HOSEA 3 - Ka Baibala Hemolele

1 ʻO ke aloha o Iēhova i kā ʻIseraʻela, i hoʻākāka ʻia ma ke ʻano o kā Hosea hana ʻana i kāna wahine moekolohe.

MOKUNA III.

¹ ¶ A laila ʻōlelo maila ʻo Iēhova iaʻu, “E hele hoʻi, e aloha aku i ka wahine i aloha ʻia e ka hoalauna; akā, ke moekolohe naʻe; e like me ke aloha o Iēhova i nā mamo a ʻIseraʻela, i ka poʻe e huli ana i nā akua ʻē, a e makemake hoʻi i nā paʻi hua waina.”

² A kūʻai akula au iā ia naʻu i nā kālā he ʻumikumamālua a me ka homera a me ka hapalua o ka homera bale.

³ A ʻī akula au iā ia, “E kali ʻoe iaʻu i nā lā he nui, ʻaʻole ʻoe e hele i ka moekolohe, ʻaʻole ʻoe e lilo i ke kanaka ʻē aʻe; pēlā hoʻi e lilo ai au nāu.”

⁴ No ka mea, he nui nā lā e noho ai nā mamo a ʻIseraʻela, ʻaʻohe aliʻi, ʻaʻohe haku, ʻaʻohe mōhai, ʻaʻohe kiʻi, ʻaʻohe ʻēpoda, ʻaʻohe terapima.

⁵ Ma hope iho e huli mai nā mamo a ʻIseraʻela, a ʻimi iā Iēhova ko lākou Akua, a me Dāvida ko lākou aliʻi; a e makaʻu lākou iā Iēhova, a me kona lokomaikaʻi i nā lā ma hope.