KA BUKE MUA A MOSE, I KAPA ʻIA KINOHI 5 - Ka Baibala Hemolele

1 Ka moʻoʻōlelo kūʻauhau no ʻAdamu a hiki i ka wā o Noa. 24 Ua lawe ola ʻia aku ʻo ʻEnoka. 27 ʻO ka mea i ʻoi loa kona mau makahiki.

MOKUNA V.

¹ ¶ Eia ka ʻōlelo kūʻauhau no nā hanauna o ʻAdamu. I ka lā a ke Akua i hana ai ke kanaka, ma ke ʻano o ke Akua kāna i hana mai ai iā ia.

² He kāne lāua me ka wahine kāna i hana ai; hoʻomaikaʻi ihola ʻo ia iā lāua, a kapa ihola i ko lāua inoa ʻo ʻAdamu, i ka lā i hana ʻia ai ʻo lāua.

³ Hoʻokahi haneri makahiki o ko ʻAdamu ola ʻana a me kanakolu, a hānau mai nāna ke keiki kāne i kū iā ia, ma kona ʻano iho; a kapa akula i kona inoa ʻo Seta.

⁴ ʻO nā lā o ʻAdamu ma hope mai o ka hānau ʻana o Seta, ʻewalu ia haneri makahiki; a nāna mai nā keiki kāne a me nā kaikamāhine.

⁵ ʻO nā lā a pau o ko ʻAdamu ola ʻana, he ʻeiwa haneri makahiki a me kanakolu; a make ihola ia.

⁶ ¶ Hoʻokahi haneri makahiki a me kumamālima o ko Seta ola ʻana, a hānau aʻela ʻo ʻEnosa nāna.

⁷ ʻEwalu haneri makahiki o ko Seta ola ʻana a me kumamāhiku ma hope mai o ka hānau ʻana o ʻEnosa, a nāna mai nā keiki kāne a me nā kaikamāhine.

⁸ ʻO nā lā a pau o Seta, ʻeiwa ia haneri makahiki a me ka ʻumikumamālua; a make ihola ia.

⁹ ¶ He kanaiwa makahiki o ko ʻEnosa ola ʻana, a hānau aʻela ʻo Kainana.

¹⁰ ʻEwalu haneri makahiki a me ka ʻumikumamālima o ko ʻEnosa ola ʻana, ma hope mai o ka hānau ʻana o Kainana, a nāna mai nā keiki kāne a me nā kaikamāhine.

¹¹ ʻO nā lā a pau o ʻEnosa, ʻeiwa haneri makahiki a me kumamālima; a make ihola ia.

¹² ¶ He kanahiku nā makahiki o ko Kainana ola ʻana, a hānau mai ʻo Mahalaleʻela nāna.

¹³ Ma hope mai o ka hānau ʻana o Mahalaleʻela, ʻewalu haneri makahiki o ko Kainana ola ʻana a me kanahā, a nāna mai nā keiki kāne a me nā kaikamāhine.

¹⁴ A ʻo nā lā a pau o Kainana, ʻeiwa haneri makahiki a me ka ʻumi keu; a make ihola ia.

¹⁵ ¶ He kanaono nā makahiki a me kumamālima o ko Mahalaleʻela ola ʻana, a hānau aʻela ʻo Iareda nāna.

¹⁶ Ma hope mai o ko Iareda hānau ʻana, ʻewalu haneri makahiki a me ke kanakolu o ko Mahalaleʻela ola ʻana, a nāna mai nā keiki kāne a me nā kaikamāhine.

¹⁷ ʻO nā lā a pau o Mahalaleʻela, ʻewalu ia haneri makahiki a me kanaiwakumamālima; a make ihola ia.

¹⁸ ¶ Hoʻokahi haneri makahiki o ko Iareda ola ʻana a me kanaonokumamālua, a hānau aʻela ʻo ʻEnoka nāna.

¹⁹ Ma hope mai o ka hānau ʻana o ʻEnoka, ʻewalu haneri makahiki o ko Iareda ola ʻana, a nāna mai nā keiki kāne a me nā kaikamāhine.

²⁰ ʻO nā lā a pau o Iareda, ʻeiwa ia haneri makahiki a me ke kanaonokumamālua; a make ihola ia.

²¹ ¶ He kanaonokumamālima nā makahiki o ko ʻEnoka ola ʻana, a hānau aʻela ʻo Metusala nāna.

²² Hele pū aʻela ʻo ʻEnoka me ke Akua, ʻekolu haneri makahiki ma hope mai o ka hānau ʻana o Metusala, a nāna mai nā keiki kāne a me nā kaikamāhine.

²³ ʻO nā lā a pau o ʻEnoka, ʻekolu haneri nā makahiki a me kanaonokumamālima.

²⁴ Hele pū aʻela ʻo ʻEnoka me ke Akua, ʻaʻole ia i make; no ka mea, na ke Akua ia i lawe aku.

²⁵ ¶ Hoʻokahi haneri makahiki o ko Metusala ola ʻana a me kanawalukumamāhiku, a hānau aʻela ʻo Lameka nāna.

²⁶ Ma hope mai o ka hānau ʻana o Lameka, ʻehiku haneri me ke kanawalukumamālua nā makahiki o ko Metusala ola ʻana, a nāna mai nā keiki kāne a me nā kaikamāhine.

²⁷ ʻO nā lā a pau o Metusala, ʻeiwa haneri nā makahiki a me kanaonokumamāiwa; a make ihola ia.

²⁸ ¶ Hoʻokahi haneri nā makahiki a me ke kanawalukumamālua o ko Lameka ola ʻana, a hānau aʻela ke keiki kāne nāna.

²⁹ Kapa akula ia i kona inoa, ʻo Noa, ʻī aʻela, “E hoʻomaha mai ʻo ia nei iā kākou i kā kākou hana ʻana a me ka luhi ʻana a ko kākou mau lima, no ka honua a Iēhova i hōʻino mai ai.”

³⁰ Ma hope mai o ka hānau ʻana o Noa, ʻelima haneri nā makahiki a me kanaiwakumamālima o ko Lameka ola ʻana, a nāna mai nā keiki kāne a me nā kaikamāhine.

³¹ A ʻo nā lā a pau o Lameka, ʻehiku haneri makahiki a me kanahikukumamāhiku; a make ihola ia.

³² ¶ ʻElima haneri makahiki o Noa; a nāna mai ʻo Sema, a ʻo Hama, a me Iapeta.