HOSEA 12 - Ka Baibala Hemolele

1 Ua aʻo ʻia kā ʻEperaima a me kā Iuda. 4 Hōʻike ʻia ke ʻano o lākou ma ke ʻano o ko lākou kūpuna ʻo Iakoba, ka mea a ke Akua i aloha ai; a kāhea aku iā lākou e mihi. 8 ʻO nā hewa o kā ʻEperaima ka mea i ukiuki ai ke Akua e hoʻopaʻi iā ia.

MOKUNA XII.

¹ ¶ Ke ʻai nei kā ʻEperaima i ka makani, A ke hahai nei hoʻi ia i ka makani hikina; Hoʻomāhuahua nō ia i nā lā a pau i ka hoʻopunipuni a me ka luku ʻana; A hana lākou i ka berita me ko ʻAsuria, A ua lawe ʻia aku ka ʻaila i ʻAigupita.

² He paio hoʻi ko Iēhova me kā Iuda, A e hoʻopaʻi aku ʻo ia iā Iakoba e like me kona mau ʻaoʻao; E hoʻouku aku kēlā iā ia e like me kāna hana.

³ I loko o ka ʻōpū hoʻopaʻa aku ʻo ia i ke kuʻekuʻe wāwae o kona kaikuaʻana, A ma kona ikaika hakakā pū ia me ke Akua.

⁴ A hakakā pū ia me ka ʻānela, a lanakila; Uē ihola ia, a nonoi akula iā ia; Loaʻa ʻo ia iā ia ma Betela, a ʻōlelo pū ʻo ia me kākou;

⁵ ʻO ia hoʻi, ʻo Iēhova ke Akua o nā kaua; ʻO Iēhova, ʻo ia kona inoa ponoʻī.

⁶ No laila, e huli ʻoe i kou Akua; E mālama i ke aloha, a me ka ʻōlelo hoʻopono, A e hilinaʻi mau ma luna o kou Akua.

⁷ He kālepa nō ia, ma kona lima ka mea kaupaona hoʻopunipuni; A makemake nō ia i ka ʻālunu.

⁸ A ʻī ihola ʻo ʻEperaima, “Ua lako nō naʻe wau, Ua loaʻa iaʻu ka waiwai; Ma kaʻu mau hana a pau ʻaʻole i loaʻa kuʻu hewa, ka mea i hewa ai au.”

⁹ A ʻo wau, ʻo Iēhova kou Akua, mai ka ʻāina ʻo ʻAigupita mai, E hoʻonoho hou aku au iā ʻoe i nā halelewa, e like me nā lā o ka ʻahaʻaina.

¹⁰ A ua ʻōlelo aku au ma nā kāula, A ua hoʻomāhuahua i nā hihiʻo, A ua ʻōlelo aku au i nā ʻōlelo nane ma ka lima o nā kāula.

¹¹ Ua hewa anei ko Gileada? ʻO ia, ua hewa lākou; Ke kaumaha nei lākou i nā bipi ma Gilegala; A ʻo ko lākou mau kuahu, ua like me nā ahu ma nā ʻauwaha o ka mahina ʻai.

¹² ¶ A holo akula ʻo Iakoba i ka ʻāina ʻo Suria; A hoʻoluhi akula ʻo ʻIseraʻela no ka wahine, A no ka wahine mālama akula ia i nā holoholona.

¹³ A ma ke kāula i lawe mai ai ʻo Iēhova i kā ʻIseraʻela mai ʻAigupita mai, A ma ke kāula i mālama mai ai ʻo ia iā ia.

¹⁴ Hoʻonāukiuki loa akula ʻo ʻEperaima iā ia; No laila e waiho aku ai ia i kona koko ma luna ona, A e hoʻihoʻi aku kona Haku i kona hoʻowahāwahā ma luna ona.