ʻO KA ʻEPISETOLE A PAULO KA LUNAʻŌLELO I KO HEBERA 2 - Ka Baibala Hemolele

1 ʻO ka hoʻoikaika e mālama i ke ola nui.

MOKUNA II.

¹ ¶ No laila hoʻi, e pono e lelepau kākou ia mau mea a kākou i lohe aʻe nei, o hāʻule iā kākou i kekahi manawa.

² No ka mea, inā i kau paʻa ʻia ke kānāwai i ʻōlelo ʻia mai ma ka poʻe ʻānela, a ua hoʻopaʻi pono ʻia ka hala, a me ka hoʻopale a pau;

³ pehea lā uaneʻi kākou e pakele ai ke mālama ʻole i ke ola nui nei; ka mea i haʻi ʻia mai i kinohi e ka Haku, a i hōʻoiaʻiʻo ʻia mai hoʻi iā kākou e ka poʻe i lohe;

⁴ ʻo ke Akua kekahi e hōʻoiaʻiʻo pū mai ana ma nā hōʻailona, a me nā mea kupanaha, a me kēlā hana mana, a me kēia hana mana, a me ka hāʻawi ʻana mai o ka ʻUhane Hemolele, e like me kona makemake?

⁵ ¶ ʻAʻole hoʻi ʻo ia i hoʻolilo iho ma lalo iho o ka poʻe ʻānela i ke ao e hiki mai ana, a mākou e ʻōlelo nei.

⁶ Akā, ua hōʻike mai kekahi ma kekahi wahi, i ka ʻōlelo ʻana mai, “«He aha ke kanaka i manaʻo mai ai ʻoe iā ia? A ʻo ke keiki a ke kanaka i ʻike mai ai ʻoe iā ia?

⁷ “Ua hana iho ʻoe iā ia ma lalo iki iho o ka poʻe ʻānela; Ua kau mai ʻoe ma luna ona i ka nani a me ka mahalo i lei nona; Ua hoʻolilo ʻoe iā ia i haku no nā mea a kou lima i hana ai.

⁸ “Nāu nō i waiho nā mea a pau ma lalo aʻe o kona mau wāwae».” A, i kona hoʻolilo ʻana i nā mea a pau ma lalo iho ona, ʻaʻohe mea koe iā ia i waiho ʻole ʻia aʻe ma lalo ona. ʻAʻole naʻe kākou i ʻike i nā mea a pau i waiho ʻia aʻe ma lalo ona.

⁹ Akā, ua ʻike kākou iā Iesū i ka Mea i hoʻolilo ʻia ma lalo iki iho o ka poʻe ʻānela, no ka make ʻana, i hoʻolei ʻia mai ai i ka nani a me ka mahalo; i lilo hoʻi ia i ka make no nā kānaka a pau, ma ka lokomaikaʻi o ke Akua.

¹⁰ No ka mea, ua pono i ka Mea nona nā mea a pau, nāna hoʻi nā mea a pau, i kona alakaʻi ʻana i nā keiki he nui wale i loko o ka nani, ma o ka hoʻoʻeha ʻia ʻana, e hoʻonani loa ai i ko lākou Aliʻi e ola ai.

¹¹ No ka mea, ʻo ka Mea nāna i hoʻohuikala mai, a ʻo ka poʻe i hoʻohuikala ʻia mai; no ka mea, hoʻokahi lākou a pau; no ia mea, ʻaʻole ia i hilahila ke kapa aku iā lākou he mau hoahānau,

¹² i ka ʻī ʻana, “«E haʻi aku au i kou inoa i koʻu mau hoahānau; E hoʻoleʻa hoʻi au iā ʻoe ma waena o ke anaina kanaka».”

¹³ Eia hou hoʻi, “«E hilinaʻi aku au iā ia».” Eia hou hoʻi, “«Eia hoʻi au, me nā keiki a ke Akua i hāʻawi mai ai iaʻu».”

¹⁴ A, i ka lawe pū ʻana o na keiki i ka ʻiʻo a me ke koko, pēlā hoʻi ʻo ia i lawe pū ai i ua mau mea lā; i hiki ai iā ia, ma kona make ʻana, ke hoʻopio i ka Mea iā ia ka mana e make ai, ʻo ia ka diabolō;

¹⁵ a e hoʻōla hoʻi i ka poʻe i noho pio i ko lākou wā e ola nei a pau, no ka makaʻu i ka make.

¹⁶ ʻAʻole hoʻi ʻo ia i kōkua i ka poʻe ʻānela; akā, ua kōkua mai ʻo ia i nā mamo a ʻAberahama.

¹⁷ No laila, ua pono e hoʻohālike loa ʻia ʻo ia me kona poʻe hoahānau, i lilo ai ia i kahuna nui aloha, a me ka hoʻopono ma nā mea no ke Akua, i hiki ai ia ka hoʻomalu ʻana no ka hewa o kānaka.

¹⁸ A; no ka mea, ua ʻehaʻeha ʻo ia i ka hoʻowalewale ʻia, ua hiki nō iā ia ke kōkua i ka poʻe i hoʻowalewale ʻia mai.