HOSEA 8 - Ka Baibala Hemolele

1 Hoʻākāka ʻia mai ka hoʻomana kiʻi o kā ʻIseraʻela, a me ko lākou hoʻokamani, a me ke kipi, a me ka hoʻopaʻi ʻana.

MOKUNA VIII.

¹ ¶ E kau i ka pū ma kou waha, Me he ʻaeto lā e hele kūʻē mai i ka hale o Iēhova; No ka mea, ua haʻi iā lākou kuʻu berita, A ua ʻae lākou ma luna o koʻu kānāwai.

² E kāhea mai auaneʻi kā ʻIseraʻela iaʻu, E kuʻu Akua, ua ʻike mākou iā ʻoe.

³ Ua haʻalele kā ʻIseraʻela i ka mea maikaʻi; E hahai auaneʻi ka ʻenemi iā ia.

⁴ Ua hoʻāliʻi lākou i nā aliʻi, ʻaʻole ma oʻu nei; Ua hoʻonoho lākou i nā haku aʻu i ʻike ʻole ai; Ua hana lākou i ko lākou kālā, a me ko lākou gula i kiʻi no lākou, i mea e ʻoki ʻia aku ai lākou.

⁵ He mea hoʻopailua kou keiki bipi, e Samaria. “Ua hoʻaʻā ʻia kuʻu inaina iā lākou!” Pehea lā ka lōʻihi a loaʻa iā lākou ka maʻemaʻe?

⁶ No ka mea, na kā ʻIseraʻela kēia mea; Na ka paʻahana nō ia i hana; ʻAʻole ia he akua; No ka mea, e haki liʻiliʻi ʻia ke keiki bipi o Samaria.

⁷ No ka mea, ua lūlū lākou i ka makani, A e ʻohi auaneʻi lākou i ka puahiohio; ʻAʻohe kino o ka ʻai e kū ana; ʻAʻole hoʻi e hua mai ka ʻōpuʻu i ka huapalaoa: Inā paha e hua mai, na ka poʻe malihini e hoʻopau ia mea.

⁸ ¶ Ua hoʻopau ʻia kā ʻIseraʻela; A e like auaneʻi lākou i waena o ko nā ʻāina ʻē, me he ipu lā i makemake ʻole ʻia.

⁹ No ka mea, ua piʻi aʻela lākou i ʻAsuria, me he hoki hihiu, ʻo ia wale nō! Ua hoʻolimalima ʻo ʻEperaima i nā mea aloha.

¹⁰ Ua hoʻolimalima hoʻi lākou i waena o nā lāhui kanaka ʻē, ʻānō e hoʻākoakoa naʻe au iā lākou; A e auē iki lākou no ke kaumaha o ke aliʻi o nā haku.

¹¹ ¶ No ka mea, ua hoʻomāhuahua ʻo ʻEperaima i nā kuahu no ka hewa, A e lilo nā kuahu nona e hewa ai.

¹² Ua kākau aku au nona i nā mea nui o kuʻu kānāwai, Akā, ua manaʻo ʻia ua mau mea lā, me he mea ʻē lā.

¹³ I ke kaumaha ʻana i kuʻu mau mōhai, ua kaumaha aku lākou i ka ʻiʻo, a ʻai ihola; ʻAʻole i ʻoluʻolu ʻo Iēhova iā lākou; ʻĀnō e hoʻomanaʻo ʻo ia i ko lākou hala; A e hoʻopaʻi hoʻi i ko lākou hewa; A e hoʻi hou lākou i ʻAigupita.

¹⁴ No ka mea, ua hoʻopoina ʻo kā ʻIseraʻela i ka Mea nāna ia i hana, a ua hana aku i nā hale hoʻomana; A ua hoʻomāhuahua ʻo kā Iuda i nā kūlanakauhale i paʻa i ka pā pōhaku; A e hoʻouna aku au i ke ahi i loko o kona mau kūlanakauhale; A e ʻai aku ia i kona mau hale aliʻi.