HOSEA 10 - Ka Baibala Hemolele

1 Hoʻākāka ʻia kā ʻIseraʻela hana hewa ʻana, ʻo ka ʻino e hiki mai ana, a me ke aʻo ʻana e mihi.

MOKUNA X.

¹ ¶ ʻO kā ʻIseraʻela, he kumu waina, i ulu pālahalaha, e hua ana i ka hua nona iho; E like me ka nui o kona hua, pēlā nō ia i hoʻomāhuahua ai i nā kuahu; E like me ka maikaʻi o kona ʻāina, pēlā nō ia i hoʻonani ai i nā kiʻi.

² Ua kānalua ko lākou naʻau; ʻĀnō e hoʻopaʻi ʻia lākou; E hoʻohiolo nō ia i ko lākou kuahu, E hoʻopau nō ia i ko lākou mau kiʻi.

³ ¶ ʻĀnō hoʻi, e ʻōlelo auaneʻi lākou, “ʻAʻohe o kākou aliʻi; No ka mea, ʻaʻole o kākou i makaʻu aku iā Iēhova; He aha ka mea a ke aliʻi e hana mai ai no kākou?”

⁴ Ua ʻōlelo lākou i nā ʻōlelo hoʻohiki wahaheʻe i ka hana ʻana i ka berita; A ua ulu mai ka hoʻāhewa e like me ka lāʻau make ma nā ʻauwaha o ke kula.

⁵ E makaʻu auaneʻi nā kānaka o Samaria no nā keiki bipi o Beta ʻAvena; No ka mea, e auē auaneʻi kona poʻe kānaka no ia mea; A e haʻalulu nā kāhuna no kona nani; No ka mea, ua nalowale ia.

⁶ A e lawe ʻia aku hoʻi ia i ʻAsuria i makana no ke aliʻi no ka ʻenemi; A e kau mai ka hilahila iā ʻEperaima, A e hilahila hoʻi kā ʻIseraʻela no kona manaʻo iho.

⁷ A ʻo Samaria, ua ʻoki ʻia aku kona aliʻi, e like me ka hua ma luna o ka wai.

⁸ A e hoʻopau ʻia nā heiau o ʻAvena, ka hewa o kā ʻIseraʻela; E kupu mai auaneʻi ka lāʻau kukū a me ka pua kala ma luna o ko lākou mau kuahu; A e ʻōlelo aku lākou i nā mauna, “E uhi mai iā mākou”; A i nā puʻu, “E hiolo mai ma luna o mākou.”

⁹ E kā ʻIseraʻela, ua hana hewa ʻoe mai nā lā o Gibea mai; I laila lākou i kū ai; A ʻo ke kaua ʻana ma Gibea i nā keiki hewa, ʻaʻole anei ia e hiki aku i o lākou lā?

¹⁰ Eia koʻu manaʻo, e hahau aku iā lākou; A e ʻākoakoa mai nā kānaka e kūʻē iā lākou, I kuʻu hoʻopaʻa ʻana iā lākou, no ko lākou mau hewa ʻelua.

¹¹ ¶ A ʻo ʻEperaima, ua like ia me ka bipi wahine ʻōpiopio i laka, a makemake hoʻi e hehi i ka palaoa; Akā, e hele aku nō au ma luna o kona ʻāʻī maikaʻi; E hoʻoholo au iā ʻEperaima; A e hana ʻo Iuda me ka ʻōʻō palau, A na Iakoba e kuʻikuʻi i puʻupuʻu lepo nona.

¹² E lūlū ʻoukou no ʻoukou iho, ma ka pono, E ʻohi ʻoukou ma ka lokomaikaʻi; E waele i ko ʻoukou mahina ʻai; No ka mea, he manawa kēia e ʻimi iā Iēhova, A hiki mai ia, a aʻo aku i ka pono iā ʻoukou.

¹³ Ua mahi ʻoukou ma ka pono ʻole, a ua ʻohi ʻoukou i ka hewa; A e ʻai ʻoukou i ka hua o ka wahaheʻe; No ka mea, ua hilinaʻi ʻoe ma kou ʻaoʻao iho, A i ka lehulehu o kou poʻe ikaika.

¹⁴ No laila, e kupu mai auaneʻi ka haunaele i waena o kou poʻe kānaka, A e hoʻohiolo ʻia kou mau wahi paʻa a pau loa, E like me Salemana i hoʻohiolo ai iā Beta ʻArebela i ka lā o ke kaua; I ʻulupā ʻia ai ka makuahine me kāna mau keiki.

¹⁵ Pēlā ʻo ia e hana mai ai iā ʻoukou, ma Betela, no ko ʻoukou hewa nui; I kakahiaka e ʻoki loa ʻia aku ke aliʻi o kā ʻIseraʻela.