HABAKUKA 3 - Ka Baibala Hemolele

1 Ka pule a ke kāula. 3 Hōʻike mai nō ia i nā hana kahiko a ke Akua no kā ʻIseraʻela, i mea e lana ai ka manaʻo e hoʻopakele hou mai ke Akua iā lākou. 16 Haʻalulu nō ia no nā mea e hiki mai ana ma luna o lākou; akā, hauʻoli nō i loko o ke Akua.

MOKUNA III.

¹ ¶ ʻO ka pule a Habakuka, ke kāula, me ka mele lanakila.

² ¶ E Iēhova, ua lohe au i ka mea āu i ʻōlelo ai, a weliweli ihola au; E Iēhova, e hoʻāla hou mai ʻoe i kāu hana i waena o nā makahiki, I waena o nā makahiki e hōʻike mai; I loko o ka huhū, e hoʻomanaʻo mai ʻoe i ke aloha.

³ ¶ ʻO ke Akua kai hele mai, mai Temana mai, A ʻo ka Mea Hemolele mai ka mauna ʻo Parana mai. Sila. Uhi mai kona nani i ka lani, A ua piha ka honua i kona hoʻoleʻa.

⁴ ʻO kona ʻōlinolino ua like me ka lā, Mai kona lima mai nā kukuna mālamalama, A ma laila ka hūnā ʻana o kona mana.

⁵ I mua ona i hele aku ai ke ahulau, A ʻo ka make wela i hele aku ma kona mau wāwae.

⁶ Kū aʻela ia, a ana akula i ka honua, Nānā aʻela ia, a hoʻohaʻalulu i nā lāhui kanaka; Ua hoʻoheleleʻi ʻia nā mauna kahiko, A ua hoʻohaʻahaʻa ʻia nā puʻu mau loa; ʻO ia kona mau ʻaoʻao i ka wā kahiko.

⁷ ʻIke akula au i nā halelewa o Kusana i ka pōpilikia; A haʻalulu nā pākū halelewa o ka ʻāina ʻo Midiana.

⁸ ¶ Ua huhū anei ʻo Iēhova i nā muliwai? A ua kūʻē kou inaina i nā kahawai? Ua makaʻē kou huhū i ke kai? I ka manawa āu i holo ai ma luna o kou mau lio, Kou mau hale kaʻa o ke ola?

⁹ Ua wehe loa ʻia kāu kakaka, ʻO nā ihe ʻehiku, ʻo ia ka ʻōlelo. Sila. Ua hoʻonahae ʻoe i ka honua me nā muliwai.

¹⁰ ʻIke aku nā mauna iā ʻoe, haʻalulu ihola; A holo akula ka wai nui, A hoʻopuka mai ka hohonu i kona leo, Hoʻokiʻekiʻe aʻela ia i kona mau lima i luna.

¹¹ ʻO ka lā, ʻo ka mahina, kū mālie ma ko lāua wahi; Ma ka mālamalama o kou mau pua, hele akula lākou, A ma ka wakawaka o kāu ihe huali.

¹² Me ka inaina i hele aku ʻoe ma waena o ka ʻāina, Me ka huhū i hahi iho ʻoe i nā lāhui kanaka.

¹³ Ua hele aku ʻoe e hoʻōla i kou poʻe kānaka, E hoʻopakele i kou mea i poni ʻia; Ua ʻulupā ʻoe i ke poʻo o ka mea no ka ʻohana hewa, Ua hōʻike aʻe i ka hohonu, a hiki i ka ʻāʻī. Sila.

¹⁴ Ua ʻō hou aku ʻoe i ke poʻo o kona poʻe aliʻi, Me kāna mau ihe, Holo mai lākou, me he ʻino lā, e hoʻopuehu iaʻu; ʻO ko lākou ʻoliʻoli, ua like me Ka ʻoliʻoli o ka luku ʻana i ka mea ʻilihune ma kahi malū.

¹⁵ Ua hele ʻoe i waena o ke kai me kou poʻe lio, Ma ke ʻaleʻale o nā wai nui.

¹⁶ ¶ Lohe ihola au, a haʻalulu koʻu ʻōpū; Haʻalulu kuʻu lehelehe i ka leo; Komo mai ka popopo i loko o kou mau iwi, A haʻalulu au ma kuʻu wahi ma lalo; He ʻoiaʻiʻo, e hoʻomaha au i ka lā o ka pōpilikia, A piʻi kūʻē mai nā kānaka, e hoʻopilikia mai.

¹⁷ I ka manawa e pua ʻole mai ai ka lāʻau kū, ʻAʻole hoʻi he hua ma nā kumu waina; A e mae ka hua o ka lāʻau ʻoliva, ʻAʻole hoʻi e hua mai nā kīhāpai i ka ʻai; A e ʻoki ʻia aku ka poʻe hipa mai ka pā hipa aku, ʻAʻole hoʻi he bipi ma loko o nā wahi hānai bipi.

¹⁸ E ʻoliʻoli nō au i loko o Iēhova, E hauʻoli nō au i loko o ke Akua o kuʻu ola.

¹⁹ ʻO Iēhova ka Haku, ʻo ia koʻu ikaika, A e hoʻohālike mai ia i koʻu wāwae, me nā wāwae o nā dia, A e hoʻohele nō ia iaʻu ma luna o kuʻu mau wahi kiʻekiʻe. Na ka luna mele ma nā mea kani.