HOSEA 6 - Ka Baibala Hemolele

1 ʻO ke aʻo ʻana e mihi, a e manaʻolana ma ke Akua.

MOKUNA VI.

¹ ¶ “Inā kākou e hoʻi hou aku iā Iēhova; No ka mea, ua haehae mai kēlā, a e hoʻōla mai ia iā kākou; Ua hahau mai ia, a e hoʻōla mai nō ʻo ia iā kākou.

² “Ma hope o nā lā ʻelua e hoʻōla mai ia iā kākou; I ke kolu o ka lā e hoʻokū mai ia iā kākou i luna, A e ola kākou i mua ona.

³ “A laila e ʻike kākou, ke hahai kākou e ʻike iā Iēhova; Ua mākaukau kona hele ʻana aku, e like me ka wanaʻao; A e hele mai ia iā kākou e like me ka ua; E like me ke kuāua mua, a me ke kuāua hope ma luna o ka honua.”

⁴ ¶ E ʻEperaima, he aha kaʻu e hana aku ai iā ʻoe? E Iuda, he aha kaʻu e hana aku ai iā ʻoe? No ka mea, ʻo kā ʻoukou pono, ua like me ke ao kakahiaka, A ua like me ka hau e nalo koke ana.

⁵ No ia mea, ua kālai aku au iā lākou ma nā kāula; Ua pepehi aku au iā lākou ma nā ʻōlelo a kuʻu waha; A e puka aku kou hoʻohewa ʻia e like me ka mālamalama.

⁶ No ka mea, ʻo ke aloha koʻu makemake, ʻaʻole ka mōhai; A ʻo ka ʻike i ke Akua ma mua o nā mōhai kuni.

⁷ Akā, e like me kānaka, ua haʻi iā lākou ka berita; I laila ua hana hoʻopunipuni mai lākou iaʻu.

⁸ ʻO Gileada ke kūlanakauhale o ka poʻe hana hewa, I hahi ʻia i nā kapuaʻi koko.

⁹ E like me ka poʻe hao wale e hoʻohālua ana i ke kanaka; Pēlā nō ka poʻe kāhuna i pepehi wale ma ke ala o Sekema; No ka mea, ke hana nei lākou i ka mea ʻino.

¹⁰ Ma loko o ka ʻohana a ʻIseraʻela ua ʻike au i ka mea weliweli; Ma laila ka moekolohe o ʻEperaima, Ua haumia kā ʻIseraʻela.

¹¹ Nou hoʻi, e kā Iuda, ua mākaukau ka ʻohi ʻai ʻana.