KA BUKE MUA A MOSE, I KAPA ʻIA KINOHI 7 - Ka Baibala Hemolele

1 No ke komo ʻana o Noa mā a me nā holoholona i loko o ka hale lana. 11 ʻO ke kai a Kahinaliʻi.

MOKUNA VII.

¹ ¶ ʻĪ maila ʻo Iēhova iā Noa, “E komo aʻe ʻoe me kāu ʻohana a pau i loko o ka hale lana; no ka mea, ʻo ʻoe nō o kēia hanauna kaʻu i ʻike ai, he pono i mua oʻu.

² “ʻO nā holoholona maʻemaʻe a pau, e lawe pāhiku aku ʻoe iā lākou me ʻoe, i ke kāne a me kāna wahine; a ʻo nā holoholona maʻemaʻe ʻole, e pāpālua he kāne me kāna wahine.

³ “E pāhiku ʻia nō hoʻi nā manu o ka lewa, ke kāne, ka wahine, e hoʻōla i kumu hoʻolaha ma luna o ka honua a pau.

⁴ “No ka mea, ʻehiku lā e koe, a laila e hoʻoua iho ai au ma luna o ka honua he kanahā lā a me nā pō; a e luku ana au i nā mea ola a pau aʻu i hana ai, mai ke alo o ka honua aku.”

⁵ Hana ihola ʻo Noa i nā mea a pau a Iēhova i kauoha mai ai iā ia.

⁶ ¶ ʻEono haneri nā makahiki o Noa i ka wā i hiki mai ai ke kai a Kahinaliʻi ma luna o ka honua.

⁷ Komo akula ʻo Noa me nā keiki kāne āna, a me kāna wahine, a me nā wāhine a kāna mau keiki kāne i loko o ka hale lana, no ke kai a Kahinaliʻi.

⁸ ʻO nā holoholona maʻemaʻe a me nā holoholona maʻemaʻe ʻole, a ʻo nā manu, a me nā mea kolo a pau ma luna o ka honua.

⁹ Komo pāpālua akula lākou i loko i o Noa lā, ke kāne, ka wahine, me kā ke Akua i kauoha mai ai iā Noa.

¹⁰ A hala aʻela nā lā ʻehiku, hiki mai ke kai a Kahinaliʻi ma luna o ka honua.

¹¹ I ka makahiki ʻeono haneri o ko Noa ola ʻana, i ka lua o ka malama, a ma ka lā ʻumikumamāhiku o ua malama lā, ia lā nō, huahuaʻi maila nā pūnāwai a pau o ka hohonu nui, a hāmama aʻela nā puka wai o ka lani.

¹² Hoʻokahi kanahā lā a me nā pō o ka ua ʻana ma luna o ka honua.

¹³ ¶ Ia lā hoʻokahi nō, komo aʻela ʻo Noa, a ʻo Sema, a ʻo Hama, a ʻo Iapeta, nā keiki kāne a Noa, a me ka wahine a Noa, a me nā wāhine ʻekolu a kāna mau keiki kāne me lākou, i loko o ka hale lana.

¹⁴ ʻO lākou me nā holoholona hihiu a pau ma ko lākou ʻano iho, a me nā holoholona laka a pau ma ko lākou ʻano iho, a me kēlā mea kolo kēia mea kolo, e kolo ana ma luna o ka honua ma kona ʻano iho, a me nā manu a pau ma ko lākou ʻano iho, ʻo nā mea ʻēheu a pau, o kēlā ʻano kēia ʻano.

¹⁵ Komo pāpālua aʻela lākou i o Noa lā i loko o ka hale lana, ʻo nā mea ʻiʻo a pau e hā ana i ka hanu ola.

¹⁶ He kāne he wahine o nā mea ʻiʻo a pau ka poʻe i komo aku i loko, me kā ke Akua i kauoha mai ai iā ia; a papani aʻela ʻo Iēhova i ka puka ma hope ona.

¹⁷ Hoʻokahi kanahā lā o ke kai a Kahinaliʻi ma luna o ka honua; māhuahua aʻela ka wai, a hoʻolana aʻela i ka hale lana, a ua kaʻikaʻi ʻia aʻela ia ma luna o ka honua.

¹⁸ Lanakila aʻela ka wai a māhuahua loa aʻela ma luna o ka honua; a holo akula ka hale lana ma luna o ka wai.

¹⁹ Lanakila loa aʻela ka wai ma luna o ka honua; a uhi ʻia aʻela nā kuahiwi kiʻekiʻe a pau loa ma lalo o ka lani.

²⁰ He ʻumikumamālima nā kūbita o ke kiʻekiʻe o ka wai ma luna; a uhi ʻia aʻela nā kuahiwi.

²¹ A make ihola nā mea ola a pau i holo ma luna o ka honua: ʻo nā manu, ʻo nā holoholona laka, ʻo nā holoholona hihiu, a ʻo nā mea kolo a pau e kolo ana ma luna o ka honua, a me nā kānaka a pau.

²² ʻO ka poʻe a pau nona ka hanu ola i loko o nā puka ihu, ʻo nā mea a pau ma ka ʻāina maloʻo, make ihola lākou.

²³ A pau loa ihola nā mea ola ma luna o ka honua i ka make, ʻo nā kānaka, me nā holoholona, a me nā mea kolo, a me nā manu o ka lewa; a ua hoʻopau ʻia lākou mai ka honua aku; ʻo Noa wale nō kai koe, a me ka poʻe me ia i loko o ka hale lana.

²⁴ A lanakila aʻela ka wai ma luna o ka honua, hoʻokahi haneri nā lā a me kanalima.