HOSEA 9 - Ka Baibala Hemolele

1 ʻO ka hoʻākāka ʻana i nā mea ʻino he nui e hiki mai ana ma luna o kā ʻIseraʻela, no ka nui loa o ko lākou hana hewa ʻana.

MOKUNA IX.

¹ ¶ Mai hauʻoli, e kā ʻIseraʻela, me ka ʻoliʻoli, e like me nā lāhui kanaka; No ka mea, ua hele moekolohe aku ʻoe mai kou Akua aku, Ua makemake aku ʻoe i nā makana ma nā kahua hehi palaoa a pau.

² ʻO ke kahua, a me kahi kaomi waina, ʻaʻole e hānai lāua iā lākou, A e pau auaneʻi ka waina hou i loko ona.

³ ʻAʻole lākou e noho ma ka ʻāina o Iēhova; Akā, e hoʻi hou ʻo ʻEperaima i ʻAigupita; A e ʻai lākou i nā mea haumia ma ʻAsuria.

⁴ ʻAʻole lākou e kaumaha aku i ka waina iā Iēhova, ʻAʻole ia e ʻoluʻolu mai ia mau mea. ʻO kā lākou mau mōhai, e like auaneʻi iā lākou me ka berena o ka poʻe e kanikau ana; ʻO ka poʻe a pau e ʻai iho ia mea e haumia lākou; No ka mea, ʻo kā lākou berena no ko lākou ola, ʻaʻole e lawe ʻia ʻo ia i loko o ka hale o Iēhova.

⁵ He aha lā auaneʻi kā ʻoukou e hana ai i ka lā ʻahaʻaina, A i ka lā ʻahaʻaina a Iēhova?

⁶ No ka mea, aia hoʻi, ua hele aku lākou mai ka luku aku; E hoʻākoakoa ʻo ʻAigupita iā lākou, E kanu aku nō ʻo Memepi iā lākou. A ʻo nā wahi maikaʻi i kūʻai ʻia no ko lākou kālā e paʻapū ia i ka pua kala; A ma loko o ko lākou mau halelewa e kupu ka lāʻau ʻoʻoi.

⁷ ¶ Ua hiki mai nā lā o ka hoʻopaʻi ʻana, Ua hiki mai nā lā o ka uku ʻana; E ʻike auaneʻi kā ʻIseraʻela; Ua naʻaupō ke kāula, a ua hehena ke kanaka kilokilo ʻuhane, no ka hoʻonui ʻia o kou hewa, a me ka nui o ka inaina.

⁸ E kali ana ʻo ʻEperaima i ke kōkua, mai koʻu Akua mai; ʻO ke kāula, he punihei ia ʻo ka mea punihei manu ma kona ʻaoʻao a pau, A he mea inaina ma ka hale o ke Akua.

⁹ Ua hana hewa nui lākou e like me nā lā o Gibea; No laila, e hoʻomanaʻo mai ia i ko lākou hala, A e hoʻopaʻi mai hoʻi i ko lākou mau hewa.

¹⁰ ¶ Ua loaʻa iaʻu kā ʻIseraʻela e like me nā hua waina ma ka wao nahele; Ua ʻike au i ko ʻoukou poʻe kūpuna, e like me ka hua mua ma ka lāʻau fiku i kona hua mua ʻana; Akā, hele akula lākou iā Baʻala Peora, a hoʻokaʻawale iā lākou iho no ka mea hilahila; A ʻo nā mea hoʻowahāwahā ʻia, ua like me ko lākou makemake.

¹¹ A no kā ʻEperaima, e lele aku auaneʻi ko lākou nani me he manu lā, mai ka hānau ʻana mai, mai ka ʻōpū mai, a mai ka hāpai ʻana mai.

¹² Inā paha e hānai lākou i nā keiki a lākou, E hoʻonele aku au iā lākou ma waena aku o kānaka; A he pōʻino ko lākou i ka wā aʻu e haʻalele ai iā lākou!

¹³ ʻO ʻEperaima, e like me koʻu ʻike ʻana ma Turo, ua kanu ʻia ʻo ia ma kahi maikaʻi; Akā, e alakaʻi aku ʻo ʻEperaima i kāna poʻe keiki no ka mea pepehi.

¹⁴ E Iēhova, e hāʻawi aku ʻoe iā lākou i ka mea āu e hāʻawi aku ai; E hāʻawi aku iā lākou i ka ʻōpū hānau hapa wale, a me nā ū maloʻo.

¹⁵ ¶ ʻO ko lākou hewa a pau, aia ma Gilegala; No ka mea, ma laila au i inaina aku ai iā lākou; No ka hewa o kā lākou hana ʻana e kipaku aku ai au iā lākou mai koʻu hale aku, ʻAʻole au e aloha hou aku iā lākou; A ʻo ko lākou mau aliʻi, he poʻe kipi lākou!

¹⁶ Ua hahau ʻia ʻo ʻEperaima, Ua maloʻo ko lākou aʻa; ʻAʻole lākou e hua mai ka hua; A inā e hānau mai lākou, E pepehi nō au i nā mea aloha o ko lākou ʻōpū.

¹⁷ E kipaku auaneʻi kuʻu Akua iā lākou, No ka mea, ʻaʻole lākou i hoʻolohe iā ia; A e lilo lākou i poʻe ʻaeʻa ma waena o nā lāhui kanaka.