KA BUKE MUA A MOSE, I KAPA ʻIA KINOHI 8 - Ka Baibala Hemolele

1 Ka emi ʻana o nā wai. 4 Ili ka hale lana ma ʻArarata. 7 ʻO ke koraka a me ka manu nūnū. 15 Ka haʻalele i ka hale lana. 20 Ke kuahu o Noa a me kāna mōhai. 21 ʻOluʻolu mai ke Akua. 22 ʻAʻole kai a Kahinaliʻi hou.

MOKUNA VIII.

¹ ¶ Hoʻomanaʻo ihola ʻo Iēhova iā Noa, a me nā mea ola a pau, a me nā holoholona a pau me ia i loko o ka hale lana; hoʻohuaʻi maila ke Akua i ka makani ma luna o ka honua, a emi ihola ka wai.

² Ua papani ʻia aʻela nā pūnāwai o ka hohonu, a me nā puka wai o ka lani, a mālie iho ka ua mai luna mai.

³ Hoʻi hou mau akula ka wai mai luna aʻe o ka honua; a ma hope o nā lā he haneri a me kanalima, ua emi ka wai.

⁴ A i ka hiku o ka malama, i ka lā ʻumikumamāhiku o ua malama lā, ili ihola ka hale lana ma nā kuahiwi o ʻArarata.

⁵ Emi mau ihola ka wai, a hiki i ka ʻumi o ka malama; i ka ʻumi o ka malama, i ka lā mua o ua malama lā, ua ʻikea nā wahi kiʻekiʻe o nā kuahiwi.

⁶ ¶ A hala nā lā he kanahā, wehe aʻela ʻo Noa i ka puka makani o ka hale lana āna i hana ai.

⁷ Hoʻokuʻu akula ia i kekahi koraka, nāna i lele aku a hoʻi mai ma kēlā wahi a ma kēia wahi, a maloʻo iho ka wai ma ka honua.

⁸ Hoʻokuʻu akula hoʻi ʻo ia i ka manu nūnū e ʻike i ka emi ʻana o ka wai mai ka ʻāina aku.

⁹ Akā, ʻaʻole i loaʻa i ua manu nūnū lā he wahi e maha ai ʻo kona wāwae, a hoʻi hou maila ia i ona lā i loko o ka hale lana; no ka mea, ua uhi ka wai ma luna o ka honua a pau; a laila, ʻō akula kona lima, lālau akula ʻo ia iā ia, a huki maila iā ia i ona lā i loko o ka hale lana.

¹⁰ Noho ihola ia i nā lā hou aku i ʻehiku; a hoʻokuʻu hou akula i ka manu nūnū i waho o ka hale lana.

¹¹ A ahiahi ihola, hoʻi maila ka manu nūnū i ona lā, aia hoʻi, he lau ʻoliva hou ma kona waha. Pēlā ʻo Noa i ʻike ai, ua emi iho ka wai mai luna aku o ka honua.

¹² Noho ihola ia i nā lā hou aku i ʻehiku; a hoʻokuʻu akula i ka manu nūnū; ʻaʻole nō ia i hoʻi hou mai i ona lā ma ia hope mai.

¹³ ¶ I ka makahiki ʻeono haneri a me kumamākahi, i ka malama hoʻokahi, a i ka lā mua o ua malama lā, maloʻo ihola ka wai mai ka honua aku; a wehe aʻela ʻo Noa i ke pani ma luna o ka hale lana, a nānā aʻela, aia hoʻi, ua maloʻo ka ʻāina.

¹⁴ A i ka lua o ka malama, i ka lā iwakāluakumamāhiku o ua malama lā, ua maloʻo iho ka honua.

¹⁵ ʻŌlelo maila ke Akua iā Noa, ʻī maila,

¹⁶ “E hele aku ʻoe i waho o ka hale lana, ʻo ʻoe, me kāu wahine, me āu mau keiki kāne, a me nā wāhine a kāu mau keiki kāne me ʻoe.

¹⁷ “E lawe pū mai me ʻoe i nā mea ola a pau iā ʻoe: ʻo nā mea ʻiʻo, ʻo nā manu, nā holoholona, a me nā mea kolo a pau e kolo ana ma luna o ka honua; i hānau nui ai lākou ma ka honua, i hua mai, a māhuahua ma luna o ka honua.”

¹⁸ Hele akula ʻo Noa me kāna mau keiki kāne, a me kāna wahine, a me nā wāhine a kāna mau keiki kāne me ia.

¹⁹ ʻO nā holoholona hoʻi a pau, ʻo nā mea kolo a pau, me nā manu a pau, a me nā mea a pau e kolo ana ma luna o ka honua, ma ko lākou mau ʻano iho, hele akula lākou i waho o ka hale lana.

²⁰ ¶ Hana ihola ʻo Noa i kuahu no Iēhova, lālau akula ia i kekahi o nā holoholona maʻemaʻe a pau, a ʻo nā manu maʻemaʻe a pau, a kaumaha akula i nā mōhai kuni ma luna o ke kuahu.

²¹ Honi maila ʻo Iēhova i ke ʻala ʻoluʻolu; ʻī ihola ʻo Iēhova i loko o kona naʻau, “ʻAʻole au e hōʻino hou i ka ʻāina no kānaka; no ka mea, ua hewa nō ka manaʻo ʻana o ko ke kanaka naʻau mai kona wā ʻōpiopio; ʻaʻole hoʻi au e luku hou aku i nā mea ola a pau, me aʻu i hana iho nei.

²² “E mau auaneʻi ka wā E kanu ai a e ʻohi ai; ke anu a me ka wela, Ke kau a me ka hoʻoilo, ka lā a me ka pō, A pau nā lā o ka honua.”