HOSEA 13 - Ka Baibala Hemolele

1 ʻO ka pau ʻana o ka nani o ʻEperaima, no kona hoʻomana kiʻi, a no ke aloha ʻole i ke Akua. 9 Hōʻike mai i ke aloha a me ka hoʻōla mai ka make mai.

XIII.

¹ ¶ I ka wā i ʻōlelo ai ʻo ʻEperaima, he haʻalulu, Ua hoʻokiʻekiʻe ʻia ʻo ia i loko o kā ʻIseraʻela; Akā, i kāna hana hewa ʻana ma Baʻala, make ihola ia.

² ʻĀnō, hoʻomāhuahua lākou i ka hewa, A hana lākou no lākou i kiʻi hoʻoheheʻe ʻia no ko lākou kālā, I kiʻi ma ko lākou manaʻo, ʻo nā hana a nā paʻahana wale nō; Ke ʻōlelo nei ka poʻe e kaumaha ana, “E honi lākou i nā keiki bipi.”

³ No ia mea, e like auaneʻi lākou me ke ao kakahiaka, A me ka hau hou e nalo koke ana, E like me ka ʻōpala i puehu ʻia i ka puahiohio mai kahi hehi palaoa aku, A me ka uahi mai ka puka uahi aku.

⁴ ¶ Akā, ʻo wau ʻo Iēhova ke Akua ou, mai ka ʻāina ʻo ʻAigupita mai, Mai ʻike ʻoe i akua ʻē aʻe, iaʻu wale nō; No ka mea, ʻaʻohe hoʻōla, ʻo wau wale nō.

⁵ ʻO wau kai ʻike iā ʻoe ma ka wao nahele, Ma ka ʻāina panoa.

⁶ E like me kā lākou mea ʻai, pēlā i māʻona ai lākou; Ua māʻona lākou, a hoʻokiʻekiʻe ʻia ko lākou naʻau; No ia mea, ua hoʻopoina lākou iaʻu.

⁷ No laila, e like auaneʻi au iā lākou me he liona lā; Me he leopadi lā ma ke ala, e hoʻohālua ai au iā lākou.

⁸ E hālāwai au me lākou me he bea lā i hoʻonele ʻia, A e haehae au i ka wahī o ko lākou naʻau, A e hoʻopau aku au iā lākou ma laila e like me ka liona: A e haehae ka holoholona o ka wao nahele iā lākou.

⁹ ¶ Nāu iho kou make, e kā ʻIseraʻela; Akā, i loko oʻu kou kōkua.

¹⁰ ʻAuhea hoʻi kou aliʻi, nāna e hoʻōla mai iā ʻoe ma kou mau kūlanakauhale a pau? ʻAuhea hoʻi kou mau luna kānāwai, nā mea āu i ʻōlelo ai, “E hāʻawi mai i aliʻi noʻu, a me nā luna?”

¹¹ Hāʻawi aku au i aliʻi nou, no kuʻu inaina, A lawe aku au iā ia ma kuʻu huhū.

¹² ¶ Ua nākiʻi ʻia ka hala o kā ʻEperaima, Ua ahu ʻia kona hewa.

¹³ ʻO nā ʻehaʻeha o ka wahine hānau, e hiki mai ia ma luna ona: He keiki naʻaupō ia; No ka mea, ʻaʻohe ona pono e kū lōʻihi ma kahi e hānau ai nā keiki.

¹⁴ E hoʻōla aku au iā lākou mai ka mana o ka pō; E hoʻōla pānaʻi au iā lākou mai ka make mai; ʻO wau nō kou luku, e ka make; ʻO wau nō kou pepehi, e ka pō; Ua hūnā ʻia ka mihi, mai koʻu maka aku.

¹⁵ ¶ Inā ua māhuahua ʻo ia ma waena o kona mau hoahānau, E hele mai auaneʻi ka makani hikina, Ka makani o Iēhova e hiki mai, mai ka wao nahele mai; A e hoʻomaloʻo ʻia kona pūnāwai, A e maloʻo kona wai puna; A e hoʻopau aku ia i ka waiwai o nā ipu a pau i makemake ʻia.

¹⁶ E hoʻopaʻi ʻia auaneʻi ko Samaria; No ka mea, ua kipi aku ia i kona Akua; E hāʻule auaneʻi lākou ma ka pahi kaua; E ʻulupā ʻia kā lākou mau keiki liʻiliʻi, A ʻo kā lākou poʻe wāhine hāpai e kaha ʻia aku.