ʻO KA ʻEPISETOLE A PAULO KA LUNAʻŌLELO I KO HEBERA 10 - Ka Baibala Hemolele

1 ʻO ko ke Kānāwai mau mōhai he nāwaliwali ia; akā, ʻo ko ka berita hou, he mana ia e pono mau ai.

MOKUNA X.

¹ ¶ A ʻo ke Kānāwai iā ia ke aka, no nā mea maikaʻi e hiki mai ana, ʻaʻole ke kino maoli a ua mau mea lā, ʻaʻole loa e hiki iā ia me nā mōhai i kaumaha ʻia aku i kēlā makahiki a i kēia makahiki ke hoʻohemolele i ka poʻe i hoʻokoke i laila.

² No ka mea, inā i hiki iā ia, ʻaʻole anei i oki ua mau mōhai lā? No ka mea, ʻo ka poʻe hoʻomana, i hoʻohuikala hoʻokahi ʻia, ʻaʻole lākou i ʻike hou i ko lākou hewa iho.

³ Akā, ma ua mau mōhai lā i hoʻomanaʻo ʻia ai ka hewa i kēlā makahiki a i kēia makahiki.

⁴ A he ʻoiaʻiʻo, he mea hiki ʻole i ke koko o nā bipi kāne a me nā kao ke kala aku i ka hewa.

⁵ No laila, i kona hiki ʻana mai i ke ao nei, ʻī akula ia, “«ʻO ka mōhai a me ka ʻālana, ʻo kaʻu ia i makemake ʻole ai, Akā, he kino kāu i hoʻomākaukau ai noʻu.

⁶ “ʻAʻole hoʻi ʻoe i ʻoluʻolu i nā mōhai kuni, a me nā mōhai no ka hala.

⁷ “A laila, ʻī ihola au, ‘Eia hoʻi, ua hele mai nei au, (Ua palapala ʻia noʻu ma ka buke palapala,) E hana aku i kou makemake, e ke Akua».’”

⁸ I kāna ʻōlelo mua ʻana, “«ʻO nā mōhai, a me nā ʻālana, ʻo nā mōhai kuni, a me nā mōhai hala, ʻo kaʻu ia i makemake ʻole ai, a i ʻoluʻolu ʻole ai»;” ʻo nā mea i kaumaha ʻia aku ai ma muli o ke Kānāwai;

⁹ a laila, ʻōlelo hou aʻela, “«Eia hoʻi, ua hele mai nei au e hana aku i kou makemake, e ke Akua».” Ua hoʻokae ʻo ia i ka mea mua, e hoʻokūpaʻa ai ia i ka lua.

¹⁰ Ma ia makemake hoʻi, ua loaʻa iā kākou ka huikala ʻana, ma ka mōhai hoʻokahi ʻana i ke kino o Iesū Kristo.

¹¹ A ʻo nā kāhuna ua kū lākou e hana ana i ka ʻoihana i kēlā lā i kēia lā, e kaumaha pinepine ana i ua mau mōhai lā, i nā mea hiki ʻole ke kala i ka hewa;

¹² akā, ʻo kēia hoʻi, ma hope iho o kona kaumaha ʻana i ka mōhai hoʻokahi no ka hewa, «noho ihola ia a mau loa, ma ka lima ʻākau o ke Akua»;

¹³ e kali ana, «a hoʻolilo ʻia mai kona poʻe ʻenemi i paepae wāwae nona».

¹⁴ Ma ka mōhai hoʻokahi hoʻi, i hana ai ʻo ia i ka mea e pono mau ai ka poʻe nona ka huikala.

¹⁵ A ua hōʻike mai ka ʻUhane Hemolele i kēia mea iā kākou; no ka mea, ua ʻōlelo ʻia,

¹⁶ “«Eia ka berita aʻu e hana aku ai me lākou, Ma hope iho o ua mau lā lā,” wahi a ka Haku; “E paʻi iho au i koʻu mau kānāwai ma ko lākou naʻau, A e kākau iho hoʻi ia mau mea ma ko lākou manaʻo;

¹⁷ ʻAʻole hoʻi au e hoʻomanaʻo hou i ko lākou mau hewa A me ko lākou mau hala».”

¹⁸ A ma kahi i pau ai ia mau mea i ke kala ʻia, ʻaʻohe mōhai hou aku no ka hewa.

¹⁹ ¶ A i ka loaʻa ʻana iā kākou, e nā hoahānau, ke komo ʻana i loko o Kahi Hoʻāno ma ke koko o Iesū,

²⁰ ma ka ʻaoʻao hou e ola ai, āna i hoʻomākaukau ai ma waena o ka pākū, ʻo ia kona kino;

²¹ a he Kahuna Nui hoʻi ma luna o ka hale o ke Akua;

²² e hoʻokokoke kākou me ka maopopo loa o ka manaʻoʻiʻo, a me ka naʻau ʻoiaʻiʻo, me ka huikala ʻia ʻo ko kākou naʻau kaumaha i ka hewa, a me ka holoi ʻia ʻo ko kākou kino me ka wai maʻemaʻe.

²³ E hoʻopaʻa kākou i ka manaʻolana a kākou i haʻi aku ai me ka luli ʻole; no ka mea, he kūpaʻa ʻiʻo ko ka Mea nāna i haʻi mua mai ka pono.

²⁴ A e nānā pono hoʻi kākou i kekahi i kekahi, e hoʻoikaika ai i ke aloha a me nā hana maikaʻi.

²⁵ ʻAʻole hoʻi e haʻalele ana i ko kākou hoʻākoakoa ʻana e like me ka hana ʻana a kekahi poʻe; akā, e hoʻoikaika pū ana, me ka ikaika nui aʻe, i ko ʻoukou ʻike ʻana aku e kokoke mai ana ua lā lā.

²⁶ ¶ A inā e hana hewa kākou me ka ʻae o ka naʻau, ma hope iho o ka loaʻa ʻana mai iā kākou ka ʻike ʻana i ka ʻōlelo ʻoiaʻiʻo, ʻaʻohe mōhai hou no nā hala;

²⁷ akā, ʻo ke kali weliweli ʻana i ka hoʻopaʻi ʻia mai, a me «ka huhū wela e pau ai ka poʻe ʻenemi».

²⁸ ʻO ka mea i pale i ke Kānāwai o Mose, ua make ia me ke aloha ʻole ʻia, ma nā mea hōʻike ʻelua, ʻekolu paha.

²⁹ He aha lā i ko ʻoukou manaʻo ka make ʻeha nui aku e manaʻo ʻia ana he pono; no ka mea, nāna i hehi ma lalo iho o ka wāwae i ke Keiki a ke Akua, me ka manaʻo i ke koko o ka berita āna i hoʻolaʻa ʻia ai he mea haumia, a me ka hoʻowahāwahā aku i ka ʻUhane lokomaikaʻi?

³⁰ Ua ʻike nō hoʻi kākou i ka Mea nāna i ʻōlelo iho, “«Noʻu nō ka hoʻopaʻi ʻana, naʻu nō ia e uku aku»,” wahi a ka Haku; eia hou hoʻi, “«Na ka Haku nō e hoʻopaʻi i kona poʻe kānaka».”

³¹ He mea weliweli ka hāʻule ʻana i loko o nā lima o ke Akua ola.

³² ¶ E hoʻomanaʻo hoʻi ʻoukou i nā lā ma mua, i ka manawa i hoʻomanawanui ai ʻoukou i ka paio nui ʻana, me ka ʻehaʻeha, ma hope iho o ko ʻoukou naʻauao ʻana;

³³ no ko ʻoukou lilo ʻana i mea nānā ʻia mai ai, ma ka hōʻino ʻana, a me ka ʻehaʻeha ʻana kekahi; a, ʻo kekahi, no kā ʻoukou lilo ʻana i mau hoaaloha no ka poʻe i kolohe ʻia pēlā.

³⁴ A ua aloha ʻiʻo hoʻi ʻoukou i nā mea i hoʻopeʻa ʻia, a ua ʻae aku me ka ʻoluʻolu, i ka hao ʻana aku o ko ʻoukou waiwai, e ʻike ana nō, aia i ka lani ka waiwai maikaʻi aku no ʻoukou, ka mea e ʻoia mau ana.

³⁵ No laila, mai kiola aku ʻoukou i ko ʻoukou paulele ʻana, ka mea e uku nui ʻia mai ana.

³⁶ ʻO ke ahonui ko ʻoukou mea e pono ai, i loaʻa mai ai iā ʻoukou ka pono i haʻi mua ʻia mai, ma hope iho o kā ʻoukou hana ʻana i ka makemake o ke Akua.

³⁷ «A liʻuliʻu iki aku, ʻO ka Mea e hiki mai ana e hiki mai nō ia, ʻaʻole e hoʻokaʻulua aku.

³⁸ A ʻo ka mea i pono, e ola nō ia ma ka manaʻoʻiʻo; Akā, inā e hoʻi i hope kekahi, ʻaʻole e ʻoluʻolu koʻu ʻuhane iā ia».

³⁹ ʻAʻole hoʻi mākou no ka poʻe hoʻi i hope e make ai; akā, no ka poʻe manaʻoʻiʻo e ola ai ka ʻuhane.