HABAKUKA 2 - Ka Baibala Hemolele

1 ʻO ke kali ʻana o ke kāula i ka ʻōlelo a ke Akua. 2 Kauoha mai ke Akua iā ia e kākau i ka mea i ʻike ʻia.

MOKUNA II.

¹ ¶ Ma luna o koʻu wahi kiaʻi ke kū nei au, A ma luna o kahi paʻa ke hoʻonoho iaʻu iho, A e nānā aʻe au e ʻike ai i ka mea āna e ʻōlelo mai ai noʻu, A i ka mea aʻu e pane aku ai no kuʻu hoʻākāka ʻana.

² ʻŌlelo mai ʻo Iēhova iaʻu, ʻī maila, “E kākau ʻoe i ka mea i ʻike ʻia, A e kākau hoʻi ia ma nā papa pōhaku, I hiki ka mea heluhelu e hoholo.

³ “No ka mea, ʻo ka mea i ʻikea no ka manawa maopopo ia; A ke lalelale nei i ka hope, ʻaʻole ia e hoʻopunipuni; Inā e hoʻokaʻulua ʻia ʻo ia, e kali ʻoe iā ia; No ka mea, e hiki ʻiʻo mai nō ia, ʻaʻohe ia e hoʻokaʻulua.

⁴ ¶ “Aia hoʻi, ʻo ka mea hoʻokiʻekiʻe, ʻAʻole pono kona naʻau i loko ona; Akā, ʻo ka mea pono, e hoʻōla ʻia ʻo ia ma kona manaʻoʻiʻo.

⁵ “A he ʻoiaʻiʻo, ʻo ka waina, ua hoʻopunipuni ia; ʻO ke kanaka haʻaheo, ʻaʻole ia i noho mālie, Ua hoʻākea ʻo ia i kona makemake, e like me ka lua kupapaʻu, A ua like ʻo ia me ka make, ʻaʻole ia e ana; Hoʻākoakoa ʻo ia nona iho i nā lāhui kanaka a pau, A ua hōʻuluʻulu nona iho i nā kānaka a pau.

⁶ ¶ “ʻAʻole anei e hāpai o kēia poʻe a pau i mele nona, A i wahi ʻōlelo hōʻino nona, A e ʻī aku, ‘Auwē ka mea e hoʻomāhuahua i ka waiwai, ʻaʻohe nona! Pehea ka lōʻihi! ʻO ka mea e hoʻonui ana ma luna ona i ka ʻaiʻē?’

⁷ “ʻAʻole anei e kū koke mai ka poʻe e nahu mai iā ʻoe, A e ala mai ka poʻe e hoʻokaumaha iā ʻoe? A e lilo ʻoe i pio no lākou.

⁸ “No ka mea, ua hoʻopio ʻoe i nā lāhui kanaka he nui, ʻO ke koena a pau o nā kānaka e hoʻopio lākou iā ʻoe, No ke koko o kānaka, a no ka hana ʻino i ka ʻāina, I ke kūlanakauhale, a me ka poʻe a pau e noho ana i loko ona.

⁹ ¶ “Auē ka mea kuko i ka waiwai pono ʻole no kona hale, I hoʻokiʻekiʻe ai ʻo ia i kona pūnana i luna, I hoʻopakele ai iā ia iho mai ka mana o ka hewa mai!

¹⁰ “Ua kūkā ʻoe i ka mea hilahila no kou hale, Ma ka hōʻoki ʻana i nā kānaka he nui, Ua hana hewa aku hoʻi ʻoe i kou ʻuhane.

¹¹ “No ka mea, e kāhea mai ka pōhaku mai ka paia mai, A ʻo ke kaola lāʻau e pane mai nō ia.

¹² ¶ “Auē ka mea kūkulu i ke kūlanakauhale me ke koko, ʻO ka mea hoʻokumu i ke kūlanakauhale me ka hewa!

¹³ “Aia hoʻi, na Iēhova o nā kaua anei kēia, E hoʻoluhi nā kānaka i loko o ke ahi, A e hoʻokaumaha iā lākou iho no ka mea ʻole?

¹⁴ “No ka mea, e hoʻopiha ʻia ka honua I ka ʻike i ka nani o Iēhova, E like me nā wai i hoʻopiha ai i nā moana.

¹⁵ ¶ “Auē ka mea hoʻohāinu i kona hoalauna, A e ninini i kou mea e wela ai iā ia, i ʻona ʻo ia, I nānā aku ai ʻoe i ko lākou ʻōlohelohe!

¹⁶ “E hoʻopiha ʻia ʻoe i ka hilahila no ka nani, E inu hoʻi ʻoe, a e hōʻike i kuʻu ʻoki poepoe ʻole ʻia; ʻO ke kīʻaha o ka lima ʻākau o Iēhova e hiki mai nō ia iā ʻoe, A ʻo ka luaʻi hilahila e uhi mai i kou nani.

¹⁷ “No ka mea, ʻo ka hana ʻino iā Lebanona e uhi mai iā ʻoe, Me ka luku o nā holoholona, i hoʻoweliweli iā lākou, No ke koko o kānaka, a no ka hana ʻino i ka ʻāina, I ke kūlanakauhale, a me ka poʻe a pau e noho ana i loko ona.

¹⁸ ¶ “He aha ka pono o ke kiʻi, i ka manawa i kālai ʻia ʻo ia e ka mea nāna ia i hana? A ʻo ke kiʻi hoʻoheheʻe ʻia, a me ka mea aʻo i ka wahaheʻe? A ʻo ka mea nāna i hana i kona kiʻi, ua hilinaʻi ia ma luna ona, Ma ka hana ʻana i akua lapuwale.

¹⁹ “Auē ka mea ʻōlelo i ka lāʻau, ‘E ala mai!’ A i ka pōhaku leo ʻole, ‘E kū i luna!’ ʻO ia ke aʻo mai? Aia hoʻi, ua uhi ʻia ʻo ia i ke gula a me ke kālā, Akā, ʻaʻohe hanu iki i loko ona.

²⁰ “Aia nō ʻo Iēhova i loko o kona luakini hoʻāno; E hāmau i mua ona, e ka honua a pau.”