KA BUKE MUA A MOSE, I KAPA ʻIA KINOHI 49 - Ka Baibala Hemolele

1 Kā Iakoba hoʻomaikaʻi ʻana i kāna mau keiki kāne. 29 Kāna kauoha i ke kanu ʻana iā ia iho. 33 Kona make ʻana.

MOKUNA XLIX.

¹ ¶ Kāhea akula ʻo Iakoba i kāna mau keiki kāne, ʻī akula, “E hōʻuluʻulu mai iā ʻoukou iho i haʻi aku ai au iā ʻoukou i nā mea e hiki mai ana i o ʻoukou lā i nā lā ma hope.

² “E hōʻuluʻulu mai iā ʻoukou iho, e lohe, e nā keiki a Iakoba; E hoʻolohe mai iā ʻIseraʻela i ko ʻoukou makua kāne.

³ ¶ “E Reubena ē, ʻo ʻoe nō kaʻu hiapo, ʻO koʻu ikaika, a me ka hoʻomaka ʻana o ka uʻi oʻu; Ke kela ʻana i ka hanohano, ke kela ʻana i ka mana.

⁴ “He hū wale me he wai lā, ʻaʻole ʻoe e kela aku; No ka mea, piʻi akula ʻoe i ka moe o kou makua kāne; A laila ʻoe i hoʻohaumia iho ai; Piʻi akula ia i kuʻu wahi moe.

⁵ ¶ “ʻO Simeona lāua ʻo Levi, he mau hoahānau lāua; Aia nā mea hoʻomāinoino ma ko lāua hoʻolimalima.

⁶ “Ma ko lāua wahi ʻōhumu ʻaʻole e hele aku kuʻu ʻuhane, Ma ko lāua hālāwai ʻaʻole e hui pū ʻia aku koʻu nani; No ka mea, no ko lāua inaina pepehi ihola lāua i ke kanaka, A no ko lāua makemake ʻoki ihola lāua i ke olonā wāwae o ka bipi.

⁷ “E hōʻino ʻia kā lāua inaina; no ka mea, he ʻino ia, A me ko lāua huhū; no ka mea, he koʻikoʻi ia! E mahelehele au iā lāua i loko o kā Iakoba, A e hoʻopuehu au iā lāua i loko o kā ʻIseraʻela.

⁸ ¶ “E Iuda ē, ʻo ʻoe ka mea a nā hoahānau ou e hoʻomaikaʻi ai; ʻO kou lima, aia nō ia ma ka ʻāʻī o kou poʻe ʻenemi; E kūlou iho hoʻi nā keiki a kou makua kāne i mua ou.

⁹ “He keiki a ka liona o Iuda, Ua piʻi aʻe ʻoe, e kuʻu keiki, mai ke pio aʻe. Kukuli ihola ia, a moe ihola me he liona kāne lā, A me ka liona wahine; na wai ia e hoʻāla aʻe?

¹⁰ “ʻAʻole e lilo aku ke koʻokoʻo aliʻi mai o Iuda aku, ʻAʻole hoʻi ka mea wehewehe kānāwai mai waena aku o kona mau wāwae, A hiki mai ai ʻo Silo; A iā ia ke ʻākoakoa ʻana aʻe o nā kānaka.

¹¹ “E hīkiʻi ana i kāna keiki hoki i ke kumu waina, A me ke keiki a ka hoki wahine i ke kumu waina maikaʻi, Holoi ihola ia i kona kapa i ka waina, A me kona ʻaʻahu i ke koko o ka hua waina.

¹² “E ʻulaʻula kona mau maka i ka waina, E keʻokeʻo hoʻi kona mau niho i ka waiū.

¹³ ¶ “E noho auaneʻi ʻo Zebuluna ma ke kahakai; ʻO ia nō ke kahakai no nā moku; a e hiki aku kona palena i Sidona.

¹⁴ ¶ “He hoki ikaika nō ʻo ʻIsakara, E moe ana ma waena o nā hale malumalu;

¹⁵ “ʻIke ihola ia i ka maha he maikaʻi ia, A i ka ʻāina he ʻoluʻolu ia; Kūlou ihola ia i kona hokua i ka ukana, A lilo ihola ia i kauā e ʻauhau ʻia ai.

¹⁶ ¶ “E hoʻoponopono ʻo Dana i kona hanauna kanaka, E like me kekahi o nā ʻohana o ʻIseraʻela.

¹⁷ “He nahesa ʻo Dana ma kapa alanui, He moʻolele ma ke ala; Nāna e nahu aku nā kuʻekuʻe wāwae o ka lio, A e hāʻule hope iho ka mea e hoʻoholo ana iā ia.

¹⁸ “Ua kali au i kou hoʻōla ʻana, e Iēhova!

¹⁹ ¶ “ʻO Gada, e lanakila mai ka poʻe kaua ma luna ona, Akā, e lanakila aku ʻo ia ma ka hope.

²⁰ ¶ “Mai ʻAsera mai kāna ʻai momona, A e hāʻawi aku ia i nā mea ʻono na nā aliʻi.

²¹ ¶ “ʻO Napetali, he dia wahine ia i kala ʻia aku; Ke hua mai nei ia i nā hua ʻōlelo maikaʻi.

²² ¶ “He lālā hua ʻo Iosepa, He lālā hua ma ka pūnāwai; Ke kolo aʻe nei nā lālā ona ma luna o ka pā.

²³ “Ua hoʻoʻeha nui mai, a ua pana mai hoʻi nā mea pana iā ia, A ua inaina mai lākou iā ia.

²⁴ “Akā, ua mau nō kona kakaka i ka ikaika, A ua hoʻoikaika ʻia kona mau lima e nā lima o ka Mea Mana o Iakoba (No laila mai ke Kahu Hipa, ka Pōhaku no ʻIseraʻela;)

²⁵ E ke Akua o kou makua, nāna ʻoe e kōkua mai; E ka Mea Mana Loa hoʻi, nāna ʻoe e hoʻomaikaʻi mai I nā mea maikaʻi o ka lani i luna, A ʻo ka hohonu i lalo, i nā mea maikaʻi o ka ū, a ʻo ka ʻōpū.

²⁶ “Ua ʻoi aku ka hoʻomaikaʻi ʻana o kou makua kāne Ma luna o nā hoʻomaikaʻi ʻana o nā mauna mau, A hiki aku hoʻi i nā mokuna o nā puʻu kahiko loa. Ma luna nō auaneʻi ia o ke poʻo o Iosepa, A ma luna hoʻi o ka piko o ke poʻo o ka mea i hoʻokaʻawale ʻia aʻe Mai kona poʻo hanauna aku.

²⁷ ¶ “E haehae ʻo Beniamina me he ʻīlio hae lā; I ke kakahiaka e ʻai iho ia i ke pio, a i ke ahiahi e puʻunaue ia i ka waiwai pio.”

²⁸ ʻO kēia poʻe a pau, ʻo ka poʻe ʻohana ia a ʻIseraʻela he ʻumikumamālua; a ʻo ia ka mea a ko lākou makua kāne i ʻōlelo mai ai iā lākou, a i hoʻomaikaʻi mai ai iā lākou; i kēlā kanaka kēia kanaka e like me ka hoʻomaikaʻi ʻana, āna i hoʻomaikaʻi mai ai iā lākou.

²⁹ Kauoha akula ʻo ia iā lākou, ʻī akula, “E hui pū ana au me koʻu poʻe mākua; e kanu pū hoʻi ʻoukou iaʻu me nā mākua oʻu ma ke ana ma loko o ke kula ʻo ʻEperona, no kā Heta,

³⁰ “Ma ke ana i loko o ke kula ma Makepela, ma ke alo o Mamere, ma ka ʻāina ʻo Kanaʻana, ʻo ke kula a ʻAberahama i kūʻai ai me ʻEperona, no kā Heta, i wahi ilina kupapaʻu nona.

³¹ “Ma laila lākou i kanu ai iā ʻAberahama, a me kāna wahine me Sara, a ma laila lākou i kanu ai iā ʻIsaʻaka a me kāna wahine me Rebeka, a ma laila hoʻi au i kanu ai iā Lea.

³² “Ua kūʻai ʻia ke kula, a me ke ana i loko me nā mamo a Heta.”

³³ A pau kā Iakoba kauoha ʻana i kāna poʻe keiki, ʻōpili aʻela ia i kona mau wāwae ma luna o kahi moe, kāʻili akula ke aho, a hui pū ʻia ihola ia me kona poʻe mākua.