ʻO KA ʻEPISETOLE A PAULO KA LUNAʻŌLELO I KO HEBERA 4 - Ka Baibala Hemolele

1 No ke komo ʻana i kahi maha mau e waiho ana.

MOKUNA IV.

¹ ¶ No ia hoʻi, i ka waiho ʻana mai o ka ʻōlelo mua no ke komo ʻana i loko o kona wahi maha, e ao kākou o loaʻa ʻole ia i kekahi o ʻoukou.

² No ka mea, iā kākou kekahi i haʻi ʻia mai ka ʻeuanelio e like me ia iā lākou; akā, ʻo ka ʻōlelo i lohea, ʻaʻole ia i hoʻopōmaikaʻi iā lākou, i ka hoʻopili ʻole ʻia me ka manaʻoʻiʻo i loko o ka poʻe i lohe.

³ Akā hoʻi, ʻo kākou ka poʻe manaʻoʻiʻo ke komo i loko o kahi maha, me ia kāna ʻōlelo ʻana, “«Pēlā hoʻi au i koʻu huhū i hoʻohiki ai, ʻAʻole lākou e komo i loko o koʻu wahi maha»;” ʻo ia hoʻi, i ka pau ʻana o nā hana ma hope iho o ka hoʻokumu ʻana o ke ao nei.

⁴ No ka mea, ua ʻōlelo mai ia ma kekahi wahi no ka hiku o ka lā, pēnēia: “«I ka hiku o ka lā i hoʻomaha ai ke Akua i kāna mau hana a pau».”

⁵ Eia hoʻi pēnēia, “«ʻAʻole lākou e komo i loko o koʻu wahi maha».”

⁶ ʻO ia hoʻi, no ke koe ʻana mai o ke komo ʻana o kekahi poʻe i loko o ua mea lā, a ʻo ka poʻe i haʻi mua ʻia aku ai kēia pono, ʻaʻole lākou i komo no ka manaʻoʻiʻo ʻole;

⁷ ua hoʻākāka hou mai ia i kekahi lā, e ʻōlelo ana ma Dāvida, “I kēia lā,” i ka manawa ma hope loa mai; ua ʻōlelo ʻia mai pēnēia, “«I kēia lā i ko ʻoukou lohe ʻana i kona leo, Mai hoʻopaʻakikī i ko ʻoukou naʻau».”

⁸ No ka mea, inā ua hoʻomaha aku ʻo Iosua iā lākou, inā ʻaʻole ia i ʻōlelo hou no kekahi lā ʻokoʻa.

⁹ No laila hoʻi, e waiho ana nō he wahi maha no nā kānaka o ke Akua.

¹⁰ A ʻo ka mea hoʻi i komo i loko o kona wahi maha, ua hoʻomaha nō ia i kāna mau hana iho, me ke Akua lā hoʻi i hoʻomaha ai i kāna.

¹¹ No ia mea, e hoʻoikaika nui kākou e komo i loko o ia wahi maha, i ʻole ai e hāʻule kekahi ma muli o ua manaʻoʻiʻo ʻole lā.

¹² No ka mea, he ikaika, he mana hoʻi ko ka ʻōlelo a ke Akua, he ʻoi nui kona ma mua o ko ka pahi kaua ʻoi lua, e ʻō ana a kaʻawale ke ola a me ka ʻuhane, ʻo nā ʻami a me ka lolo; ʻo ia ka luna kānāwai no ka noʻonoʻo a me ka naʻau.

¹³ ʻAʻohe mea nalo i kona maka; akā, ua wehe ʻia, a ua akāka loa nā mea a pau i ka maka o ka Mea iā ia kākou e haʻi aku ai.

¹⁴ ¶ A, no ka loaʻa ʻana iā kākou ke Kahuna Nui, i hala aku i nā lani, ʻo Iesū, ke Keiki a ke Akua, e hoʻopaʻa kākou i ko kākou hōʻoiaʻiʻo ʻana.

¹⁵ No ka mea, ʻaʻole iā kākou ke Kahuna i aloha ʻole mai i ko kākou nāwaliwali; akā, ʻo kekahi i hoʻowalewale ʻia aku i nā mea a pau me kākou lā i hoʻowalewale ʻia mai ai, ʻaʻole hoʻi ona hala.

¹⁶ No laila, e hoʻokokoke aku kākou ma ka noho aliʻi aloha me ka manaʻolana, i aloha ʻia mai kākou, a i loaʻa hoʻi ka lokomaikaʻi e kōkua mai ai i ka wā pōpilikia.