HOSEA 1 - Ka Baibala Hemolele

1 No ka manawa i noho ai ʻo Hosea. ʻO ke kauoha a Iēhova, iā ia e mare i ka wahine moekolohe. 5 ʻO kāna mau keiki. 8 No ka lilo ʻana o nā kānaka ʻē i kānaka no ke Akua.

MOKUNA I.

¹ ¶ Ka ʻōlelo a Iēhova iā Hosea, ke keiki a Beʻeri, i nā lā o ʻUria, ʻo Iotama, ʻo ʻAhaza, a ʻo Hezekia, nā aliʻi o kā Iuda; a i nā lā o Ieroboama ke keiki a Ioasa, ke aliʻi o kā ʻIseraʻela.

² ¶ ʻO ka mua o ka ʻōlelo a Iēhova ma Hosea. ʻŌlelo maila ʻo Iēhova iā Hosea, “E hele ʻoe, a e lawe i wahine moekolohe nāu, a i nā keiki moekolohe hoʻi; no ka mea, ua moekolohe nu ko ka ʻāina, i ka haʻalele ʻana iā Iēhova.”

³ A hele akula ia, a lawe iā Gomera, ke kaikamahine a Dibelaima; a hāpai aʻela ʻo ia, a hānau maila he keiki kāne nāna.

⁴ A ʻōlelo maila ʻo Iēhova iā ia, “E kapa aku i kona inoa, ʻo Iezereʻela; no ka mea, ʻaʻole liʻuliʻu aku, a e hoʻopaʻi aku au i ke koko o Iezereʻela ma luna o ko ka hale o Iehu; a e hoʻopau auaneʻi au i ke aupuni o ko ka hale o kā ʻIseraʻela.

⁵ “A i kēlā manawa e haki nō iaʻu ke kīkoʻo o kā ʻIseraʻela ma ka pāpū ʻo Iezereʻela.”

⁶ Hāpai hou aʻela ʻo ia, a hānau maila, he kaikamahine. ʻŌlelo mai ke Akua iā ia, “E kapa aku i kona inoa, ʻo Lo-Ruhama; no ka mea, ʻaʻole au e aloha hou aku i ko ka hale o kā ʻIseraʻela; akā, e lawe loa aku au iā lākou.

⁷ “Akā, e aloha aku au i ko ka hale o kā Iuda, a e hoʻōla aku au iā lākou ma o Iēhova lā ko lākou Akua; ʻaʻole au e hoʻōla iā lākou ma ke kīkoʻo, a me ka pahi kaua; ʻaʻole ma ke kaua, ʻaʻole hoʻi ma nā lio, a ma nā hoʻoholo lio.”

⁸ A i ka wā i ukuhi aku ai ʻo ia iā Lo-Ruhama, hāpai aʻela ʻo ia, a hānau mai he keiki kāne.

⁹ ʻĪ maila ke Akua, “E kapa aku i kona inoa, ʻo Lo-ʻAmi; no ka mea, ʻaʻole ʻoukou he poʻe kānaka noʻu, ʻaʻole auaneʻi hoʻi au he Akua no ʻoukou.”

¹⁰ ¶ Akā, e like auaneʻi ka lehulehu o nā mamo a ʻIseraʻela, Me ke one o ke kai, ʻAʻole e hiki ke ana ʻia, ʻaʻole hoʻi ke helu ʻia; A ma kahi i ʻōlelo ʻia ai lākou, “ʻAʻole ʻo koʻu poʻe kānaka ʻoukou,” Ma laila e ʻōlelo ʻia ai lākou, “He poʻe keiki ʻoukou na ke Akua ola.”

¹¹ A e hoʻākoakoa ʻia mai nā mamo a Iuda, a me nā mamo a ʻIseraʻela, ma kahi hoʻokahi, A e hoʻonoho lākou i hoʻokahi aliʻi no lākou; A e piʻi aʻela lākou mai ka ʻāina mai; No ka mea, nani ka manawa o Iezereʻela.