ʻO KA ʻEPISETOLE HOʻOLAHA A IAKOBO 3 - Ka Baibala Hemolele

1 No ka mālama pono ʻana i ko kākou alelo.

MOKUNA III.

¹ ¶ E nā hoahānau oʻu, ʻaʻole make lilo nā mea o ʻoukou he nui i poʻe kumu, o loaʻa auaneʻi iā kākou ka hoʻohewa nui ʻia mai.

² No ka mea, ma nā mea he nui ua hewa kākou a pau; i hewa ʻole kekahi ma kāna ʻōlelo, ʻo ia ke kanaka hemolele, e hiki hoʻi iā ia ke hoʻopaʻa i kona kino iho a pau i ke kaula waha.

³ Aia hoʻi, ke hoʻokomo nei kākou i nā kaula waha i loko o ka waha o nā lio i hoʻolohe mai lākou iā kākou; hoʻohuli aʻe hoʻi kākou i ko lākou kino a pau.

⁴ Aia hoʻi, ʻo nā moku nui, ua hoʻoholo ʻia aʻe i nā makani ikaika loa, a ua hoʻohuli ʻia aʻe hoʻi e ka hoe uli ʻuʻuku loa, ma kahi e makemake ai ʻo ke kahu moku.

⁵ Pēlā hoʻi, he lālā ʻuʻuku ke alelo, a kaena nui aʻela ia. Aia hoʻi, ua hoʻaʻā ʻia he puʻu wahie nui e ka hunaahi!

⁶ He ahi nō ke alelo, he ao ʻokoʻa ia o ka hewa; pēlā hoʻi ua kau ʻia ke alelo i waena o ko kākou mau lālā, e hoʻohaumia ana i ke kino a pau, hoʻaʻā aʻela ia i ko ke ao nei, a ua hoʻaʻā ʻia mai ia e ka luaahi.

⁷ Ua hoʻolaka ʻia kēlā a me kēia ʻano o nā holoholona hihiu, a me nā manu, a me nā mea kolo, a me nā mea hoʻi o ke kai, ua hoʻolaka ʻia mai lākou e kānaka.

⁸ Akā, ʻo ke alelo, ʻaʻole loa e hiki i ke kanaka ke hoʻolakalaka ia mea; he mea ʻino laka ʻole ia, ua piha i ka mea ʻawahia e make ai.

⁹ ʻO ia ko kākou mea e hoʻomaikaʻi aku ai i ke Akua i ka Makua; ʻo ia hoʻi ko kākou mea e hōʻino aku ai i kānaka i hana ʻia ai ma ke ʻano o ke Akua.

¹⁰ Ua puka maila ka hoʻomaikaʻi a me ka hōʻino no loko mai o ka waha hoʻokahi. E nā hoahānau oʻu, ʻaʻole loa e pono kēia mau mea pēlā.

¹¹ E puapuaʻi mai anei ka wai ʻono a me ka wai ʻawaʻawa no loko mai o ka pūnāwai hoʻokahi?

¹² E nā hoahānau oʻu, e hiki anei i ka lāʻau fiku ke hua mai i ka hua ʻoliva, a ʻo ke kumu waina hoʻi i ka fiku? ʻOiaʻiʻo hoʻi, ʻaʻole e hiki i ka pūnāwai hoʻokahi ke kahe mai i ka wai ʻawaʻawa a me ka wai ʻono.

¹³ ¶ ʻO wai lā ka mea akamai a me ka naʻauao i waena o ʻoukou? E hōʻike mai nō ia ma ka noho maikaʻi ʻana, i kāna hana ʻana me ke akahai o ka naʻauao.

¹⁴ Inā iā ʻoukou ka huāhuā ikaika a me ka manaʻo hakakā i loko o ko ʻoukou naʻau; mai haʻanui ʻoukou, a wahaheʻe aku i ka ʻoiaʻiʻo.

¹⁵ ʻAʻole ʻo ia ke akamai i iho mai mai luna mai; akā, no ka honua ia, a no ke kino, a no nā daimonio hoʻi.

¹⁶ No ka mea, ma kahi e huāhuā ai a e hakakā ai hoʻi, aia ma laila ka haunaele a me nā hana ʻino a pau.

¹⁷ Akā, ʻo ke akamai no luna mai, he maʻemaʻe nō ia ma mua, a laila he noho mālie, he akahai, he ʻoluʻolu, he piha hoʻi i ka lokomaikaʻi a me ka hua maikaʻi, ʻaʻole loa e manaʻo ʻino aku, ʻaʻole hoʻi he hoʻokamani.

¹⁸ A ʻo ka hua o ka pono ua lūlū ʻia me ke kuʻikahi e ka poʻe e hana ana ma ke kuʻikahi.