KA BUKE NO NĀ LUNA KĀNĀWAI 1 - Ka Baibala Hemolele

1 Ke kaua ʻana o kā ʻIseraʻela, i ko Kanaʻana, a pio ko Kanaʻana, a me kā Pereza, a me ko Ierusalema, a me ko Heberona, ʻaʻole naʻe i pau nā kānaka i ka make.

MOKUNA I.

¹ ¶ Ma hope iho o ka make ʻana o Iosua, nīnau akula ka poʻe mamo a ʻIseraʻela iā Iēhova, ʻī akula, “ʻO wai ko mākou mea e piʻi mua aku i ke alo o ko Kanaʻana, e kaua aku iā lākou?”

² ʻĪ maila ʻo Iēhova, “E piʻi aʻe kā Iuda; aia hoʻi, ua hāʻawi au i ka ʻāina i kona lima.”

³ ʻĪ aʻela kā Iuda i kā Simeona, i kona kaikuaʻana, “E hele pū ʻoe me aʻu, ma koʻu hele ʻana, i kaua aku kākou i ko Kanaʻana, a e hele pū nō hoʻi au me ʻoe, ma kou hele ʻana. “A hele pū akula kā Simeona me ia.

⁴ Piʻi akula kā Iuda, a hāʻawi maila ʻo Iēhova i ko Kanaʻana, a me kā Pereza, i ko lākou lima. A luku akula lākou i kēlā poʻe ma Bezeka, he ʻumi tausani kānaka.

⁵ A ma Bezeka, loaʻa iā lākou ʻo ʻAdoni-Bezeka; a kaua akula lākou iā ia, a luku akula lākou i ko Kanaʻana, a me kā Pereza.

⁶ Holo akula ʻo ʻAdoni-Bezeka, a hahai akula lākou iā ia, a loaʻa ʻo ia, a laila ʻoʻoki aʻela lākou i nā manamana nui o kona mau lima, a me nā manamana nui o kona mau wāwae.

⁷ ʻĪ aʻela ʻo ʻAdoni-Bezeka, “He kanahiku aliʻi, ua ʻoki ʻia nā manamana nui o ko lākou lima, a me ko lākou wāwae, hōʻiliʻili lākou ma lalo iho o koʻu papa ʻaina. E like me kaʻu i hana aku ai, pēlā i hoʻopaʻi mai ai ke Akua iaʻu.” Lawe aʻela lākou iā ia i Ierusalema, a ma laila ia i make ai.

⁸ ¶ Ua kaua aku ka poʻe mamo a Iuda, a ua hoʻopio, a ua luku aku iā Ierusalema, i ka maka o ka pahi kaua, a ua puhi aku ia kūlanakauhale i ke ahi.

⁹ A ma hope iho hele aʻela nā mamo a Iuda e kaua aku i ko Kanaʻana, i ka poʻe i noho ma ka mauna, a ma ka ʻaoʻao hema, a ma ka pāpū.

¹⁰ Hele kūʻē akula kā Iuda i ko Kanaʻana, i ka poʻe i noho ma Heberona; ʻo Kiriata ʻAreba ka inoa kahiko ʻo Heberona; a pepehi akula lākou iā Sesai, a me ʻAhimana, a me Talemai.

¹¹ ¶ A ma laila aku lākou i hele ai e kūʻē iā Debira; ʻo Kiriata Sepera ka inoa kahiko ʻo Debira.

¹² ʻĪ ihola ʻo Kaleba, “ʻO ka mea nāna e pepehi iā Kiriata Sepera, a e hoʻopio iho, e hāʻawi aku au iā ʻAkesa, i kaʻu kaikamahine, i wahine nāna.”

¹³ Na ʻOteniʻela, ke keiki a Kenaza, ke kaikaina o Kaleba i hoʻopio aku ia wahi; a hāʻawi ihola ʻo ia iā ʻAkesa, i kāna kaikamahine, i wahine nāna.

¹⁴ Eia hoʻi kekahi, a hiki mai ka wahine i ona lā, koi aʻela ʻo ia iā ia e noi aku i kona makua kāne i ʻāina. A iho ihola ia mai luna mai o ka hoki. Nīnau aʻela ʻo Kaleba i ke kaikamahine, “He aha kāu?”

¹⁵ ʻĪ maila kēlā, “E hāʻawi mai ʻoe iaʻu i mea e pōmaikaʻi ai. No ka mea, ua hāʻawi mai ʻoe iaʻu i ʻāina ma ke Kūkulu Hema; e hāʻawi mai nō hoʻi ʻoe i nā kumu wai.” A hāʻawi maila ʻo Kaleba i nā kumu wai luna a me nā kumu wai lalo.

¹⁶ ¶ Piʻi akula nā mamo a ka mea no Keni, a ka makuahōnōai kāne o Mose, mai ke kūlanakauhale o nā lāʻau pāma aku, me nā mamo a Iuda, a i ka wao nahele o kā Iuda, aia nō ia ma ka ʻaoʻao hema o ʻArada; a hele aʻela lākou a noho pū ihola me kānaka.

¹⁷ Hele pū akula kā Iuda, me kā Simeona, kona kaikuaʻana, a luku akula lākou i ko Kanaʻana, ka poʻe i noho ma Zepata, a hoʻōki loa ihola ia wahi. Ua kapa ʻia ka inoa o ia kūlanakauhale, ʻo Horema.

¹⁸ Hoʻopio ihola kā Iuda iā Gaza a me ko laila mau mokuna, a iā ʻAsekelona kekahi me ko laila mau mokuna, a iā ʻEkerona hoʻi me ko laila mau mokuna.

¹⁹ ʻO Iēhova pū nō kekahi me kā Iuda, a loaʻa iā lākou ka mauna; ʻaʻole hiki iā lākou ke kipaku aku i ka poʻe i noho ma nā ʻāina haʻahaʻa; no ka mea, he hao ko lākou kaʻa kaua.

²⁰ A hāʻawi aʻela lākou iā Heberona no Kaleba, e like me kā Mose i ʻōlelo mai ai. A kipaku akula ia, ma laila aku, i nā keiki ʻekolu a ʻAnaka.

²¹ ʻAʻole i kipaku nā mamo a Beniamina i kā Iebusa, i noho ma Ierusalema; akā, noho pū nō ka Iebusa me nā mamo a Beniamina ma Ierusalema, a hiki loa mai i kēia lā.

²² ¶ ʻO ka ʻohana a Iosepa kekahi i piʻi, e kaua aku iā Betela; a ʻo Iēhova pū nō me lākou.

²³ Kiu aku ka ʻohana a Iosepa iā Betela. ʻO Luza ka inoa kahiko o ia kūlanakauhale.

²⁴ ʻIke akula nā kiu i kekahi kanaka, mai ke kūlanakauhale ia i hele mai ai. ʻĪ akula lākou iā ia, “E kuhikuhi mai ʻoe iā mākou, i kahi e komo aku ai i loko o ke kūlanakauhale, a e hana lokomaikaʻi aku mākou iā ʻoe.”

²⁵ Kuhikuhi maila ʻo ia iā lākou i kahi e komo aku ai i loko o ke kūlanakauhale, a luku akula lākou ia kūlanakauhale i ka maka o ka pahi kaua; a kuʻu akula lākou i ua kanaka lā, a me kona poʻe a pau.

²⁶ A hele akula ua kanaka nei i ka ʻāina o kā Heta, kūkulu ihola i kūlanakauhale, a kapa akula i ka inoa, ʻo Luza, ʻo ia hoʻi kona inoa a hiki mai i nēia lā.

²⁷ ¶ ʻAʻole i kipaku kā Manase i ko Bete Seana, a me ko laila mau wahi; ʻaʻole hoʻi i ko Taʻanaka, a me ko laila mau wahi, ʻaʻole i ka poʻe i noho ma Dora, a me ko laila mau wahi; ʻaʻole i ka poʻe i noho ma ʻIbeleama, a me ko laila mau wahi, ʻaʻole i ka poʻe i noho ma Megido, a me ko laila mau wahi; akā, hoʻopaʻa nō ko Kanaʻana i ko lākou noho ʻana ma ia ʻāina.

²⁸ A hiki i ka manawa i ikaika ai kā ʻIseraʻela, ʻauhau akula lākou i ko Kanaʻana, ʻaʻole i kipaku loa iā lākou.

²⁹ ¶ ʻAʻole hoʻi i kipaku kā ʻEperaima i ko Kanaʻana i noho ma Gezera. Noho pū nō ko Kanaʻana me lākou ma Gezera.

³⁰ ¶ ʻAʻole hoʻi i kipaku aku kā Zebuluna i ka poʻe i noho ma Kiterona, ʻaʻole i ka poʻe i noho ma Nahalola. Noho pū nō ko Kanaʻana me lākou, a lilo lākou i poʻe i hoʻokupu mai.

³¹ ¶ ʻAʻole hoʻi i kipaku aku ʻo ʻAsera i ka poʻe i noho ma ʻAko, ʻaʻole i ka poʻe i noho ma Zidona, ʻaʻole i ko ʻAhelaba, ʻaʻole i ko ʻAkeziba, ʻaʻole i ko Helaba, ʻaʻole i ko ʻApika, ʻaʻole i ko Rehoba.

³² Noho pū nō kā ʻAsera me ko Kanaʻana, nā kānaka o ka ʻāina; no ka mea, ʻaʻole lākou i kipaku aku ia poʻe.

³³ ¶ ʻAʻole hoʻi i kipaku aku kā Napetali i ka poʻe i noho ma Bete Semesa, ʻaʻole hoʻi i ka poʻe i noho ma Beta ʻAnata, noho pū nō lākou me ko Kanaʻana, nā kānaka o ka ʻāina; akā, lilo nā kānaka o Bete Semesa, a me Beta ʻAnata, i poʻe hoʻokupu mai na lākou.

³⁴ ¶ Hoʻokē akula kā ʻAmora i nā mamo a Dana, a hiki i luna o ka puʻu. ʻAʻole lākou i ʻae aku ke iho mai ia poʻe i nā ʻāina pāpū.

³⁵ Hoʻopaʻa nō kā ʻAmora i ko lākou noho ʻana ma ka mauna ʻo Heresa, a ma ʻAialona, a ma Saʻalebima; akā, ua kaumaha aku nō ka lima o ko Iosepa poʻe, a lilo kēlā i poʻe hoʻokupu mai.

³⁶ ʻO nā mokuna o kā ʻAmora, mai ka puʻu ʻo ʻAkerabima aku ia, a mai Sela aku nō.