IONA 1 - Ka Baibala Hemolele

1 Kauoha a ke Akua iā Iona e hele, e ʻōlelo aku i ko Nineva. 3 Holo aku ia i Taresisa, a loʻohia ʻo ia e ka ʻino. 11 Kiola ʻia ʻo ia i ke kai, a ale ʻia e ka iʻa.

MOKUNA I.

¹ ¶ A hiki mai ka ʻōlelo a Iēhova iā Iona, ke keiki a ʻAmitai, ʻī maila,

² “E kū ʻoe, e hele i Nineva, i kēlā kūlanakauhale nui, e kāhea aku iā ia; no ka mea, ua piʻi mai ko lākou hewa i mua oʻu.”

³ Akā, kū aʻela ʻo Iona e holo i Taresisa, mai ke alo aku o Iēhova, a iho akula i Iopa; a loaʻa iā ia ka moku e holo ana i Taresisa; a hāʻawi aku ia i ka uku, a komo ihola ia i loko ona e holo pū me lākou i Taresisa mai ke alo aku o Iēhova.

⁴ ¶ A hoʻouna mai ʻo Iēhova i ka makani nui ma ke kai, a he ʻino nui ma ke kai, a ʻaneʻane nāhāhā ka moku.

⁵ A laila, makaʻu ihola nā hoʻoholo moku, a kāhea aku kēlā kanaka kēia kanaka i kona akua, a hoʻolei i ka waiwai ma ka moku i loko o ke kai, e hoʻomana i ka moku no ia mau mea. A ua iho ʻo Iona i lalo i ka ʻaoʻao hope o ka moku, a moe iho, a ua paʻuhia i ka hiamoe.

⁶ A hele aku ke kahu moku iā ia, a ʻī akula iā ia, “He aha kāu, e ka mea hiamoe? E ala, e hea aku i kou Akua, malia paha e manaʻo mai ke Akua iā kākou i make ʻole ai kākou.”

⁷ A ʻōlelo aʻela lākou, kēlā mea kēia mea i kona hoa, “Inā kākou e hailona, i ʻike ai kākou i ka mea nona i hiki mai ai kēia ʻino ma luna o kākou.” A hailona lākou, a lilo ka hailona no Iona.

⁸ A laila, ʻī akula lākou iā ia, “Ke noi aku nei mākou, e haʻi mai ʻoe iā mākou i ka mea nona i hiki mai ai kēia ʻino ma luna o kākou? He aha kāu ʻoihana? Mai hea mai ʻoe? ʻO wai kou ʻāina? A no ka lāhui kanaka hea ʻoe?”

⁹ ʻĪ maila ʻo ia iā lākou, “He Hebera nō wau; a ke makaʻu nei au iā Iēhova ke Akua o ka lani, nāna i hana ke kai, a me ka ʻāina maloʻo.”

¹⁰ ¶ A laila, makaʻu ihola nā kānaka i ka makaʻu nui, a ʻī akula iā ia, “No ke aha lā ʻoe i hana mai ai i kēia?” No ka mea, ua ʻike nā kānaka, ua holo ia mai ke alo aku o Iēhova; no ka mea, ua haʻi mai kēlā iā lākou.

¹¹ A laila, ʻī akula lākou iā ia, “He aha kā mākou e hana aku ai iā ʻoe, i mālie iho ai ke kai no kākou?” No ka mea, ua nui aʻe ka ʻinoʻino o ke kai.

¹² A ʻī maila kēlā iā lākou, “E lawe ʻoukou iaʻu, a e kiola iaʻu i loko o ke kai, a e mālie iho ke kai iā ʻoukou; no ka mea, ua ʻike au, noʻu nei i hiki mai ai kēia ʻino nui ma luna o ʻoukou.”

¹³ A hoe ikaika akula nā kānaka e hoʻopae i ka ʻāina; ʻaʻole lākou e hiki; no ka mea, ua nui aʻe ka ʻinoʻino o ke kai iā lākou.

¹⁴ No ia mea, kāhea akula lākou iā Iēhova, ʻī akula, “Ke noi aku nei mākou iā ʻoe, e Iēhova, ke noi aku nei mākou, mai luku ʻia mākou no ke ola o kēia kanaka, a mai hoʻopaʻi iā mākou i ke koko hala ʻole; no ka mea, ua hana mai ʻoe, e Iēhova, e like me kou makemake.”

¹⁵ ¶ No laila, kaʻikaʻi aʻela lākou iā Iona, a kiola akula iā ia i loko o ke kai; e mālie ihola ke kai mai kona kūpikipikiʻō ʻana.

¹⁶ A laila, makaʻu nui loa ihola nā kānaka iā Iēhova, a kaumaha aku lākou i mōhai iā Iēhova, a hoʻohiki i nā hoʻohiki ʻana.

¹⁷ ¶ A ua hoʻomākaukau ʻo Iēhova i iʻa nui e ale iho iā Iona. A ʻekolu ao, a ʻekolu pō ʻo Iona i loko o ka ʻōpū o ka iʻa.