ʻO KA ʻEPISETOLE HOʻOLAHA A IAKOBO 2 - Ka Baibala Hemolele

1 ʻO ka manaʻo i ke Akua, me ka mālama ʻole i kāna mau kauoha, ʻaʻole loa ia he pono.

MOKUNA II.

¹ ¶ E nā hoahānau oʻu, i ko ʻoukou manaʻoʻiʻo ʻana iā Iesū Kristo i ko kākou Haku nani, mai manaʻo aku ma ko ke kanaka helehelena.

² No ka mea, inā e komo kekahi kanaka i loko o ko ʻoukou hale hālāwai me ke komo lima gula, a nani hoʻi kona kapa, a komo mai nō hoʻi kekahi mea ʻilihune, ʻinoʻino hoʻi kona kapa;

³ a manaʻo aku ʻoukou ma ka mea i kāhiko i ke kapa nani, a e ʻōlelo aʻe ʻoukou, “Ma ʻaneʻi ʻoe e noho ai ma kahi maikaʻi;” a e ʻōlelo aku hoʻi i ka mea ʻilihune, “E kū ʻoe ma laila, a e noho paha ʻoe ma ʻaneʻi ma kuʻu paepae wāwae;”

⁴ ʻAʻole anei ʻoukou i lilo i poʻe pāʻewaʻewa aku, e manaʻo hewa wale aku ana?

⁵ E hoʻolohe ʻoukou, e nā hoahānau aloha oʻu, ʻaʻole anei ke Akua i wae aʻe i ka poʻe ʻilihune o ke ao nei e lako i ka manaʻoʻiʻo, a e lilo i poʻe hoʻoilina o ke aupuni āna i ʻōlelo mai ai i ka poʻe e aloha aku ana iā ia?

⁶ Akā, ua hoʻowahāwahā ʻoukou i ka poʻe ʻilihune. ʻAʻole anei i hoʻoluhi mai ka poʻe waiwai iā ʻoukou, a i alakaʻi hoʻi iā ʻoukou ma kahi e hoʻokolokolo ai?

⁷ ʻAʻole anei lākou i hōʻino i kēlā inoa maikaʻi i kapa ʻia aku ai ʻoukou?

⁸ Inā ʻoukou e mālama i ke kānāwai hemolele me ia ma ka Palapala, “«E aloha aku ʻoe i kou hoalauna e like me ʻoe iho»,” inā ua pono kā ʻoukou hana ʻana;

⁹ akā, inā e manaʻo ʻoukou ma ko ka helehelena, ua hana hewa ʻoukou, a ua hoʻohewa ʻia ʻoukou e ke kānāwai he poʻe lawehala.

¹⁰ ʻO ka mea mālama i ke kānāwai a pau, a i hāʻule naʻe ia ma ka mea hoʻokahi, ua hewa nō ia i ke kānāwai a pau.

¹¹ No ka mea, ʻo ka Mea nāna i kauoha mai, “«Mai moekolohe ʻoe»,” kauoha maila nō hoʻi, “«Mai pepehi kanaka ʻoe».” ʻĀnō, inā ʻaʻole ʻoe i moekolohe aku; akā, ua pepehi i ke kanaka, ua lilo ʻoe i mea haʻihaʻi i ke kānāwai.

¹² E ʻōlelo aku ʻoukou, a e hana aku hoʻi, e like me ka poʻe e hoʻokolokolo ʻia ana ma ke kānāwai o ke ola.

¹³ ʻO ka mea i hana me ke aloha ʻole aku, e hoʻāhewa ʻia auaneʻi ʻo ia me ke aloha ʻole ʻia mai; ʻaʻole makaʻu ka lokomaikaʻi i ka hoʻohewa ʻia.

¹⁴ ¶ E nā hoahānau oʻu, he aha ka waiwai, ke ʻōlelo kekahi, he manaʻoʻiʻo kona, ʻaʻole hoʻi āna hana? E hiki anei i ka manaʻoʻiʻo ke hoʻōla iā ia?

¹⁵ Inā he kapa ʻole ko ke kaikaina paha, ke kaikuahine paha, a i nele hoʻi i ka ʻai i kēlā lā i kēia lā;

¹⁶ a i ʻī aku kekahi o ʻoukou iā lāua, “Ō hele ʻolua me ka pōmaikaʻi, a e hoʻopumahana ʻia,” a e māʻona nō hoʻi; ʻaʻole naʻe ʻoukou e hāʻawi ʻiʻo aku iā lāua i ka mea e pono ai ke kino; he aha lā ka waiwai?

¹⁷ Pēlā nō hoʻi ka manaʻoʻiʻo, inā ʻo ia wale nō ʻaʻole āna hana, ua make ia.

¹⁸ A e ʻī mai kekahi, “ʻO ka manaʻoʻiʻo kou, a naʻu hoʻi ka hana ʻana; e hōʻike mai ʻoe iaʻu i kou manaʻoʻiʻo me kāu hana ʻole, a ma kaʻu hana ʻana e hōʻike aku ai au iā ʻoe i kuʻu manaʻoʻiʻo.”

¹⁹ Ke manaʻoʻiʻo nei ʻoe, aia hoʻokahi Akua; ua pono ʻoe: pēlā nō ka poʻe daimonio i manaʻoʻiʻo ai, me ka haʻalulu hoʻi.

²⁰ E ke kanaka lapuwale, ke makemake nei anei ʻoe e ʻike aku, ua make ka manaʻoʻiʻo ke ʻole kāna hana ʻana?

²¹ ʻAʻole anei i hoʻāpono ʻia mai ʻo ʻAberahama ko kākou kupuna ma ka hana ʻana, i kona wā i mōhai aku ai i kāna keiki iā ʻIsaʻaka ma luna o ke kuahu?

²² Ke ʻike nei ʻoe, i hoʻoikaika pū ka manaʻoʻiʻo me kāna hana ʻana, a ma ka hana ʻana i pono ai ka manaʻoʻiʻo.

²³ A ua hoʻokō ʻia hoʻi ka Palapala, i ʻī mai ai, “«Ua manaʻoʻiʻo ʻAberahama i ke Akua, a ua hoʻoili ʻia aʻe ia i pono nona»;” a ua kapa ʻia ihola ʻo ia he hoaaloha no ke Akua.

²⁴ Ke ʻike aʻe nei ʻoukou, ua hoʻāpono ʻia mai nō ke kanaka ma nā hana, ʻaʻole ma ka manaʻoʻiʻo wale nō.

²⁵ ʻAʻole anei i hoʻāpono ʻia ʻo Rahaba ka wahine hoʻokamakama ma ka hana ʻana i ka wā āna i hoʻokipa ai i nā ʻelele, a hoʻouna akula ma ke ala ʻē?

²⁶ ʻOiaʻiʻo nō, ʻo ke kino ʻuhane ʻole, ua make nō ia, pēlā hoʻi ka manaʻoʻiʻo hana ʻole, ua make nō ia.