IONA 2 - Ka Baibala Hemolele

1 Ka pule a Iona. 10 Luaʻi ka iʻa iā Iona ma luna o ka ʻāina maloʻo.

MOKUNA II.

¹ ¶ A pule akula ʻo Iona iā Iēhova i kona Akua mai ka ʻōpū aku o ka iʻa,

² a ʻī akula, “Ua kāhea aku au, mai koʻu wahi pilikia, iā Iēhova, a hoʻolohe mai ia iaʻu. Mai ka ʻōpū o ka pō i kāhea aku ai au, a hoʻolohe mai ʻoe i kuʻu leo.

³ “No ka mea, ua kiola aku ʻoe iaʻu i ka hohonu, i waenakonu o ke kai; Ua hoʻopuni ʻia au e ke kai; ʻO kou mau nalu a pau, a me kou mau ʻale, ua kaʻa ihola ia ma luna oʻu.

⁴ “A laila, ʻī ihola au, ‘Ua hoʻolei ʻia aku au mai kou alo aku, Akā, e nānā hou aku au i kou luakini hoʻāno.’

⁵ “Ua hoʻopuni nā wai iaʻu, a i ke ola, Ua hoʻopuni ka hohonu iaʻu; Ua kāʻei ʻia koʻu poʻo i ka limu.

⁶ “Iho ihola au i lalo i nā kumu o nā mauna; Ua pōʻai mau ʻia au e ka honua, a me kona mau kaola, Akā, ua lawe mai ʻoe i kuʻu ola mai ka lua mai, e Iēhova kuʻu Akua.

⁷ “I ka wā i maʻule ai kuʻu ʻuhane i loko oʻu, Hoʻomanaʻo ihola au iā Iēhova; A hele aʻela kaʻu pule i ou lā I kou luakini hoʻāno.

⁸ “ʻO nā mea mālama i nā mea lapuwale, Ua haʻalele lākou i ko lākou pōmaikaʻi.

⁹ “Akā, e mōhai aku au iā ʻoe Me ka leo hoʻomaikaʻi; E hoʻokō aku au i ka mea aʻu i hoʻohiki ai. No Iēhova mai ke ola.”

¹⁰ ¶ A ʻōlelo mai ʻo Iēhova i ka iʻa, a luaʻi aku ia iā Iona i ka ʻāina maloʻo.