HOSEA 7 - Ka Baibala Hemolele

1 Hōʻike mai i nā hewa nui o nā aliʻi a me nā kānaka. Hoʻākāka mai i ka mea a ke Akua i hana mai ai iā lākou.

MOKUNA VII.

¹ ¶ I ka wā aʻu e hoʻihoʻi aku ai i ke pio ʻana o kuʻu poʻe kānaka, I kuʻu hoʻōla ʻana i kā ʻIseraʻela, a laila hōʻike ʻia mai ka hewa o ʻEperaima, A me nā mea ʻino o ko Samaria; No ka mea, ua hana lākou i ka wahaheʻe; A komo mai ka ʻaihue ma loko, A hao wale ka poʻe pōā ma waho.

² ʻAʻole noʻonoʻo ko lākou naʻau i kuʻu hoʻomanaʻo ʻana i ko lākou hewa a pau; ʻĀnō, ua hoʻopuni kā lākou mau hana iā lākou; Eia nō lākou i mua o koʻu maka.

³ Ma ko lākou hewa hoʻoleʻaleʻa aku lākou i ke aliʻi, A i nā haku hoʻi ma ko lākou mau hoʻopunipuni.

⁴ He poʻe moekolohe lākou a pau, e like me ka umu i hōʻenaʻena ʻia e ka mea pūlehu palaoa, Hoʻopaneʻe ʻo ia i ka pūlehu ʻana, ma hope o ke kāwili ʻana i ka palaoa a hiki i ka wā e hū ai.

⁵ A i ka lā o ko kākou aliʻi loʻohia iho nā haku e ka maʻi i ka wela o ka waina, A ʻō akula ʻo ia i kona lima me ka poʻe haʻakei.

⁶ No ka mea, ua hoʻomākaukau lākou i ko lākou naʻau, E like me ka umu ma ko lākou hoʻohālua ʻana; Ua hiamoe ko lākou mau mea pūlehu palaoa, a ao ka pō; A i kakahiaka, ua wela ia mea e like me ke ahi lapalapa.

⁷ Ua wela lākou a pau e like me ka umu, Ua ʻai lākou i ko lākou mau luna kānāwai; Ua hāʻule ko lākou poʻe aliʻi a pau; ʻAʻohe mea e kāhea mai iaʻu i waena o lākou.

⁸ ¶ ʻO ʻEperaima, ua hui pū ʻia me nā kānaka ʻē; ʻO ʻEperaima, he pōpō palaoa nō ia, ʻaʻole i huli ʻia.

⁹ Ua ʻai nā malihini i kona ikaika, ʻaʻole naʻe ia i ʻike; Ua kau mai nō hoʻi ke oho hina ma luna ona, ʻaʻole naʻe ia i ʻike.

¹⁰ Ke hōʻike mai nei ka haʻaheo o kā ʻIseraʻela ma kona maka; ʻAʻole lākou e hoʻi hou iā Iēhova i ko lākou Akua, ʻAʻole ʻimi aku iā ia no kēia mea a pau.

¹¹ Ua like hoʻi ʻo ʻEperaima me he manu nūnū lā i hāwāwā, ʻaʻohe ona manaʻo; Kāhea aku lākou i ko ʻAigupita, A hele lākou i ko ʻAsuria.

¹² A i ka wā e hele ai lākou, e hohola aku au i kaʻu ʻupena ma luna o lākou; A e lawe mai au iā lākou i lalo, e like me nā manu o ka lewa; A e hahau aku au iā lākou, e like me ka mea a ko lākou ʻaha kanaka i lohe ai.

¹³ E auē lākou! No ka mea, ua ʻauana lākou mai oʻu aku lā; ʻO ka make ko lākou! No ka mea, ua kipi mai lākou iaʻu; ʻO wau kai hoʻōla iā lākou, A ʻo lākou kai ʻōlelo wahaheʻe mai iaʻu.

¹⁴ ʻAʻole lākou i auē mai iaʻu me ko lākou naʻau, i ka wā a lākou i auē ai ma luna o ko lākou wahi moe: Ua hoʻākoakoa lākou iā lākou iho no ka ʻai, a no ka waina hou, a ua kipi mai lākou iaʻu.

¹⁵ Iaʻu i aʻo ai iā lākou, a hoʻoikaika aku ai i ko lākou mau lima, Akā, ke manaʻo hewa mai nei lākou iaʻu.

¹⁶ Ua hoʻi hou lākou, ʻaʻole naʻe i ka Mea Kiʻekiʻe Loa; Ua like lākou me he kakaka hewa lā; E hāʻule nā aliʻi o lākou me ka pahi kaua, no ka hoʻokano o ko lākou alelo; ʻO kēia ko lākou hōʻino ma ka ʻāina ʻo ʻAigupita.