HABAKUKA 1 - Ka Baibala Hemolele

1 Hoʻākāka mai ke kāula i ka hewa i waena o kona poʻe kānaka. 5 Hōʻike mai i ka hoʻopaʻi ʻia ʻana o lākou e kā Kaledea. 12 Hoʻomana iā Iēhova; a hōʻike i ka hana ʻino o ka poʻe hewa.

MOKUNA I.

¹ ¶ ʻO ka ʻōlelo, ka mea i hōʻike ʻia iā Habakuka ke kāula.

² ¶ Pehea ka lōʻihi o koʻu kāhea ʻana, e Iēhova, ʻAʻole ʻoe e hoʻolohe mai? A uē aku hoʻi iā ʻoe no ka hana ʻino, ʻAʻole ʻoe e hoʻopakele mai?

³ No ke aha lā, kou hōʻike ʻana mai iaʻu i ke kaumaha, A me ka ʻehaʻeha? Aia nō ka hana ʻino, a me ka hoʻoluhi i mua oʻu; A ala mai ka hakakā a me ka paio.

⁴ No ia mea, ua nāwaliwali ke kānāwai, ʻAʻole e hele aku ka hoʻopono ʻana me ka ʻoiaʻiʻo; Akā, ʻo ka mea hewa ke hoʻopuni i ka mea pono; No laila, ua hoʻokahuli ʻia ka pono.

⁵ ¶ “E nānā ʻoukou i waena o nā lāhui kanaka, a e ʻike pono, A e kāhāhā nui ka naʻau; No ka mea, e hana nō au i ka hana i ko ʻoukou mau lā, Ka mea i manaʻoʻiʻo ʻole ai ʻoukou, ke haʻi ʻia mai ia.

⁶ “No ka mea, aia hoʻi, e hoʻokū au i ko Kaledea, He lāhui kanaka hana ʻino, a me ka huhū, Ka mea e hele i nā wahi ākea o ka honua, E ʻimi i nā noho ʻana, nā mea ʻaʻole no lākou.

⁷ “He mea weliweli a me ka makaʻu ʻo ia; Nona iho kona kānāwai, a me kona hanohano.

⁸ “Ua ʻoi ka māmā o kona poʻe lio ma mua o ka leopadi, A ua ʻoi ko lākou māmā ma mua o nā ʻīlio hae i ke ahiahi; Holo haʻaheo kona poʻe holo lio, E hele mai kona poʻe hoʻoholo lio mai kahi lōʻihi mai; E lele lākou me he ʻaeto lā, e lalelale ana e ʻai.

⁹ “Hele mai lākou a pau no ka hao wale; A ʻo ke ʻano o ko lākou maka, ua like me ka makani hikina; A hoʻākoakoa lākou i ka poʻe pio e like me ke one.

¹⁰ “Hoʻomāʻewaʻewa aku nō ia i nā aliʻi, A lilo nā haku i mea henehene nona; Ua ʻakaʻaka nō ia i nā wahi paʻa a pau, A hana nō ia i puʻu lepo, a lawe pio nō ʻo ia ia mea.

¹¹ “A laila, e hoʻomāhuahua ʻo ia i kona ikaika, a e hele aku, A e luku aku, e ʻī aku, A ʻo kona mana anei kēia, ʻo kona akua ia?”

¹² ¶ ʻAʻole anei ʻoe mai kā kahiko mai, E Iēhova, kuʻu Akua, kuʻu Mea Hemolele? ʻAʻole mākou e make. ʻO ʻoe, e Iēhova, i hoʻonoho iā ia, no ka hoʻokolokolo ʻana, ʻO ʻoe, e ka Pōhaku, i kūkulu paʻa iā ia no ka hoʻopaʻi ʻana.

¹³ Ua maʻemaʻe loa kou mau maka, ʻAʻole ʻoe e nānā i ka hewa; ʻAʻole loa ʻoe e ʻike mai i ka pono ʻole; No ke aha ʻoe e nānā mai i ka poʻe lawehala? A e noho ʻekemu ʻole, I ka manawa e luku mai ai ka mea hewa i ka mea ua ʻoi ka pono ma mua ona?

¹⁴ Akā, ua hana ʻoe i ke kanaka e like me nā iʻa o ke kai, E like hoʻi me ka mea kolo, ʻaʻohe mea e aliʻi ana ma luna ona.

¹⁵ Huki nō ia iā lākou i luna me ka makau, A hei iho iā lākou i kāna ʻupena, A hōʻuluʻulu iā lākou i loko o kāna pahele; No laila, ʻoliʻoli nō ia, a hauʻoli hoʻi.

¹⁶ No ia hoʻi, mōhai aku nō ia no kāna ʻupena iho, A kuni i ka mea ʻala no kāna mea pahele; No ka mea, ma ia mau mea, ua waiwai kona noho ʻana, A ua momona kāna ʻai.

¹⁷ No laila hoʻi, e ninini anei ia i kāna ʻupena, A e luku mau loa nō hoʻi i nā lāhui kanaka?