ʻO KA ʻEPISETOLE A PAULO KA LUNAʻŌLELO I KO HEBERA 1 - Ka Baibala Hemolele

1 No ka ʻoi loa ʻana o Kristo ma mua o ka poʻe ʻānela.

MOKUNA I.

¹ ¶ ʻO ke Akua, ʻo ka Mea i ʻōlelo pinepine mai i nā wā kahiko i ka poʻe kūpuna, me kēlā mea a me kēia mea, ma ka poʻe kāula,

² ʻo ia kai ʻōlelo hou mai iā kākou i kēia mau lā muli iho nei ma ke Keiki, ka Mea i hoʻolilo ʻia e ia i Haku no nā mea a pau, ma ona lā hoʻi ia i hana ai i ka lani a me ka honua.

³ ʻO ia ka ʻōlinolino o kona nani, a me ka like loa o kona ʻano maoli, e hoʻomau ana i nā mea a pau ma kāna ʻōlelo mana iho, a, hoʻolilo ihola iā ia iho i mea e maʻemaʻe ai ko kākou hewa, noho ihola ia ma ka lima ʻākau o ka Mōʻī ma luna lilo;

⁴ a ua hoʻokiʻekiʻe ʻia aʻe ma luna loa o nā ʻānela, e like me ka ʻoi ʻana o ka maikaʻi o kona inoa i loaʻa iā ia, ma mua o ko lākou.

⁵ No ka mea, ʻo ka ʻānela hea kāna i ʻōlelo aku ai i kekahi manawa, “«ʻO ʻoe nō kaʻu Keiki, I kēia lā nō ua hoʻohānau aku au iā ʻoe»?” Eia hoʻi, “«E lilo au i Makua nona, A e lilo ʻo ia i Keiki naʻu»?”

⁶ Eia hou hoʻi, i kona hoʻokomo ʻana i ka makahiapo i ke ao nei, ʻī ihola ia, “«E hoʻomana mai ka poʻe ʻānela a pau o ke Akua iā ia».”

⁷ A ua ʻōlelo ʻia mai hoʻi no ka poʻe ʻānela, “«Ua hoʻolilo ʻo ia i kona poʻe ʻānela i mau makani, A i kāna poʻe kauā lawelawe i lapalapa o ke ahi».”

⁸ Akā, no ke Keiki, “«ʻO kou noho aliʻi, e ke Akua, e mau loa ana nō ia; A he hōʻailona mōʻī o ka pono ka hōʻailona mōʻī o kou aupuni.

⁹ “Ua makemake hoʻi ʻoe i ka pono, a ua inaina i ka hewa; No laila i poni ai ke Akua, kou Akua, iā ʻoe Me ka ʻaila o ka ʻoliʻoli ma luna o kou mau hoa».”

¹⁰ Eia hoʻi, “«I ka wā kahiko, ua hoʻokumu ʻoe, e ka Haku, i ka honua; A ʻo nā lani hoʻi ka hana a kou mau lima.

¹¹ “E pau ana nō lākou; akā, e mau ana nō ʻoe; E luʻaluʻa loa ana nō lākou a pau me he kapa lā;

¹² A e ʻopiʻopi ana nō ʻoe iā lākou Me he ʻaʻahu lā, a e lilo aku; Akā, e ʻoia mau ana nō ʻoe, A ʻo kou mau makahiki, ʻaʻole loa e pau».”

¹³ ʻO ka ʻānela hea kāna i ʻōlelo aku ai i kekahi manawa, “«E noho ʻoe ma koʻu lima ʻākau, A hoʻolilo iho au i kou mau ʻenemi I paepae wāwae nou»?”

¹⁴ ʻAʻole anei lākou a pau he poʻe ʻuhane lawelawe i hoʻouna ʻia, e kōkua i ka poʻe e lilo ana i poʻe hoʻoilina o ke ola?