HOSEA 2 - Ka Baibala Hemolele

1 No ka hui ʻana o kā ʻIseraʻela a me kā Iuda ma lalo o ke poʻo hoʻokahi. 6 Hoʻākāka ʻia mai ko lākou hewa, a me ka ʻino e hiki mai ana ma luna o lākou. 14 A hoʻopōmaikaʻi hou ke Akua iā lākou.

MOKUNA II.

¹ ¶ E kapa aku ʻoukou i ko ʻoukou poʻe hoahānau kāne, ʻo “ʻAmi,” a i ko ʻoukou mau hoahānau wahine, ʻo “Ruhama.”

² E hakakā ʻoukou me ko ʻoukou makuahine, e hakakā ʻoukou; No ka mea, ʻaʻole ʻo ia ʻo kaʻu wahine; ʻAʻole hoʻi wau ʻo kāna kāne; I haʻalele ai ʻo ia i kona hoʻokamakama ʻana mai kona maka aku, A me kona moekolohe hoʻi mai waena aku o kona mau ū;

³ O wehe aku au iā ia a ʻōlohelohe, A e hoʻokū iā ia e like me ia i ka lā āna i hānau ai, A e hoʻolilo iā ia e like me ka wao akua, A e hoʻokū hoʻi iā ia e like me ka ʻāina maloʻo, A e pepehi iā ia i ka make wai.

⁴ “ʻAʻole au e aloha aku i kāna poʻe keiki; No ka mea, he poʻe keiki lākou na ka moekolohe.

⁵ “No ka mea, ua moekolohe ko lākou makuahine, Ua hana hilahila ka mea nāna lākou i hāpai; No ka mea, ʻī ihola ia, ‘E hele aku au ma muli o kuʻu mau ipo, Ka poʻe i hāʻawi mai i kaʻu ʻai, a me koʻu wai, I koʻu hulu hipa a me kuʻu olonā, ʻo koʻu ʻaila, a me koʻu mea inu.’

⁶ “No ia mea, aia hoʻi, e hoʻopuni au i kou ala i nā lāʻau kukū, A e hana au i pā pōhaku nona, I mea e loaʻa ʻole ai iā ia kona mau alanui.

⁷ “A hahai aku nō ia i kona mau hoaaloha, ʻaʻole e loaʻa lākou iā ia; A ʻimi aku hoʻi ia iā lākou, ʻaʻole e loaʻa; A laila, e ʻī iho ia, ‘E hele au, a e hoʻi hou i kuʻu kāne ma mua; No ka mea, ua ʻoi aku koʻu pono i kēlā wā ma mua o kēia.’

⁸ ¶ “ʻAʻole ʻo ia i noʻonoʻo, ua hāʻawi aku au iā ia i ka mea ʻai, a me ka waina hou, a me ka ʻaila, A hoʻomāhuahua aku hoʻi i ke kālā, a me ke gula nona, Nā mea a lākou i hoʻomākaukau ai no Baʻala.

⁹ “No ia mea, e hoʻi hou mai au, a e lawe aku i kaʻu palaoa i kona manawa, A me kaʻu waina hou i kona manawa iho, E lawe aku hoʻi au i koʻu hulu hipa, a me koʻu olonā, nā mea i uhi ai i kona ʻōlohelohe.

¹⁰ “ʻĀnō e hōʻike aku au i kona mea hilahila i mua o nā maka o kona mau hoaaloha, ʻAʻohe mea e hoʻopakele iā ia mai koʻu lima aku.

¹¹ “A e hoʻopau aku au i kona leʻaleʻa a pau, I kāna mau ʻahaʻaina, i kona mau Mahina Hou, i kona mau lā Sābati, a me kona mau ʻahaʻaina a pau.

¹² “A e luku aku au i kona mau kumu waina, a me kona mau lāʻau fiku, i nā mea āna i ʻī mai ai, ‘ʻO ia kaʻu uku, ʻo koʻu mau ipo i hāʻawi mai ai iaʻu’; A e hoʻolilo au ia mau mea i ulu lāʻau, A e ʻai iho nā holoholona ia mau mea.

¹³ “A e hoʻopaʻi aku au ma luna ona i nā lā o nā Baʻala, I nā lā āna i kuni ai i ka mea ʻala no lākou; A i kāhiko ai iā ia iho i kona mau apo ihu, a me kona mau lei ʻāʻī, A hahai nō ia ma muli o kona mau ipo, A hoʻopoina ia iaʻu,” wahi a Iēhova.

¹⁴ ¶ “No laila, aia hoʻi, e hoʻowalewale au iā ia, a e alakaʻi aku iā ia i ka wao nahele, A e ʻōlelo ʻoluʻolu aku iā ia.

¹⁵ “A e hāʻawi aku au nona i kona mau māla waina mai laila mai, A i ke awāwa ʻo ʻAkora, i puka o ka manaʻolana; A e mele nō ia ma laila, e like me ia i kona wā ʻōpio, A e like me ia i ka wā āna i puka mai ai mai ka ʻāina ʻo ʻAigupita mai.

¹⁶ “A i kēlā manawa, wahi a Iēhova, e kapa mai ʻoe iaʻu ʻo ʻIsi; ʻAʻole e kapa hou iaʻu, ʻo Baʻali.

¹⁷ “A e lawe aʻe au i ka inoa o nā Baʻala mai kona waha aku, ʻAʻole e hoʻomanaʻo hou iā lākou ma ko lākou inoa.

¹⁸ “A i kēlā manawa e hana aku au no lākou i berita Me nā holoholona o ke kula, a me nā manu o ka lewa, A me nā mea kolo o ka honua; A e haki iaʻu ke kakaka, a me ka pahi kaua, a me ka mea kaua mai ka honua aku, A e hoʻomoe iho au ia lākou me ka maluhia. E hoʻopalau aku au iā ʻoe naʻu a mau loa aku;

¹⁹ “A e hoʻopalau aku au iā ʻoe naʻu ma ka pono, A ma ka hoʻopono, a ma ka lokomaikaʻi, a ma ke aloha.

²⁰ “A e hoʻopalau aku nō hoʻi au iā ʻoe naʻu ma ka ʻoiaʻiʻo: A e ʻike aku ʻoe iā Iēhova.

²¹ ¶ “A i kēlā manawa, e hoʻolohe nō au,” wahi a Iēhova, “E hoʻolohe nō au i nā lani, a e hoʻolohe lākou i ka honua;

²² “A e hoʻolohe ka honua i ka ʻai, a me ka waina, a me ka ʻaila; A e hoʻolohe nō lākou iā Iezereʻela.

²³ “A e kanu iho au iā ia ma ka honua; A e aloha aku au i ka mea i aloha ʻole ʻia; A e ʻōlelo aku au i ka poʻe kānaka ʻaʻole noʻu, ‘ʻO ʻoe koʻu poʻe kānaka’; A e ʻōlelo mai hoʻi lākou, ‘ʻO ʻoe ko mākou Akua!’”