ʻO KA ʻEPISETOLE A PAULO KA LUNAʻŌLELO I KO HEBERA 8 - Ka Baibala Hemolele

1 ʻO ka pau ʻana o kā Levi ʻoihana, a ʻo ka mau loa ʻana o kā Iesū.

MOKUNA VIII.

¹ ¶ A ʻo nā mea a mākou i ʻōlelo aʻe nei, eia ka nui; pēlā ke ʻano o ko kākou Kahuna Nui, ka Mea i hoʻonoho ʻia ma ka lima ʻākau o ka noho aliʻi o ka Mōʻī ma ka lani;

² he Lawehana no kahi hoʻāno, no ka halelewa ʻoiaʻiʻo, na ka Haku i kūkulu, ʻaʻole na ke kanaka.

³ No ka mea, ua hoʻokaʻawale ʻia nā kāhuna nui e kaumaha aku ai i nā ʻālana a me nā mōhai; no laila hoʻi, e pono e loaʻa iā ia nei kekahi mea e kaumaha aku ai.

⁴ Akā, inā ma ka honua ia, inā ʻaʻole he kahuna ia; no ka mea, eia nō ka poʻe kāhuna e kaumaha ana i nā ʻālana ma muli o ke Kānāwai,

⁵ ka poʻe i hana ma ke kumu hoʻohālike, a ma ke aka o ko ka lani; no ka mea, ʻo Mose i ke kokoke ʻana o kona kūkulu ʻana i ka halelewa, ua ao ʻia mai ia e ke Akua, pēnēia; “«E nānā ʻoe»,” wahi āna, “«E hana ʻoe i nā mea a pau ma muli o ke kumu hoʻohālike i hōʻike ʻia iā ʻoe ma ka mauna».”

⁶ Akā, ʻānō, ua loaʻa iā ia ka ʻoihana maikaʻi aʻe, e like me ka ʻoi ʻana aku o ka maikaʻi o ka berita āna i ʻuao ai, ka mea i hoʻopaʻa ʻia ma nā ʻōlelo hoʻopōmaikaʻi maikaʻi aʻe.

⁷ A inā i kīnā ʻole kēlā berita mua, inā ʻaʻole i ʻimi hou ʻia kahi kaʻawale no ka lua.

⁸ Akā, i ka loaʻa ʻana o ke kīnā, ua ʻōlelo mai ʻo ia iā lākou, “«Eia hoʻi, wahi a Iēhova, E hiki mai ana nō nā lā e hana hou aku ai au i berita hou Me ka ʻohana ʻIseraʻela, a me ka ʻohana Iuda;

⁹ ʻAʻole hoʻi e like me ka berita aʻu i hana aku ai me ko lākou mau mākua, I ka lā i lālau aku ai au i ko lākou lima E alakaʻi mai iā lākou mai ka ʻāina ʻo ʻAigupita mai; No ka mea, ʻaʻole lākou i noho paʻa ma koʻu berita, A ua haʻalele au iā lākou, wahi a Iēhova.

¹⁰ “Akā, eia ka berita aʻu e hana aku ai me ka ʻohana ʻIseraʻela, Ma hope iho o ua mau lā lā, wahi a Iēhova; E paʻi au i koʻu mau kānāwai ma ko lākou manaʻo, A e kākau iho ia mau mea ma ko lākou naʻau; A e lilo au i Akua no lākou, A e lilo mai lākou i poʻe kānaka noʻu.

¹¹ “ʻAʻole lākou e aʻo aku, kēlā kānaka i kona hoa noho, A kēia kanaka i kona hoahānau, me ka ʻōlelo ʻana aku, ‘E ʻike i ka Haku;’ No ka mea, e pau auaneʻi lākou i ka ʻike iaʻu Mai ka mea liʻiliʻi a hiki i ka mea nui o lākou.

¹² “No ka mea, e ahonui aku nō au i ko lākou mau hewa, ʻAʻole au e hoʻomanaʻo hou aku i ko lākou mau kīnā a me ko lākou mau hala».”

¹³ I kāna ʻōlelo ʻana, “He berita hou,” ua hoʻolilo ʻo ia i ka mea mua i luʻaluʻa; a ʻo ka mea luʻaluʻa, e ʻelemakule ana hoʻi, ua kokoke nō ia e nalo aku.