HOSEA 4 - Ka Baibala Hemolele

1 Hoʻohewa mai ke Akua i kā ʻIseraʻela no ko lākou hewa.

MOKUNA IV.

¹ ¶ E hoʻolohe ʻoukou, e nā mamo a ʻIseraʻela, i ka ʻōlelo a Iēhova; No ka mea, he hakakā ko Iēhova me nā kānaka o ka ʻāina; No ka mea, ʻaʻohe ʻoiaʻiʻo, ʻaʻohe aloha, ʻAʻohe ʻike i ke Akua ma ka ʻāina.

² ʻO ka hoʻohiki ʻino, ka hoʻopunipuni, ka pepehi kanaka, ka ʻaihue, a me ka moekolohe, Kā lākou i hoʻomāhuahua aʻe ai, a pili aku nō ke koko i ke koko.

³ No ia mea, e kanikau auaneʻi ka ʻāina, A e nāwaliwali nā mea a pau e noho ana ma luna ona, Me nā holoholona o ke kula, a me nā manu o ka lewa; ʻO ia, e lawe ʻia aku hoʻi nā iʻa o ke kai.

⁴ ¶ Akā, mai hakakā kekahi kanaka, ʻaʻole hoʻi e pāpā aku iā haʻi; No ka mea, ʻo kou poʻe kānaka, ua like lākou me ka poʻe e hakakā ana me ke kahuna.

⁵ No laila e hina ʻoe i ke ao, ʻO ke kāula hoʻi, e hina pū ia me ʻoe i ka pō; A e luku aku au i kou makuahine.

⁶ Ua luku ʻia koʻu poʻe kānaka no ka ʻike ʻole; No ka mea, ua hoʻowahāwahā ʻoe i ka ʻike, E hoʻowahāwahā aku hoʻi au iā ʻoe, ʻAʻole ʻoe e mālama i ka ʻoihana kahuna naʻu: A no kou hoʻopoina ʻana i ke kānāwai o kou Akua, ʻO wau hoʻi kekahi e hoʻopoina i kāu poʻe keiki.

⁷ ¶ E like me ko lākou nui ʻana, pēlā lākou i hana hewa mai ai iaʻu; A e hoʻololi au i ko lākou nani i mea hilahila.

⁸ Ua ʻai lākou i ka hewa o kuʻu poʻe kānaka, A ua kau i ko lākou mau naʻau ma ko lākou lā hala.

⁹ A e like auaneʻi me nā kānaka, pēlā nō me ke kahuna; A e hoʻopaʻi aku au iā lākou e like me ko lākou mau ʻaoʻao, A e hoʻouku aku au iā lākou e like me kā lākou hana ʻana.

¹⁰ A e ʻai lākou, ʻaʻole naʻe e māʻona, A e moekolohe lākou, ʻaʻole naʻe e māhuahua aʻe; No ka mea, ua hoʻōki lākou i ka mālama iā Iēhova.

¹¹ ¶ ʻO ka moekolohe, ʻo ka waina, a me ka waina hou, ʻo ia ke lawe aku i ka naʻau.

¹² Ke nīnau nei kuʻu poʻe kānaka i ko lākou kiʻi lāʻau, A ua hōʻike mai ko lākou koʻokoʻo iā lākou; No ka mea, ua hoʻoʻauana ka naʻau moekolohe iā lākou; Ua hele moekolohe lākou mai lalo aʻe o ko lākou Akua.

¹³ Kaumaha akula lākou ma kahi kiʻekiʻe o nā mauna, A kuni i ka mea ʻala ma luna o nā puʻu, Ma lalo o ka lāʻau ʻoka, a me ka lāʻau popela, a me ka lāʻau kaʻa; No ka mea, ua ʻoluʻolu kona malumalu; No ia mea, e moekolohe kā ʻoukou poʻe kaikamāhine, A e moekolohe kā ʻoukou poʻe hūnōna wahine.

¹⁴ ʻAʻole au e hoʻopaʻi aku i kā ʻoukou poʻe kaikamāhine no ko lākou moekolohe ʻana, A i kā ʻoukou poʻe hūnōna wahine no ko lākou moekolohe ʻana; No ka mea, ua hoʻokaʻawale pū lākou iā lākou iho me nā wāhine hoʻokamakama, A ua mōhai pū lākou me nā wāhine moekolohe; A ʻo ka poʻe kānaka ʻike ʻole, e make nō lākou.

¹⁵ ¶ Inā ʻo ʻoe, e kā ʻIseraʻela, i moekolohe, Mai hana hewa ʻo kā Iuda; A mai hele ʻoukou i Gilegala, Mai piʻi aʻe ʻoukou i Beta ʻAvena, Mai hoʻohiki, “E ola ʻo Iēhova!”

¹⁶ No ka mea, ua paʻakikī ʻo kā ʻIseraʻela, E like me ka paʻakikī o ka bipi wahine hou; ʻĀnō e hānai ʻo Iēhova iā lākou, E like me ke keiki hipa ma kahi ākea.

¹⁷ Ua hui pū ʻo ʻEperaima me nā kiʻi, E waiho aku iā ia.

¹⁸ Ua hewa kā lākou ʻaha inu, Ua mau ko lākou moekolohe ʻana; A ake kona poʻe aliʻi i ka hilahila.

¹⁹ Ua hoʻopaʻa ka makani iā ia i loko o kona mau ʻēheu, A e hilahila auaneʻi lākou i kā lākou mau mōhai.