IONA 3 - Ka Baibala Hemolele

1 Hele aku ʻo Iona i Nineva ma ka ʻōlelo a Iēhova, a hōʻike aku i ko lākou make. 5 Manaʻoʻiʻo ko Nineva i ka ʻōlelo, a hoʻokē ʻai, pule, a huli, a manaʻo i ka lokomaikaʻi o ke Akua.

MOKUNA III.

¹ ¶ A hiki hou mai ka ʻōlelo a Iēhova iā Iona, ʻī maila,

² “E kū i luna, a hele i Nineva, i kēlā kūlanakauhale nui, a e haʻi aku iā ia i ka ʻōlelo aʻu i kauoha aku ai iā ʻoe.”

³ A kū aʻela ʻo Iona, a hele aku i Nineva, e like me ka ʻōlelo a Iēhova. A ʻo Nineva he kūlanakauhale nui loa ia, ʻekolu lā o ka hele ʻana.

⁴ A hoʻomaka ihola ʻo Iona e komo i ke kūlanakauhale, hoʻokahi lā hele, a kāhea aku ia, ʻī akula, “Hoʻokahi kanahā nā lā i koe, a e luku ʻia ʻo Nineva.”

⁵ ¶ A manaʻoʻiʻo akula nā kānaka o Nineva i ke Akua, a haʻi aku i ka hoʻokē ʻai, a hoʻokomo lākou i ke kapa ʻinoʻino, mai ka mea nui o lākou a ka mea ʻuʻuku o lākou.

⁶ A hiki ka ʻōlelo i ke aliʻi o Nineva, a kū aʻela ia mai kona noho aliʻi aʻe, a waiho akula i kona kapa aliʻi mai ona aku lā, a komo ihola i ke kapa ʻinoʻino, a noho ihola ma ka lehu.

⁷ A kēnā akula ia e haʻi aku a e ʻōlelo aku i loko o Nineva ma ke kauoha a ke aliʻi, a me kona poʻe aliʻi, ʻī akula, “Mai ʻai ke kanaka i kekahi mea, ʻaʻole nā holoholona, ʻo ka poʻe bipi a me ka poʻe hipa; mai ʻai lākou, ʻaʻole hoʻi e inu i ka wai.

⁸ “A e hoʻūhi ʻia nā kānaka, a me nā holoholona i ke kapa ʻinoʻino, a kāhea ikaika aku lākou i ke Akua; a e huli mai kēlā kanaka kēia kanaka mai kona ʻaoʻao hewa mai, a mai ka hana ʻino mai, ka mea ma loko o ko lākou lima.

⁹ “ʻO wai ka mea e ʻike, e huli aʻe paha a e mihi ke Akua, a e huli aʻe, mai ka huhū o kona inaina mai, i luku ʻole ʻia kākou?”

¹⁰ ¶ A ʻike mai ke Akua i kā lākou hana ʻana, ua huli lākou mai ko lākou ʻaoʻao hewa mai; mihi ihola ke Akua no ka ʻino āna i ʻōlelo ai e hana mai iā lākou, ʻaʻole ia i hana mai.