ʻO KA ʻEPISETOLE A PAULO KA LUNAʻŌLELO I KO HEBERA 3 - Ka Baibala Hemolele

1 Ua hoʻohālike ʻia ʻo Iesū me Mose.

MOKUNA III.

¹ ¶ No ia mea hoʻi, e nā hoahānau laʻa, ka poʻe i hea pū ʻia mai mai ka lani mai, e manaʻo nui i ka Lunaʻōlelo, a me ke Kahuna Nui a kākou i hōʻoiaʻiʻo aku ai, ʻo Kristo Iesū;

² ka Mea i mālama pono i kona Mea nāna i hoʻolilo mai, e like hoʻi me Mose i loko o kona hale a pau.

³ No ka mea, ua pono e hoʻonani nui ʻia aku ʻo ia ma mua o Mose, e like me ka ʻoi ʻana o ka mahalo ʻia ʻo ka mea nāna i hana i ka hale ma mua o ka hale.

⁴ A ʻo kēlā hale kēia hale a pau, ua hana ʻia ia e kekahi; a ʻo ka Mea nāna i hana nā mea a pau, ʻo ke Akua ia.

⁵ A ua hoʻopono nō ʻo Mose i loko o kona hale a pau i kona kahu ʻana, no ka hōʻike ʻana i nā mea e haʻi ʻia ana.

⁶ Akā, ʻo Kristo, i Kona keiki ʻana ma luna o kona hale iho; ʻo kākou nō hoʻi ua hale lā, ke hoʻopaʻa kākou i ka manaʻo pono, a me ka manaʻolana e ʻoliʻoli ai i mau a hiki i ka hopena.

⁷ No laila, i ka ʻōlelo ʻana mai o ka ʻUhane Hemolele, “«I kēia lā, i ko ʻoukou lohe ʻana i kona leo,

⁸ Mai hoʻopaʻakikī i ko ʻoukou naʻau e like me ia i ka hoʻonāukiuki ʻana, I ka lā i hoʻāʻo ʻia ai ma ka wao nahele;

⁹ I ka hoʻolawehala ʻana mai o ko ʻoukou poʻe kūpuna iaʻu, a me ka hoʻāʻo ʻana mai iaʻu, I ko lākou ʻike ʻana mai i kaʻu mau hana i nā makahiki he kanahā.

¹⁰ “No laila, i huhū aku ai au ia hanauna, ʻĪ akula hoʻi au, ‘Ua lalau mau lākou ma ka naʻau; ʻAʻole hoʻi lākou i hōʻoiaʻiʻo mai i koʻu mau ʻaoʻao.’

¹¹ “Pēlā hoʻi au i koʻu huhū ʻana i hoʻohiki aku ai, ‘ʻAʻole lākou e komo i koʻu wahi maha».’”

¹² E ao hoʻi, e nā hoahānau, o noho ka naʻau ʻino hoʻomaloka i loko o kekahi o ʻoukou, i haʻalele ai ia i ke Akua ola.

¹³ Akā, e hoʻoikaika mau kekahi i kekahi i ka wā i kapa ʻia “ʻO kēia lā,” o hoʻopaʻakikī ʻia kekahi o ʻoukou ma ka hoʻopunipuni ʻana o ka hewa.

¹⁴ No ka mea, e loaʻa mai ana nō ʻo Kristo iā kākou, ke hoʻopaʻa kākou i ko kākou manaʻo pono mua i mau a hiki i ka hopena;

¹⁵ A i ka ʻōlelo ʻana, “«I kēia lā i ko ʻoukou lohe ʻana i kona leo, Mai hoʻopaʻakikī i ko ʻoukou naʻau, e like me ia i ka hoʻonāukiuki ʻana».”

¹⁶ ʻO wai lā ka poʻe i lohe, a laila hoʻonāukiuki akula? ʻAʻole anei ʻo ka poʻe a pau i hele mai, ma o Mose lā, mai ʻAigupita mai?

¹⁷ ʻO wai lā hoʻi ka poʻe āna i huhū mai ai i nā makahiki he kanahā? ʻAʻole anei ʻo ka poʻe i hana hewa, a hāʻule iho ko lākou mau kupapaʻu ma ka wao nahele?

¹⁸ Iā wai lā hoʻi kāna i hoʻohiki ai, ʻaʻole lākou e komo i kona wahi maha, ke ʻole ka poʻe i manaʻoʻiʻo ʻole?

¹⁹ No laila lā, ua ʻike kākou, ʻaʻole i hiki iā lākou ke komo i loko, no ka manaʻoʻiʻo ʻole.