ʻO KA ʻEPISETOLE A PAULO KA LUNAʻŌLELO I KO HEBERA 5 - Ka Baibala Hemolele

1 No ke kahuna ʻana ma muli o ʻAʻarona, a ma muli nō o Melekisedeka.

MOKUNA V.

¹ ¶ A ʻo kēlā kahuna nui a ʻo kēia kahuna nui i hoʻokaʻawale ʻia aʻe mai waena mai o kānaka, ua hoʻolilo ʻia nō ia no nā kānaka, ma nā mea o ke Akua, e kaumaha aku ai i nā ʻālana a me nā mōhai no ka hewa.

² E hiki nō iā ia ke lokomaikaʻi aku i ka poʻe naʻaupō, a me ka poʻe hele hewa; no ka mea, ʻo ia nō kekahi i hoʻopuni ʻia mai e ka nāwaliwali;

³ no laila, e pono nō e kaumaha aku ʻo ia i ka mōhai hala nona iho, me ia hoʻi lā no nā kānaka.

⁴ ʻAʻole hoʻi e lawelawe kekahi i kēia nani nona iho; akā, ua hoʻokaʻawale ʻia mai ia e ke Akua, me ʻAʻarona hoʻi lā.

⁵ Pēlā nō hoʻi ʻaʻole ʻo Kristo i hoʻonani iā ia iho e lilo i Kahuna Nui; akā, ʻo ka Mea i ʻōlelo iho iā ia, “«ʻO ʻoe nō kaʻu Keiki, I kēia lā nō, ua hoʻohānau aku au iā ʻoe»”;

⁶ ʻo ia kai ʻōlelo hou pēlā ma kekahi wahi ʻē aʻe, “«He kahuna mau loa nō ʻoe Ma muli o ke ʻano o Melekisedeka».”

⁷ ʻO ia hoʻi, i nā lā o kona noho kino ʻana, ua kaumaha akula i ka pule, a me ka nonoi ʻana, me ke kāhea nui ʻana, a me nā waimaka heleleʻi, i ka Mea e hiki iā ia ke hoʻopakele mai iā ia i ka make, a ua lohea mai ʻo ia no nā mea āna i makaʻu ai.

⁸ He Keiki nō ia, ua aʻo nō naʻe ia i ka hoʻolohe, ma nā mea āna i ʻehaʻeha ai.

⁹ A i ka hoʻohemolele ʻia ʻana ona, ua lilo ʻo ia i Ola e ola mau loa ai no ka poʻe a pau i hoʻolohe iā ia.

¹⁰ Ua kapa ʻia ihola ia e ke Akua, he Kahuna Nui ma muli o ke ʻano o Melekisedeka.

¹¹ ¶ He nui nō nā mea a mākou e ʻōlelo aku ai nona, ʻaʻole hikiwawe ke hoʻomaopopo aku; no ka mea, he poʻe hoʻokananuha ʻoukou.

¹² No ka mea, ʻo ko ʻoukou pono nō e lilo i mau kumu i kēia manawa, eia naʻe, ua kūpono ʻoukou i ke aʻo hou ʻia aku i nā hua mua o ka ʻōlelo a ke Akua; a ʻo ka waiū ka mea e pono ai ʻoukou, ʻaʻole ka ʻai paʻa.

¹³ No ka mea, ʻo nā mea i ʻai waiū, ʻaʻole ia i akamai i ka ʻōlelo o ka pono; he keiki hou nō ia.

¹⁴ Akā, ʻo ka ʻai paʻa, na ka poʻe oʻo nō ia, ka poʻe mākaukau nō ka mea e ʻike ai i ka pono a me ka hewa.