ʻO KA ʻEPISETOLE A PAULO KA LUNAʻŌLELO I KO HEBERA 9 - Ka Baibala Hemolele

1 ʻO Kristo ka mōhai e pono loa ai, ʻaʻole ko ʻAʻarona mā.

MOKUNA IX.

¹ ¶ He mau ʻoihana nō hoʻi kā ka berita mua, no ka hoʻomana ʻana, a me kahi hoʻāno ma ka honua.

² No ka mea, ua hana ʻia nō he halelewa; ʻo ka mua kahi i waiho ʻia ai ka ipukukui, a me ka papa, a me ka berena hōʻike; ua kapa ʻia ia ʻo kahi hoʻāno.

³ A ma hope o ka pale lua, ka halelewa i kapa ʻia ka Hoʻāno Loa.

⁴ Ma laila ke kapuahi gula, a me ka pahu berita i uhi ʻia i ke gula a puni, kahi i waiho ʻia ai ka ipu gula o ka mane, a me ko ʻAʻarona koʻokoʻo, ka mea i ʻōpuʻu aʻe, a me nā papa kānāwai;

⁵ a ma luna iho ona nā kerubima nani e hoʻomalumalu ana i ka noho aloha; ʻaʻole hiki iā mākou ke ʻōlelo maopopo loa i kēia mau mea, ʻānō.

⁶ A hoʻomākaukau ʻia pēlā ua mau mea lā, ua komo mau nā kāhuna i ka halelewa mua e hoʻokō ana i nā ʻoihana.

⁷ Akā, i loko o ka lua i komo ai ke kahuna nui wale nō, pākahi wale nō ke komo ʻana i ka makahiki, ʻaʻole me ke koko ʻole, ka mea āna i kaumaha aku ai nona iho, a no nā hewa hoʻi o nā kānaka.

⁸ Ma ia mea i hoʻākāka mai ai ka ʻUhane Hemolele, ʻaʻole i wehe ʻia kahi e komo ai i ka hoʻāno loa, i ka wā i kū ai ka halelewa mua;

⁹ he aka nō ia a hiki i kēia manawa, kahi i kaumaha ʻia aku ai nā ʻālana a me nā mōhai, nā mea i hiki ʻole ke hoʻomaopopo loa i ka pono ma ka naʻau o ka mea nāna ia ʻoihana;

¹⁰ nā ʻoihana ma ke kino, ma ka mea ʻai, a me ka mea inu, a me kēlā holoi ʻana, a me kēia holoi ʻana, i kauoha ʻia mai a hiki i ka manawa e hoʻoponopono hou ʻia ai.

¹¹ ¶ Akā, i ka hiki ʻana mai o Kristo, ʻo ke Kahuna Nui no ka pono e hiki mai ana, ma ka halelewa nui aʻe, hemolele loa, ʻaʻole i hana ʻia e nā lima, ʻaʻole ia no kēia ao.

¹² Hoʻokahi wale nō kona komo ʻana i loko o Kahi Hoʻāno, ʻaʻole me ke koko o nā kao a me nā bipi kāne; akā, me kona koko ponoʻī nō, e loaʻa ana ka mea e ola mau ai.

¹³ A inā i hoʻohuikala ke koko o nā bipi kāne, a me nā kao, a me ka lehu o ka bipi wahine, e pīpī ana i ka mea haumia, i maʻemaʻe ai ke kino;

¹⁴ e hiki loa aku i ke koko o Kristo, ʻo ka mea i kaumaha aku iā ia iho i ke Akua ma ka ʻUhane mau loa me ke kīnā ʻole, ke hoʻohuikala i ko ʻoukou naʻau i nā hana e make ai, e mālama aku ai i ke Akua ola.

¹⁵ No ia mea, ua lilo ʻo ia i ʻuao no ka berita hou, a i ka lilo ʻana o kona make ʻana i uku hoʻōla no nā hewa i hana ʻia ma ka berita mua, e hiki ai i ka poʻe i kāhea ʻia ke loaʻa ka hoʻoilina mau i haʻi mua ʻia mai.

¹⁶ A inā he kauoha hoʻoilina, e manaʻo ʻia ana ua make ka mea nāna ke kauoha i paʻa ai.

¹⁷ No ka mea, ʻo ke kauoha, ua paʻa loa ia ma hope wale nō o ka make ʻana o kānaka, ʻaʻole ia i paʻa i ka wā e ola ana ka mea nāna ke kauoha.

¹⁸ No laila, ʻaʻole i hoʻopaʻa ʻia ka berita mua me ke koko ʻole.

¹⁹ No ka mea, a pau nā kauoha ma ke Kānāwai i ka heluhelu ʻia e Mose, i ka poʻe kānaka a pau, lawe ihola ia i ke koko o nā bipi kāne, a me nā kao, a me ka wai, a me ka huluhulu ʻula, a me ka husopa, a kōpīpī ihola i ka buke a me ka poʻe kānaka a pau,

²⁰ ʻī ihola, “«Eia ke koko o ka berita a ke Akua i kauoha mai ai iā ʻoukou».”

²¹ Pēlā hoʻi i kōpīpī aku ai me ke koko i ka halelewa, a me nā ipu a pau o ia ʻoihana.

²² ʻAneʻane pau nā mea ma ke Kānāwai i ka hoʻomaʻemaʻe ʻia i ke koko; ʻaʻohe kala ʻana ke hoʻokahe ʻole ʻia ke koko.

²³ ¶ No laila, ua kūpono e hoʻohuikala ʻia nā kumu hoʻohālike i ko ka lani, ma ia mau mea; akā, ʻo ko ka lani mau mea ma nā mōhai maikaʻi aku.

²⁴ No ka mea, ʻaʻole ʻo Kristo i komo i loko o ka halelewa i hana ʻia e nā lima, he aka wale nō no ka mea ʻoiaʻiʻo; akā, i loko o ka lani ponoʻī i hōʻike mau iā ia iho ma ke alo o ke Akua no kākou.

²⁵ ʻAʻole nō hoʻi no ke kaumaha pinepine ʻana iā ia iho, e like me kā ke kahuna nui komo ʻana i kēlā makahiki a i kēia makahiki i loko o Kahi Hoʻāno me ke koko, ʻaʻole ʻo kona iho.

²⁶ Inā pēlā, inā ua make pinepine ʻo ia mai ka hoʻokumu ʻana mai o ke ao nei; akā, ʻānō, ma kēia hope o ke ao, ua hōʻike hoʻokahi mai ʻo ia iā ia iho no ka hoʻomaʻemaʻe ʻana i ka hewa ma ka mōhai ʻana iā ia iho.

²⁷ A ua hoʻomaopopo ʻia ka make hoʻokahi ʻana o nā kānaka, a ma ia hope aku ka hoʻopaʻi ʻana;

²⁸ pēlā hoʻi ʻo Kristo, a pau kona hoʻolilo hoʻokahi ʻana iā ia iho i mōhai e halihali aku i ka hewa o ka lehulehu, e ʻike hou ʻia ʻo ia me ka mōhai ʻole, i ka lua o kona hiki ʻana mai, e ola ai, ka poʻe e kiaʻi ana iā ia.