IONA 4 - Ka Baibala Hemolele

1 Huhū ʻo Iona no ke aloha o ke Akua i ko Nineva, noi aku i ke Akua e make ia.

MOKUNA IV.

¹ ¶ A he mea hewa nui ia iā Iona, a huhū ihola ia.

² A pule akula nō ia iā Iēhova, ʻī akula, “Ke noi aku nei au iā ʻoe, e Iēhova, ʻaʻole anei kēia kuʻu ʻōlelo, i kuʻu noho ʻana ma koʻu ʻāina? No laila i holo aku ai au ma mua i Taresisa; no ka mea, ua ʻike nō au he Akua ahonui ʻoe, a me ke aloha, e hākālia ana i ka huhū, a he lokomaikaʻi nui, a me ka haʻalele i ka manaʻo hoʻopaʻi.

³ “ʻĀnō hoʻi, e Iēhova, ke noi aku nei au iā ʻoe, e lawe ʻoe i kuʻu ola mai oʻu aku lā; no ka mea, ua ʻoi ka maikaʻi o kuʻu make ma mua o ke ola.”

⁴ A ʻōlelo mai ʻo Iēhova, “He pono anei nou ka huhū?”

⁵ ¶ A hele akula ʻo Iona i waho o ke kūlanakauhale, a noho ihola ma ka hikina o ke kūlanakauhale, a hana ihola i laila i wahi lānai nona, a noho ihola ma lalo o kona malu, i ʻike aku ia i ka mea e hana ʻia ma ke kūlanakauhale.

⁶ A hoʻomākaukau ʻo Iēhova ke Akua i lāʻau ʻaila, a hoʻoulu aʻela ia mea ma luna o Iona, i lilo ia i wahi malumalu o kona poʻo, e hoʻopakele iā ia mai kona mea kaumaha. A ʻoliʻoli nui ʻo Iona i ka lāʻau ʻaila.

⁷ A hoʻomākaukau ke Akua i wahi ʻenuhe i ka wanaʻao i ka lā ʻapōpō, a ʻai ihola ia i ka lāʻau ʻaila, a mae ihola ia.

⁸ A i ka wā i puka mai ai ka lā, hoʻomākaukau ke Akua i makani hikina wela; a kau ka lā ma luna o ke poʻo o Iona, a maʻule ihola ia, a manaʻo ihola i loko ona e make, a ʻī ihola, “Ua ʻoi ka maikaʻi o kuʻu make ma mua o ke ola.”

⁹ ¶ A ʻōlelo maila ke Akua iā Iona, “He pono anei kou huhū no ka lāʻau ʻaila?” A ʻī akula ia, “He pono koʻu huhū a i ka make.”

¹⁰ A ʻōlelo mai ʻo Iēhova, “Ua minamina anei ʻoe i ka lāʻau ʻaila, ka mea ʻaʻole ʻoe i luhi, ʻaʻole hoʻi ʻoe i hoʻoulu; kupu mai nō ia i ka pō hoʻokahi, a make ihola i ka pō hoʻokahi.

¹¹ “ʻAʻole anei he pono koʻu minamina ʻana iā Nineva, ke kūlanakauhale nui, i loko ona he lehulehu, hoʻokahi haneri a me ka iwakālua nā tausani a keu aku, ka poʻe ʻike ʻole i waena o ka lima ʻākau a me ka lima hema; a ua nui loa hoʻi nā holoholona?”