HAGAI 2 - Ka Baibala Hemolele

1 No ka nani o kēia luakini hope i ko ka mua. 16 No nā mea maʻemaʻe, a me nā haumia, ma laila i ʻikea ai ko lākou pōʻino ʻana. 20 Ka pōmaikaʻi o ko Kristo aupuni.

MOKUNA II.

¹ ¶ I ka lā iwakāluakumamākahi o ka malama ʻahiku, hiki maila ka ʻōlelo a Iēhova ma o Hagai lā ke kāula, i ka ʻī ʻana mai,

² “E ʻōlelo aku ʻoe iā Zerubabela ke keiki a Saletiʻela, ke kiaʻāina o Iuda, a iā Iosua ke keiki a Iosedeka, ke kahuna nui, a i ke koena o kānaka, i ka ʻī ʻana aku,

³ ‘ʻO wai o ʻoukou e koe, nāna i ʻike i kēlā luakini me kona nani mua? Pehea ʻoukou i ʻike ai i kēia, ʻānō, ʻaʻole anei ia ma ko ʻoukou maka me he mea ʻole lā?

⁴ ‘Akā, i nui hoʻi ka ikaika ou, e Zerubabela,’ wahi a Iēhova; ‘i nui hoʻi ka ikaika ou, e Iosua, e ke keiki a Iosedeka, ke kahuna nui; i nui hoʻi ka ikaika o ʻoukou, e nā kānaka a pau o ka ʻāina nei, a e hana hoʻi,’ wahi a Iēhova; ‘no ka mea, me ʻoukou pū hoʻi au,’ wahi a Iēhova o nā kaua.

⁵ ‘E like me ka berita aʻu i hoʻopaʻa aku ai me ʻoukou, iā ʻoukou i puka ai mai ʻAigupita mai, pēlā hoʻi e noho ai kuʻu ʻUhane i waena o ʻoukou; mai makaʻu ʻoukou.’

⁶ “No ka mea, penei ka ʻī ʻana mai a Iēhova, ke Akua o nā kaua, ‘I kekahi manawa aku, he liʻuliʻu iki ia, a e hoʻonaue au i ka lani a me ka honua, i ke kai a me ka ʻāina maloʻo.

⁷ ‘A e hoʻonaue hoʻi au i nā lāhui kanaka a pau, a e hele mai auaneʻi ka mea i makemake ʻia e nā lāhui kanaka a pau, a e hoʻopiha auaneʻi au i kēia hale i ka nani,’ wahi a Iēhova o nā kaua.

⁸ ‘Noʻu nō ke kālā, noʻu hoʻi ke gula,’ wahi a Iēhova o nā kaua.

⁹ ‘E ʻoi auaneʻi ka nani o kēia hale hope i mua o ko ka mua,’ wahi a Iēhova o nā kaua; ‘a ma kēia wahi hoʻi e hāʻawi aku nō wau i ka maluhia,’ wahi a Iēhova o nā kaua.”

¹⁰ ¶ I ka lā iwakāluakumamāhā o ka iwa o ka malama, i ka lua o ka makahiki o Dariu, hiki maila ka ʻōlelo a Iēhova ma o Hagai lā ke kāula, i ka ʻī ʻana mai,

¹¹ “Penei kā Iēhova o nā kaua e ʻōlelo mai nei, ‘E nīnau aku ʻoe i nā kāhuna no ke kānāwai, penei:

¹² ‘Inā e lawelawe kekahi i ka ʻiʻo laʻa ma ke kihi o kona ʻaʻahu, a hoʻopā aku kona kihi i ka berena, i ka ʻiʻo hoʻolapalapa paha, a i ka waina, a i ka ʻaila paha, a i kekahi mea ʻai ʻē aʻe, e laʻa nō anei ia?’” Hōʻole maila nā kāhuna, ʻī maila, “ʻAʻole.”

¹³ A laila ʻī akula ʻo Hagai, “Inā i haumia kekahi i ke kupapaʻu, a hoʻopā aku ia i kekahi o kēia mau mea, e haumia anei ia mea?” Pane maila nā kāhuna, ʻī maila, “E haumia nō.”

¹⁴ ʻŌlelo akula ʻo Hagai, ʻī akula, “‘Pēlā nō kēia poʻe kānaka, a pēlā kēia lāhui kanaka i mua oʻu,’ wahi a Iēhova; ‘a pēlā hoʻi ka hana a pau a ko lākou lima; a ʻo ka mea a lākou e mōhai mai ai i laila, he haumia ia.

¹⁵ ‘No laila hoʻi, e noʻonoʻo pono ʻoukou mai kēia lā e noho nei a hiki i ka wā ma mua, i ka wā i kau ʻole ʻia ai ka pōhaku ma luna o kekahi pōhaku ma ka luakini o Iēhova.

¹⁶ ‘Mai ia manawa, inā hele aku kekahi i ka puʻu hua ʻai he iwakālua nā ana ona, a loaʻa he ʻumi; a i hele aku hoʻi kekahi i kahi kaomi waina e hoʻokahe ai i nā ana he kanalima mai loko mai o ke kaomi waina, a loaʻa iho he iwakālua wale nō.

¹⁷ ‘Hahau akula au iā ʻoukou i ka maloʻo a me ka popo, a me ka huahekili ma nā hana a pau a ko ʻoukou mau lima; akā, ʻaʻole o ʻoukou i huli mai i oʻu nei,’ wahi a Iēhova.

¹⁸ ‘E noʻonoʻo ʻoukou mai kēia lā e noho nei a ma mua aku, mai ka lā iwakāluakumamāhā o ka malama ʻaiwa, a hiki i kēlā lā i hoʻokumu ʻia ai ka luakini o Iēhova; e noʻonoʻo ʻoukou:

¹⁹ ‘Ua koe anei ka hua ʻai i loko ka hale papaʻa? Eia hoʻi, ʻaʻole ka waina, a me ka fiku, a me ka pomegerane, a me ka lāʻau ʻoliva i hua mai i ka hua; mai kēia lā aku naʻe, e hoʻomaikaʻi aku nō wau iā ʻoukou.’”

²⁰ ¶ Hiki hou maila ka ʻōlelo a Iēhova iā Hagai i ka lā iwakāluakumamāhā o ua malama lā, i ka ʻī ʻana mai,

²¹ “E ʻī aku ʻoe iā Zerubabela ke kiaʻāina o Iuda, penei, ‘E hoʻonaue ana au i ka lani a me ka honua.

²² ‘A e hoʻokahuli au i ka noho aliʻi o nā aupuni, a e hoʻolilo au i ka ikaika o nā aupuni kanaka ʻē i mea ʻole; e hoʻokahuli hoʻi au i nā hale kaʻa a me ka poʻe holo ma loko; a e hāʻule iho auaneʻi nā lio a me nā hoʻoholo lio, ʻo kēlā mea kēia mea o lākou, i ka pahi kaua a kona hoahānau.’

²³ ‘Ia lā hoʻi,’ wahi a Iēhova o nā kaua, ‘e lawe au iā ʻoe, e Zerubabela ke keiki a Saletiʻela, ʻo kaʻu kauā,’ wahi a Iēhova, ‘a e hoʻolike au iā ʻoe me ke komo lima hoʻopili wepa; no ka mea, ua koho au iā ʻoe,’” wahi a Iēhova o nā kaua.