KA BUKE MUA A MOSE, I KAPA ʻIA KINOHI 50 - Ka Baibala Hemolele

1 Ke kanikau ʻana no ʻIseraʻela. 7 Ko lākou hele ʻana e kanu iā ia. 15 Hōʻoluʻolu ʻo Iosepa i kona poʻe hoahānau. 22 Kona ola ʻana a me kona make ʻana.

MOKUNA L.

¹ ¶ Hāʻule ihola ʻo Iosepa ma ka maka o kona makua kāne, a uē ihola ma luna iho, a honi akula.

² Kauoha aʻela ʻo Iosepa i kāna mau kauā, i nā kāhuna e iʻaloa i kona makua kāne, a iʻaloa nō nā kāhuna iā ʻIseraʻela.

³ A pau aʻela nā lā hoʻokahi kanahā nona; no ka mea, ʻo ia nā lā e pau ai ka iʻaloa ʻana o ka poʻe i iʻaloa ʻia; a kanikau ihola ko ʻAigupita nona i nā lā he kanahiku.

⁴ ¶ A pau aʻela nā lā kanikau, ʻōlelo akula ʻo Iosepa i nā kānaka o Paraʻo, ʻī akula, “Inā i loaʻa iaʻu ka lokomaikaʻi ʻia mai iā ʻoukou, ke noi aku nei au, e ʻōlelo aku ʻoukou ma ka pepeiao o Paraʻo, me ka ʻī aku,

⁵ ‘Na koʻu makua kāne i hoʻohiki ai au, ʻī maila ia, “Ē, e make ana au. E kanu ʻoe iaʻu, ma ka lua kupapaʻu aʻu i kōhi ai noʻu ma ka ʻāina i Kanaʻana. Ma laila ʻoe e kanu ai iaʻu.” E ʻae mai hoʻi ʻoe iaʻu ke piʻi aku a kanu i kuʻu makua kāne, a hoʻi hou mai nō.’”

⁶ ʻĪ maila ʻo Paraʻo, “Ō hele e kanu i kou makua kāne, e like me kāu i hoʻohiki ai nāna.”

⁷ Piʻi akula ʻo Iosepa e kanu i kona makua kāne, a piʻi pū akula me ia nā kauā a Paraʻo a pau, a me nā lunakahiko o kona hale, a me nā lunakahiko a pau o ka ʻāina ʻo ʻAigupita;

⁸ ʻo ko Iosepa poʻe a pau me kona poʻe hoahānau, a me ka poʻe a pau o kona makua kāne. ʻO nā kamaliʻi, a me nā hipa, a me nā bipi, ʻo ia wale nō kā lākou i waiho ai ma hope, ma ka ʻāina i Gosena.

⁹ Piʻi pū akula me ia nā kaʻa a me nā hoʻoholo lio; he poʻe nui loa.

¹⁰ Piʻi akula lākou i kahi hehi palaoa o ʻAtada, ma ʻō aku o Ioredane, a ma laila lākou i uē ai me ka uē nui loa, a kanikau ihola lākou i kona makua kāne i nā lā ʻehiku.

¹¹ A ʻike aʻela ka poʻe noho ma ia ʻāina, ʻo ko Kanaʻana i ua kanikau nei, ma kahi hehi palaoa o ʻAtada, ʻōlelo ihola lākou, “He kanikau nui loa kēia a ko ʻAigupita”; no ia mea, ua kapa ʻia akula ka inoa ʻo ʻAbela Mizeraima, aia ma ʻō aku o Ioredane.

¹² A hana akula kāna mau keiki iā ia e like me kāna i kauoha ai iā lākou.

¹³ Lawe akula nō kāna mau keiki iā ia, i ka ʻāina ʻo Kanaʻana, a kanu ihola iā ia ma ke ana i loko o ke kula, ma Makepela, na ʻAberahama i kūʻai ia kula i wahi ilina nona, me ʻEperona no kā Heta, aia ma ke alo o Mamere.

¹⁴ A pau ke kanu ʻana i kona makua kāne, hoʻi akula ʻo Iosepa i ʻAigupita, ʻo ia, a me kona poʻe hoahānau a pau i hele pū me ia e kanu i kona makua kāne.

¹⁵ ¶ A ʻike ihola nā kaikuaʻana o Iosepa, ua make ko lākou makua kāne, ʻōlelo lākou, “E ukiuki mai auaneʻi ʻo Iosepa iā kākou; e ʻoiaʻiʻo nō, e hoʻopaʻi mai ia i ka hewa a pau a kākou i hana aku ai iā ia.”

¹⁶ Kauoha aʻela lākou iā Iosepa, ʻī aʻela, “Kauoha maila kou makua kāne, ma mua o kona make ʻana, ʻī maila,

¹⁷ ʻE ʻī aku ʻoukou iā Iosepa, “Ke nonoi aku nei mākou iā ʻoe, e kala ʻoe i ka hewa o kou poʻe kaikuaʻana, a me ko lākou hala; no ka mea, ua hana hewa lākou iā ʻoe.”’ ʻĀnō hoʻi, e kala ʻoe i ka hewa o nā kauā a ke Akua o kou makua kāne.” Uē ihola ʻo Iosepa i kā lākou ʻōlelo ʻana mai iā ia.

¹⁸ Hele aʻela hoʻi kona poʻe kaikuaʻana, hāʻule ihola ma kona alo, ʻī aʻela, “ʻO kāu mau kauā mākou.”

¹⁹ ʻĪ maila ʻo Iosepa iā lākou, “Mai makaʻu ʻoukou, ʻO wau anei ma ko ke Akua wahi?

²⁰ “I manaʻo nō ʻoukou e hana ʻino mai iaʻu, a hoʻololi mai ke Akua ia mea, i mea maikaʻi, e hana mai ai e like me ia i nēia lā, e hoʻōla i nā kānaka he nui loa.

²¹ “Mai makaʻu; naʻu nō ʻoukou e mālama aku i ka ʻai, a me kā ʻoukou poʻe keiki.” Hōʻoluʻolu maila ia iā lākou, a ʻōlelo lokomaikaʻi maila i ko lākou naʻau.

²² ¶ Noho ihola ʻo Iosepa ma ʻAigupita, ʻo ia, a me ka ʻohana a kona makua kāne; a ʻo nā makahiki o ko Iosepa ola ʻana, hoʻokahi haneri a me ka ʻumi keu.

²³ A ʻike ihola ʻo Iosepa i nā keiki a ʻEperaima a me ke kuakolu, a me nā keiki a Makira, ke keiki a Manase, ʻo ka mea i hānau ʻia ma nā kuli o Iosepa.

²⁴ ʻĪ aʻela ʻo Iosepa i kona poʻe hoahānau, “E make ana au. E ʻoiaʻiʻo nō, e ʻike mai ke Akua iā ʻoukou, a e hoʻihoʻi aku iā ʻoukou, mai kēia ʻāina aku, a ka ʻāina āna i hoʻohiki ai iā ʻAberahama a iā ʻIsaʻaka, a iā Iakoba.”

²⁵ Na Iosepa nō, nā mamo a ʻIseraʻela i hoʻohiki ai, ʻī aʻela, “E ʻoiaʻiʻo nō, e ʻike mai ke Akua iā ʻoukou, a e lawe aku ʻoukou i koʻu mau iwi, mai ʻaneʻi aku.”

²⁶ A make ihola ʻo Iosepa ma ka makahiki o kona ola ʻana, hoʻokahi haneri a me ka ʻumi keu. A iʻaloa ihola lākou iā ia a waiho ihola ma loko o ka pahu ma ʻAigupita.