IOʻELA 1 - Ka Baibala Hemolele

1 Hōʻike mai ke kāula i nā mea e pau ai nā hua o ka ʻāina. 8 Kauoha mai i nā kānaka e auē, e pule, e hoʻokē ʻai. 18 Kāhea aku nō ia iā Iēhova no lākou.

MOKUNA I.

¹ ¶ ʻO ka ʻōlelo a Iēhova iā Ioʻela ke keiki a Petuʻela:

² E hoʻolohe ʻoukou i kēia, e ka poʻe kahiko, E hāliu mai ka pepeiao, e ka poʻe a pau o ka ʻāina e noho ana; Ua hiki mai anei kēia i ko ʻoukou mau lā, A i nā lā hoʻi o ko ʻoukou mau mākua?

³ E haʻi aku ʻoukou i kēia i kā ʻoukou poʻe keiki, A ʻo kā ʻoukou mau keiki i kā lākou poʻe keiki, A ʻo kā lākou mau keiki i ka hanauna ma hope.

⁴ ¶ ʻO ka mea i koe i ka ʻūhini hulu ʻole, ua pau ia i ka ʻūhini; A ʻo ka mea i koe i ka ʻūhini, ua pau ia i ka ʻūhini huluhulu, A ʻo ka mea i koe i ka ʻūhini huluhulu, ua pau ia i ka ʻūhini hulu ʻole.

⁵ E ala ʻoukou, e nā mea ʻona, a e uē iho; E ʻaoa hoʻi, e nā mea inu waina a pau, no ka waina hou; No ka mea, ua lawe ʻia aku ia mai ko ʻoukou waha aku.

⁶ No ka mea, ua hele mai ka lāhui kanaka ma luna o koʻu ʻāina, He ikaika, ʻaʻole e pau i ka helu, ʻO kona mau niho, he niho o ka liona; A ʻo kona niho ʻaoʻao, he niho o ka liona wahine.

⁷ Ua luku aku ia i kuʻu kumu waina, A ua hemo i ka ʻili o kuʻu lāʻau fiku; Ua hemo i kona ʻili a pau, a ua hoʻolei aku ia mea; Ua keʻokeʻo kona mau lālā.

⁸ ¶ E uē iho e like me ka wahine mare i kāʻei ʻia i ke kapa ʻinoʻino No ke kāne o kona wā ʻōpiopio.

⁹ Ua ʻoki ʻia ka mōhai makana, a me ka mōhai inu mai ka hale o Iēhova aku; Ua uē nā kāhuna, nā lawehana a Iēhova.

¹⁰ Ua luku ʻia ka mahina ʻai, Ua uē ka ʻāina; No ka mea, ua luku ʻia ka ʻai, Ua maloʻo ka waina hou, ua emi iho ka ʻaila.

¹¹ E hilahila ʻoukou, e nā mahi ʻai; E ʻaoa ʻoukou, e nā mahi waina, no ka huapalaoa, a no ka bale; No ka mea, ua nele ka ʻohi ʻai ʻana o ka mahina ʻai.

¹² Ua maloʻo ke kumu waina, Ua mae ka lāʻau fiku; Ua mae ka lāʻau pomagerane, ʻo ka lāʻau pāma, a me ka lāʻau ʻōhiʻa, ʻo nā lāʻau a pau o ke kula; No ka mea, ua pau ka ʻoliʻoli o nā keiki a kānaka;

¹³ ¶ E kāʻei iā ʻoukou iho, a e kanikau, e nā kahuna; E ʻaoa ʻoukou, e nā lawehana o ke kuahu; E hele mai, e noho a ao ka pō i loko o ke kapa ʻinoʻino, e nā lawehana a kuʻu Akua; No ka mea, ua hoʻōki ʻia ka mōhai makana, a me ka mōhai inu mai ka hale aku o ko ʻoukou Akua.

¹⁴ E hoʻolaʻa i ka hoʻokē ʻai ʻana, E kāhea aku i ka hālāwai, E hoʻākoakoa i ka poʻe kahiko, I nā kānaka a pau o ka ʻāina, ma ka hale o Iēhova ko ʻoukou Akua, A e hea aku iā Iēhova.

¹⁵ Auē no ka lā! No ka mea, ua kokoke mai ka lā o Iēhova, A me he make lā e hiki mai ai ia mai ka Mea Mana mai.

¹⁶ ʻAʻole anei i ʻoki ʻia ka ai i mua o ko kākou maka? ʻO ka ʻoliʻoli a me ka hauʻoli mai ka hale aku o ko kākou Akua?

¹⁷ Ua popopo nā hua ma lalo iho o ko lākou lepo, Ua wāwahi ʻia nā hale papaʻa, Ua hoʻohiolo ʻia nā hale ʻai; No ka mea, ua maloʻo ka ʻai.

¹⁸ Nani ka ʻū ʻana o nā holoholona! Ua pilikia nā kumu bipi; No ka mea, ʻaʻohe ʻai na lākou; Ua hoʻopau ʻia hoʻi nā kumu hipa.

¹⁹ E Iēhova, iā ʻoe nō wau e kāhea aku nei; No ka mea, ua ʻai ke ahi i ka uliuli o ka wao nahele, Ua hoʻopau ka lapalapa ahi i nā lāʻau a pau o ke kula.

²⁰ Ke auē aku nei nā holoholona o ke kula iā ʻoe; No ka mea, ua maloʻo nā wai o nā kahawai, A ua pau i ke ahi ka uliuli o ka wao nahele.