HOSEA 14 - Ka Baibala Hemolele

1 Ka wānana no Samaria. 2 ʻO ke aʻo ʻana e mihi. 4 Hoʻākāka i nā mea maikaʻi no kā ʻIseraʻela. 9 Pono e manaʻo nui i kēia mau mea.

MOKUNA XIV.

¹ ¶ E kā ʻIseraʻela, e huli mai ʻoe iā Iēhova kou Akua; No ka mea, ua hāʻule ʻoe ma kou hewa iho.

² E lawe me ʻoukou i nā ʻōlelo, a e huli ʻoukou iā Iēhova; E ʻī aku iā ia, “E lawe aku ʻoe i nā hewa a pau, A e ʻae lokomaikaʻi mai, A e hoʻihoʻi aku mākou i nā mōhai o ko mākou lehelehe.

³ “ʻAʻole e hoʻōla ko ʻAsuria iā mākou; ʻAʻole mākou e holo ma luna o ka lio; ʻAʻole hoʻi mākou e ʻōlelo hou aku i ka hana a ko mākou mau lima, ‘ʻO ʻoe ko mākou Akua’; No ka mea, ma ou lā e loaʻa ai i ka poʻe mākua ʻole ka lokomaikaʻi.”

⁴ ¶ A e kala aku au i ko lākou kipi ʻana, E aloha wale aku hoʻi au iā lākou; No ka mea, ua huli aʻe kuʻu inaina mai ona aku lā.

⁵ E like auaneʻi au me ka hau i kā ʻIseraʻela; E pua auaneʻi ʻo ia e like me ka līlia, A e kolo leʻa kona mau aʻa e like me Lebanona.

⁶ A e pālahalaha aku kona mau lālā, A e like auaneʻi kona nani me ka lāʻau ʻoliva, E like hoʻi kona ʻala me Lebanona.

⁷ E hoʻi mai ka poʻe e noho ana ma lalo o kona malu; E kupu mai lākou me ka ʻai, A e ulu lākou me ke kumu waina; A ʻo kona inoa ua like me ka waina o Lebanona.

⁸ ¶ E ʻōlelo iho ʻo ʻEperaima, He aha kaʻu e hana hou aku ai i nā kiʻi? Ua lohe au a ua nānā hou au iā ia; Ua like au me ka lāʻau kaʻa uliuli; Mai oʻu aku ua loaʻa iā ʻoe ka hua.

⁹ ¶ ʻO wai ka mea naʻauao, i noʻonoʻo ai ʻo ia i kēia mau mea? A akamai hoʻi, i ʻike ai ʻo ia i kēia mau mea? No ka mea, ʻo nā ʻaoʻao o Iēhova, ua pololei, A e hele ka poʻe pono i loko o laila; Akā, ʻo ka poʻe lawehala, e hāʻule lākou i loko o laila.