KA BUKE NO NĀ LUNA KĀNĀWAI 10 - Ka Baibala Hemolele

1 Nā luna kānāwai o kā ʻIseraʻela. 15 ʻO ko lākou hoʻokaumaha ʻia, a me ka mihi, a me ke aloha o ke Akua.

MOKUNA X.

¹ ¶ A ma hope iho o ʻAbimeleka, kū mai ʻo Tola, ke keiki a Pua, ke keiki a Dodo, he kanaka no kā ʻIsakara, nāna i hoʻōla i kā ʻIseraʻela. A noho nō ia ma Samira, ma ka mauna ʻo ʻEperaima.

² Nāna i hoʻoponopono i kā ʻIseraʻela, he iwakāluakumamākolu makahiki, a make ia, kanu ʻia ihola ia ma Samira.

³ ¶ Ma hope iho ona, kū mai ʻo Iaira, he kanaka no Gileada, nāna i hoʻoponopono i kā ʻIseraʻela, he iwakāluakumamālua makahiki.

⁴ He kanakolu āna mau keiki kāne, a holo lākou ma luna o nā hoki keiki, he kanakolu; he kanakolu ko lākou poʻe kūlanakauhale, i kapa ʻia “Havota Iaira”, a hiki mai i nēia lā; aia nō ma ka ʻāina ʻo Gileada.

⁵ Make ihola ʻo Iaira, a kanu ʻia ihola ma Kamona.

⁶ ¶ Hana hewa hou akula nā mamo a ʻIseraʻela, i mua o Iēhova, a mālama akula i nā Baʻala, a me nā ʻAsetarota, a me nā akua o Suria, a me nā akua o Sidona, a me nā akua o Moaba, a me nā akua o nā mamo a ʻAmora, a me nā akua o ko Pilisetia, a haʻalele iā Iēhova, ʻaʻole i mālama iā ia.

⁷ Wela ihola ka huhū o Iēhova i kā ʻIseraʻela, a hoʻolilo akula iā lākou i ka lima o ko Pilisetia, a i ka lima o nā mamo a ʻAmona.

⁸ Ia kau, hōʻino maila lākou, a hoʻokaumaha loa i nā mamo a ʻIseraʻela, he ʻumikumamāwalu makahiki, i nā mamo a pau a ʻIseraʻela, ma ia ʻaoʻao o Ioredane, ma ka ʻāina o kā ʻAmora, ʻo ia hoʻi ma Gileada.

⁹ Hele aʻe nō hoʻi nā mamo a ʻAmona i kēlā ʻaoʻao o Ioredane, a kaua aʻela i kā Iuda, a i kā Beniamina, a i ko ka hale a ʻEperaima; no ia mea, kaumaha loa kā ʻIseraʻela.

¹⁰ ¶ Hea akula nā mamo a ʻIseraʻela iā Iēhova, ʻī akula, “Ua hana hewa mākou iā ʻoe; no ka mea, ua haʻalele mākou i ko mākou Akua, a ua mālama i nā Baʻala!”

¹¹ ʻĪ maila ʻo Iēhova i nā mamo a ʻIseraʻela, “ʻAʻole anei naʻu ʻoukou i hoʻopakele, mai ko ʻAigupita mai? A mai kā ʻAmora mai, a mai nā mamo a ʻAmona mai, a mai ko Pilisetia mai?

¹² “Hoʻokaumaha mai nō hoʻi ʻo ko Zidona iā ʻoukou, a me kā ʻAmeleka, a me kā Maona, a hea mai ʻoukou iaʻu, a hoʻōla mai au iā ʻoukou, mai ko lākou lima mai.

¹³ “Akā, ua haʻalele ʻoukou iaʻu, a ua mālama i nā akua ʻē; no laila ʻaʻole au e hoʻōla hou iā ʻoukou.

¹⁴ “E hele ʻoukou, e hea aku i nā akua a ʻoukou i koho ai; na lākou e hoʻōla mai iā ʻoukou, i ka manawa o ko ʻoukou kaumaha.”

¹⁵ ʻĪ akula nā mamo o ʻIseraʻela iā Iēhova, “Ua hana hewa mākou, ʻo ka mea i pono i kou mau maka, pēlā ʻoe e hana mai ai iā mākou. Ke noi aku nei mākou iā ʻoe, e hoʻōla mai iā mākou i kēia lā wale nō.”

¹⁶ Kiola akula lākou i nā akua ʻē, mai o lākou aku, a mālama ihola iā Iēhova; a menemene ihola kona ʻuhane, no ke kaumaha nui o kā ʻIseraʻela.

¹⁷ ¶ ʻĀkoakoa maila nā mamo a ʻAmona, a hoʻomoana ihola ma Gileada; a ʻākoakoa maila nā mamo a ʻIseraʻela, a hoʻomoana ihola ma Mizepa.

¹⁸ ʻĪ aʻela nā kānaka, ka poʻe luna o Gileada hoʻi, kekahi i kekahi, “ʻO wai ke kanaka e hoʻomaka i ke kaua aku i nā mamo a ʻAmona? E lilo ia i luna ma luna o nā kānaka a pau o Gileada.”