IOʻELA 3 - Ka Baibala Hemolele

1 He mau wānana no ka hoʻopaʻi ʻana i nā ʻenemi o ko ke Akua poʻe kānaka. 16 No ke kuʻikahi, no ka pōmaikaʻi, no ka malu, a no ka maʻemaʻe o kā ʻIseraʻela ma hope aku.

MOKUNA III.

¹ ¶ “No ka mea, aia hoʻi, i kēlā mau lā, a i kēlā manawa, I ka wā e hoʻi hou mai ai au i ka pio ʻana o kā Iuda, a me ko Ierusalema,

² “E hoʻākoakoa hoʻi au i nā lāhui kanaka a pau, A e lawe mai iā lākou i lalo i ke awāwa ʻo Iehosapata, A e hoʻokolokolo au me lākou no kuʻu poʻe kānaka, A no kuʻu hoʻoilina, no kā ʻIseraʻela, Ka poʻe a lākou i hoʻopuehu aku ai i waena o nā lāhui kanaka, A i puʻunaue hoʻi i kuʻu ʻāina.

³ “A ua hailona lākou no kuʻu poʻe kānaka; Ua hāʻawi lākou i keiki kāne no ka wahine moekolohe, A kūʻai aku i kaikamahine no ka waina, i inu ai lākou.

⁴ “A he aha hoʻi kā ʻoukou iaʻu, e Turo, a me Zidona, a me nā palena a pau o Pilisetia? E hoʻihoʻi mai anei ʻoukou i ka uku iaʻu? Inā e hoʻihoʻi mai ʻoukou i ka uku iaʻu, ʻo wau nō kekahi e hoʻihoʻi koke loa aku i ko ʻoukou uku ma luna o ko ʻoukou poʻo.

⁵ “No ka mea, ua lawe aku ʻoukou i kuʻu kālā, a me kuʻu gula, a ua hali aku ʻoukou i kuʻu mau mea makamae i loko o ko ʻoukou mau luakini.

⁶ “A ʻo nā keiki a Iuda, a me ko Ierusalema kā ʻoukou i kūʻai aku i ka poʻe Helene, i hali lōʻihi aku iā lākou mai ko lākou palena aku.

⁷ “Aia hoʻi, e hoʻāla mai au iā lākou mai kahi a ʻoukou i kūʻai aku ai iā lākou, a e hoʻihoʻi aku au i ko ʻoukou uku ma luna o ko ʻoukou poʻo.

⁸ “A e kūʻai aku au i kā ʻoukou poʻe kaikamāhine, a i kā ʻoukou poʻe keiki kāne i ka lima o nā keiki a Iuda, a ʻo lākou hoʻi e kūʻai aku iā lākou lā i nā Seba, i ka lāhui kanaka mamao aku”; no ka mea, ʻo ia kā Iēhova i ʻōlelo mai.

⁹ ¶ E haʻi aku ʻoukou i kēia i waena o nā lāhui kanaka; E hoʻomākaukau ʻoukou no ke kaua, E hoʻāla mai i ka poʻe ikaika, E hoʻokokoke mai nā kānaka kaua a pau; E piʻi mai lākou.

¹⁰ E kuʻi ʻoukou i ko ʻoukou mau ʻōʻō palau i pahi kaua, A i kā ʻoukou mau pahi paʻipaʻi i mau ihe; A e ʻōlelo iho ka mea nāwaliwali, “Ua ikaika wau.”

¹¹ E ʻākoakoa ʻoukou, e hele mai, e nā lāhui kanaka a pau, E hoʻākoakoa ʻia ʻoukou a puni; I laila hoʻi ʻoe, e Iēhova, e hoʻīho i lalo i kou poʻe ikaika.

¹² E hoʻāla ʻia nā lāhui kanaka, A e piʻi mai i ke awāwa ʻo Iehosapata; No ka mea, ma laila wau e noho iho ai, e hoʻoponopono i nā lāhui kanaka a pau e puni ana.

¹³ E hoʻokomo ʻoukou i ka pahi kākiwi, No ka mea, ua oʻo ka ʻai; E hele mai ʻoukou, e iho i lalo; No ka mea, ua piha ke kaomi waina, ua piha a hū i waho nā waihona waina; No ka mea, ua nui ko lākou hewa.

¹⁴ Nui ka poʻe, he nui ka poʻe ma ke awāwa o ka hoʻopaʻi ʻana; No ka mea, ua kokoke ka lā o Iēhova ma ke awāwa o ka hoʻopaʻi ʻana.

¹⁵ E pouli ka lā a me ka mahina, A e hoʻonalowale nā hōkū i ko lākou mālamalama.

¹⁶ E uō mai ʻo Iēhova mai Ziona mai, A e hoʻopuka mai i kona leo mai Ierusalema mai; A e haʻalulu ka lani a me ka honua; A ʻo Iēhova ka puʻuhonua no kona poʻe kānaka, A me kahi paʻa no nā mamo a ʻIseraʻela.

¹⁷ Pēlā e ʻike ai ʻoukou, ʻo wau nō ʻo Iēhova ko ʻoukou Akua, E noho ana ma Ziona, kuʻu mauna hoʻāno; A e lilo ʻo Ierusalema i hemolele, ʻAʻole e hele hou nā malihini ma waena ona.

¹⁸ ¶ A i kēlā lā e hoʻokulu nā mauna i ka waina hou, A e hoʻokahe mai nā puʻu i ka waiū, A e kahe ka wai ma nā kahawai a pau o Iuda, A e puapuaʻi mai ka wai puna mai ka hale o Iēhova mai, A e kahe aku ka wai ma ke awāwa ʻo Sitima.

¹⁹ A e lilo ʻo ʻAigupita i neoneo, A ʻo ʻEdoma i wao nahele neoneo, no ka hana ʻino ʻia ʻo nā mamo a Iuda, No ka mea, ua hoʻokahe lākou i ke koko hala ʻole i loko o ko lākou ʻāina.

²⁰ Akā, e noho mau loa ana ʻo kā Iuda, A ʻo ko Ierusalema ia hanauna aku, ia hanauna aku.

²¹ No ka mea, e huikala aku au i ko lākou koko, aʻu i huikala ʻole aku ai; A e noho ana ʻo Iēhova ma Ziona.