai ai kā ʻIseraʻela, mai ʻAigupita mai, hele nō lākou, ma ka wao nahele a hiki i ke Kai ʻUla, a komo nō i Kadesa.

¹⁷ ‘A laila, hoʻouna kā ʻIseraʻela i ʻelele i ke aliʻi o ʻEdoma, ʻī akula, “E hele paha wau ma waena o kou ʻāina.” ʻAʻole hoʻolohe mai ke aliʻi o ʻEdoma. Pēlā nō lākou i hoʻouna aku ai i ke aliʻi o Moaba. ʻAʻole ia i ʻae, a noho nō kā ʻIseraʻela ma Kadesa.

¹⁸ ‘Hele aʻela lākou ma ka wao nahele, a puni ka ʻāina ʻo ʻEdoma, a me ka ʻāina ʻo Moaba, ma ka ʻaoʻao hikina o Moaba ka hele ʻana; a hoʻomoana ihola ma kēlā ʻaoʻao o ʻArenona, ʻaʻole hoʻi i komo ma loko o nā mokuna ʻo Moaba; no ka mea, ʻo ʻArenona ka mokuna ʻo Moaba.

¹⁹ ‘Hoʻouna akula kā ʻIseraʻela i ʻelele iā Sihona, i ke aliʻi o kā ʻAmora, ke aliʻi o Hesebona, ʻī akula ʻo ʻIseraʻela iā ia, “E hele paha mākou ma waena o kou ʻāina, a hiki i koʻu wahi.”

²⁰ ‘ʻAʻole ʻoluʻolu ʻo Sihona ke hele kā ʻIseraʻela ma kona mokuna. Hoʻākoakoa maila ʻo Sihona i kona poʻe kānaka a pau, a hoʻomoana ihola ma Iahaza, a kaua maila i kā ʻIseraʻela.

²¹ ‘Hāʻawi maila ʻo Iēhova, ke Akua o kā ʻIseraʻela iā Sihona, a me kona poʻe kānaka a pau i ka lima o kā ʻIseraʻela, a luku akula lākou nei i kēlā poʻe. A komo iho kā ʻIseraʻela i ka ʻāina a pau o kā ʻAmora, ka poʻe i noho ma ia ʻāina.

²² ‘A komo nō lākou i nā mokuna a pau o kā ʻAmora, mai ʻArenona, a hiki i Iaboka, mai ka wao nahele, a hiki i Ioredane.

²³ ‘Ua hoʻonele mai ʻo Iēhova, ke Akua o kā ʻIseraʻela i kā ʻAmora, mai ke alo aku o kā ʻIseraʻela, a e komo anei ʻoe ia wahi?

²⁴ ‘ʻAʻole anei ʻoe e komo i kahi a Kemosa, a kou akua, e hoʻokomo ai iā ʻoe? A ʻo nā mea a pau a Iēhova a ko mākou Akua e hoʻonele ai i mua o mākou, ʻo ia kā mākou e komo ai.

²⁵ ‘Ua ʻoi aku anei kou maikaʻi ma mua o ko Balaka, ke keiki a Zipora ke aliʻi o Moaba? Ua paio anei ia me kā ʻIseraʻela, ua kaua anei iā lākou?

²⁶ ‘I ka noho ʻana o kā ʻIseraʻela ma Hesebona, a me kona mau kūlanakauhale, a ma ʻAroera, a me kona mau kūlanakauhale, a ma nā kūlanakauhale a pau e kokoke ana i nā mokuna ʻo ʻArenona, ʻekolu haneri makahiki? No ke aha lā ʻoukou i kiʻi ʻole mai e lawe ia manawa?

²⁷ ‘ʻAʻole au i hana hewa iā ʻoe; akā, ke hana hewa mai nei ʻoe iaʻu i kou kaua ʻana mai iaʻu. ʻO Iēhova ka luna kānāwai, nāna nō e hoʻoponopono mai i kēia lā i waena o nā mamo a ʻIseraʻela a me nā mamo a ʻAmona.’”

²⁸ ʻAʻole hoʻolohe ke aliʻi o nā mamo a ʻAmona i nā ʻōlelo a Iepeta, āna i hoʻouna aku ai iā ia.

²⁹ ¶ A laila kau maila ka ʻUhane o ke Akua ma luna o Iepeta, a kaʻahele aʻela ia i Gileada, a me ko Manase, a kaʻahele aku iā Mizepa o Gileada, a mai Mizepa o Gileada ia i hele aku ai a i nā mamo a ʻAmona.

³⁰ Hoʻohiki ihola ʻo Iepeta, me ka ʻōlelo hāʻawi no Iēhova, ʻī akula, “Inā e hāʻawi ʻiʻo mai ʻoe i nā mamo a ʻAmona i koʻu lima,

³¹ “A laila, ʻo ka mea e puka ʻē mai ana, mai loko mai o nā puka o koʻu hale, e hālāwai me aʻu, i koʻu hoʻi ʻana me ka malu, mai nā mamo a ʻAmona aku, ʻo ia ko Iēhova, a i ʻole ia naʻu ia e kaumaha aku i mōhai kuni.”

³² Hele akula ʻo Iepeta i nā mamo a ʻAmona, e kaua aku iā lākou; a hāʻawi mai ʻo Iēhova iā lākou i kona lima.

³³ Luku akula ia iā lākou, mai ʻAroera aku a hiki i Minita, he iwakālua kūlanakauhale, a hiki nō hoʻi i ka pāpū o nā māla waina, he luku nui loa. Pio ihola nā mamo a ʻAmona i mua o ke alo o nā mamo a ʻIseraʻela.

³⁴ ¶ Hoʻi maila ʻo Iepeta i Mizepa, i kona hale; aia hoʻi kāna kaikamahine i hele mai i waho, e hālāwai me ia, me nā pahu kani, a me ka hula. ʻO kāna hānau kahi nō ia; ʻaʻole āna keiki kāne, ʻaʻole hoʻi kaikamahine ʻē aʻe.

³⁵ A ʻike akula ʻo Iepeta iā ia, haehae ihola i kona ʻaʻahu, ʻī akula, “Auē kuʻu kaikamahine ē! Ua hoʻokaumaha loa mai ʻoe iaʻu; ʻo ʻoe kekahi i hoʻopilikia mai iaʻu. Ua ʻoaka aʻela au i kuʻu waha iā Iēhova, ʻaʻole hiki iaʻu ke hoʻi hope.”

³⁶ ʻĪ akula ʻo ia iā ia, “E kuʻu makua kāne, ua ʻoaka ʻoe i kou waha iā Iēhova ʻeā, e hana mai ʻoe iaʻu, e like me kēlā mea i puka aku, mai kou waha aku; no ka mea, ua hoʻopaʻi ʻo Iēhova i kou poʻe ʻenemi nou, i nā mamo hoʻi a ʻAmona.”

³⁷ ʻĪ akula ʻo ia i kona makua kāne, “E hana ʻia kēia mea noʻu; e waiho wale iaʻu, i ʻelua malama, i hele au a kaʻahele i nā mauna, a uē i koʻu puʻupaʻa ʻana, ʻo wau a me koʻu poʻe hoahānau.”

³⁸ ʻĪ maila kēlā, “Ō hele.” Hoʻouna aʻela ʻo ia iā ia i ʻelua malama. Hele akula ia me kona mau hoalauna, a uē ihola ma nā mauna no kona puʻupaʻa ʻana.

³⁹ A i ka pau ʻana o nā malama ʻelua, hoʻi maila kēlā i kona makua kāne, a hana akula ʻo ia iā ia i kona hoʻohiki āna i hoʻohiki ʻai; ʻaʻole hoʻi ia i ʻike i ke kāne; a lilo ia i ʻoihana ma waena o kā ʻIseraʻela,

⁴⁰ ʻo ka hele ʻana o nā kaikamāhine o kā ʻIseraʻela, i kēlā makahiki, i kēia makahiki, e hoʻomaikaʻi i ke kaikamahine a Iepeta, no Gileada, ʻehā lā i ka makahiki.