ʻO KA ʻEPISETOLE A PAULO KA LUNAʻŌLELO I KO HEBERA 7 - Ka Baibala Hemolele

1 No ka lilo ʻana o Iesū i kahuna nui mau loa.

MOKUNA VII.

¹ ¶ A ʻo ua Melekisedeka lā hoʻi, ke aliʻi o Salema, he kahuna no ke Akua Kiʻekiʻe Loa, ʻo ia hoʻi kai hālāwai pū me ʻAberahama i kona hoʻi ʻana mai, mai ka luku ʻana aku i nā aliʻi, a hoʻomaikaʻi ihola iā ia.

² Iā ia hoʻi i hāʻawi aku ai ʻo ʻAberahama i ka hapaʻumi o nā mea a pau; ma ka unuhi ʻōlelo ʻana, ʻo kona inoa mua “ke aliʻi o ka pono,” a laila ke aliʻi o Salema ia, ʻo ke ʻano o ia, “ke aliʻi e maluhia ai.”

³ ʻAʻole ona makua kāne, ʻaʻohe makuahine, ʻaʻole kūʻauhau, ʻaʻohe kumu o kona mau lā, ʻaʻole oki kona ola ʻana; akā, ua hoʻohālike ʻia me ke Keiki a ke Akua, e noho kahuna mau ana.

⁴ ¶ ʻĀnō lā hoʻi, e hoʻomanaʻo i ke ʻano kiʻekiʻe o ua kanaka lā, iā ia i hāʻawi aku ai ʻo ʻAberahama ka makualiʻi i ka hapaʻumi o ka waiwai pio.

⁵ A ʻo nā mamo a Levi, ka poʻe i lawe i ka ʻoihana a ke kahuna, ua kauoha ʻia mai lākou ma ke Kānāwai e lawe i ka hapaʻumi o ka waiwai o kānaka, ʻo ko lākou poʻe hoahānau, a ua hele mai nō naʻe lākou mai loko mai o ko ʻAberahama pūhaka.

⁶ Akā, ʻo ka mea i kūʻauhau ʻole ʻia, mai laila mai, ʻo ia kai lawe i ka hapaʻumi o ko ʻAberahama waiwai, a ua hoʻomaikaʻi aku hoʻi i ka mea nona nā ʻōlelo mua.

⁷ A he mea hoʻopaʻapaʻa ʻole ʻia kēia, ua hoʻomaikaʻi ʻia aku ka mea i emi iho e ka mea i ʻoi aku.

⁸ Ma ʻaneʻi hoʻi, ua loaʻa ka hapaʻumi o ka waiwai i kānaka e make ana; akā, ma laila i ka mea i ʻōlelo ʻia mai ai, e ola ana ia.

⁹ ʻO ia hoʻi, inā e hiki iaʻu ke ʻōlelo penei, ʻo Levi hoʻi, ʻo ka mea i loaʻa iā ia ka hapaʻumi o ka waiwai, ʻo ia kekahi i hāʻawi aku i ka hapaʻumi o ka waiwai i loko o ʻAberahama.

¹⁰ No ka mea, ma loko nō ʻo ia o ka pūhaka o kona kupuna i ka wā i hālāwai ai ʻo Melekisedeka me ia.

¹¹ ¶ A, inā i loaʻa ka mea e pono ai ma ka ʻoihana kahuna a Levi, (ua hāʻawi pū ʻia mai ke Kānāwai i kānaka me ia,) he aha lā anei hoʻi ko laila hemahema e kū hou ai kekahi kahuna ʻē ma muli o ke ʻano o Melekisedeka, ʻaʻole hoʻi i kapa ʻia ma muli o ke ʻano o ʻAʻarona?

¹² Akā, i kāhuli ʻia ka ʻoihana kahuna, he pono nō hoʻi e kāhuli ʻia ke kānāwai.

¹³ No ka mea, ʻo ka mea nona kēia mau mea i ʻōlelo ʻia ai, no ka ʻohana ʻē nō ia, ʻaʻole kekahi o lākou i mālama ma ke kuahu.

¹⁴ Ua akāka nō ka puka ʻana o ka Haku, mai loko mai o Iuda, ka ʻohana i ʻōlelo ʻole ʻia ai no ka ʻoihana kahuna e Mose.

¹⁵ A ua akāka loa aʻe kēlā mea, i ke kupu ʻana o kekahi kahuna ʻē, e like me Melekisedeka,

¹⁶ i hoʻolilo ʻia pēlā, ʻaʻole ma ke kānāwai o ko ke kino; akā, ma ka mana o ke ola e mau loa ana.

¹⁷ Ua hōʻoiaʻiʻo mai nō hoʻi ia, “«He kahuna mau loa ʻoe Ma muli o ke ʻano o Melekisedeka».”

¹⁸ Ua waiho ʻia aʻe nō kēlā kānāwai mua, no kona nāwaliwali, a me kona pono ʻole.

¹⁹ ʻAʻole ma ke Kānāwai, i pono loa ai kekahi mea; akā, ma ka hoʻokomo ʻana i ka manaʻolana maikaʻi aʻe, ka mea e hoʻokokoke aku ai kākou i ke Akua.

²⁰ A no ka mea hoʻi, ʻaʻole me ka hoʻohiki ʻole ʻana,

²¹ (no ka mea, ua hoʻolilo ʻia aʻe kēlā poʻe i kāhuna, me ka hoʻohiki ʻole; akā, ʻo ia nei me ka hoʻohiki ʻana e ka Mea nāna i ʻōlelo iā ia, “«Ua hoʻohiki ka Haku, ʻAʻole hoʻi ia e loli hou aʻe, ‘He kahuna mau loa ʻoe ma muli o ke ʻano o Melekisedeka»’”);

²² ma ia mea hoʻi i lilo ai ʻo Iesū i pānaʻi no ka berita maikaʻi aʻe.

²³ A, ʻo kēlā poʻe kāhuna he lehulehu lākou; no ka mea, ʻaʻole i hāʻawi ʻia mai e mau lākou, no ka make;

²⁴ akā, ʻo ia nei, no kona mau loa ʻana, he ʻoihana kahuna lilo ʻole kāna.

²⁵ No ia mea, e hiki mau ai iā ia ke hoʻōla i ka poʻe i hele mai i ke Akua ma ona lā, no kona ola mau loa ʻana e ʻuao ana no lākou.

²⁶ ¶ ʻO ia ke ʻano o ke kahuna e pono ai kākou, ka mea hemolele, hewa ʻole, maʻemaʻe wale, kaʻawale hoʻi i nā lawehala, a i hoʻokiʻekiʻe ʻia aʻe hoʻi ma luna o nā lani;

²⁷ ʻaʻole hoʻi i kū iā ia ke kaumaha ʻana i ka mōhai i kēlā lā i kēia lā, e like me ua mau kāhuna nui lā, no ko lākou mau hewa ponoʻī ma mua, a laila no ko nā kānaka hewa; no ka mea hoʻokahi wale nō kāna hana ʻana ia mea, i kona wā i kaumaha ai iā ia iho.

²⁸ Na ke Kānāwai hoʻi i hoʻolilo i kānaka nāwaliwali i kāhuna nui; akā, na ka ʻōlelo o ka hoʻohiki ʻana, ka mea ma hope mai o ke Kānāwai, i hoʻolilo i ke Keiki, ka Mea i hoʻohemolele mau loa ʻia aku.