KA BUKE MUA A MOSE, I KAPA ʻIA KINOHI 48 - Ka Baibala Hemolele

5 Ka hoʻomaikaʻi ʻana o ʻIseraʻela i nā keiki a Iosepa. 21 No ko lākou hoʻi ʻana i Kanaʻana.

MOKUNA XLVIII.

¹ ¶ A ma hope iho o kēia mau mea, haʻi akula kekahi iā Iosepa, “Ua maʻi kou makua kāne.” Lawe aʻela ia i kāna mau keiki kāne, iā Manase lāua ʻo ʻEperaima.

² A haʻi aʻela kekahi iā Iakoba, ʻī aʻela, “Eia aʻe kāu keiki ʻo Iosepa, ke hele maila i ou nei.” Hoʻoikaika aʻela ʻo ʻIseraʻela, a noho ihola ma kahi moe.

³ ʻŌlelo akula ʻo Iakoba iā Iosepa, “ʻIkea maila ke Akua Mana iaʻu ma Luza, ma ka ʻāina ʻo Kanaʻana, a hoʻomaikaʻi maila ia iaʻu.

⁴ “ʻĪ maila, ‘E hoʻomāhuahua aku au iā ʻoe; a e hoʻonui aku iā ʻoe, a e hoʻolilo iā ʻoe i lāhui kanaka nui loa, a e hāʻawi aku i kēia ʻāina, no kāu poʻe mamo ma hope ou, i hoʻoilina mau loa.’

⁵ “A ʻo nā keiki āu ʻelua, i hānau ʻia mai nāu ma ka ʻāina i ʻAigupita nei, i ka wā ma mua aku o koʻu hele ʻana mai iā ʻoe i ʻAigupita nei, naʻu nō lāua. ʻO ʻEperaima a ʻo Manase, e like me Reubena a me Simeona, pēlā nō lāua naʻu.

⁶ “A ʻo kāu mau keiki i hānau ʻia mai nāu, ma hope mai o lāua e kapa ʻia lākou ma ka inoa o ko lākou mau kaikuaʻana ma ko lākou noho ʻana.

⁷ “I koʻu hele ʻana mai, mai Padana mai, make aʻela ʻo Rāhela ma koʻu ʻaoʻao, ma ka ʻāina ʻo Kanaʻana, ma ke ala, kokoke e hiki aku i ʻEperata, a kanu ihola au iā ia ma laila ma ke ala ma ʻEperata, ʻo ia hoʻi ʻo Betelehema.”

⁸ ¶ A ʻike akula ʻo ʻIseraʻela i nā keiki a Iosepa, nīnau akula ia, “ʻO wai lāua nei?”

⁹ ʻĪ maila ʻo Iosepa i kona makua kāne, “ʻO lāua nei nā keiki aʻu, a ke Akua i hāʻawi mai ai naʻu ma kēia wahi.” ʻĪ maila kēlā, “E hoʻonoho ʻoe iā lāua i mua oʻu, a e hoʻomaikaʻi aku au iā lāua.”

¹⁰ Kaumaha nō nā maka o ʻIseraʻela, no ka ʻelemakule, ʻaʻole hiki iā ia ke nānā; a hoʻonoho mai kēlā iā lāua i mua ona, a honi akula ʻo ia iā lāua, a pūliki ihola.

¹¹ ʻĪ aʻela ʻo ʻIseraʻela iā Iosepa, “ʻAʻole au i manaʻo e ʻike aku i kou maka, aia hoʻi, ua hōʻike mai ke Akua iaʻu i kāu mau keiki.”

¹² A lawe maila ʻo Iosepa iā lāua ma waena mai o kona mau kuli, a kūlou ihola ia me ka maka i lalo i ka honua.

¹³ Lawe ihola ʻo Iosepa iā lāua a ʻelua, iā ʻEperaima i kona lima ʻākau, ma ka lima hema o ʻIseraʻela, a iā Manase, i kona lima hema ma ka lima ʻākau o ʻIseraʻela, a hoʻonoho ihola iā lāua i mua ona.

¹⁴ Hohola akula ʻo ʻIseraʻela i kona lima ʻākau, a kau ihola ma ke poʻo o ʻEperaima, ʻo ia hoʻi ke kaikaina, a i kona lima hema hoʻi, ma ke poʻo o Manase; kau akamai nō ia i kona lima; no ka mea, ʻo Manase ka hānau mua.

¹⁵ Hoʻomaikaʻi maila ʻo ia iā Iosepa, ʻī maila, “Na ke Akua, ka mea a koʻu mau mākua o ʻAberahama a me ʻIsaʻaka i hele aʻe i mua ona, Na ke Akua nāna wau i mālama mai, mai koʻu wā ʻuʻuku a hiki loa mai i nēia lā;

¹⁶ “Na ka ʻānela i hoʻopakele mai iaʻu mai loko mai o ka hewa a pau, E hoʻomaikaʻi ia mau keiki, A e hea ʻia koʻu inoa ma luna o lāua, a me ka inoa o koʻu makua ʻo ʻAberahama, a me ʻIsaʻaka, A e laha loa lāua i poʻe nui i waena o ka honua.”

¹⁷ A ʻike akula ʻo Iosepa, ua kau aku kona makua kāne i kona lima ʻākau ma ke poʻo o ʻEperaima, ua hewa ia i kona maka; hāpai aʻela ia i ka lima o kona makua kāne e hoʻihoʻi aʻe, mai ke poʻo aʻe o ʻEperaima a i ke poʻo o Manase.

¹⁸ ʻĪ akula ʻo Iosepa i kona makua kāne, “ʻAʻole pēlā, e koʻu makua kāne, ʻo ke kaikuaʻana kēia, e kau ʻoe i kou lima ʻākau ma luna o kona poʻo.”

¹⁹ Hōʻole maila kona makua kāne, ʻī maila, “Ua ʻike au, e kuʻu keiki, ua ʻike au, e lilo nō hoʻi ia i lāhui kanaka a e nui nō ia; akā, ʻo kona kaikaina, e kela aku kona nui ma mua o kēia, a e lilo ana ia i lāhui kanaka nui loa.”

²⁰ Hoʻomaikaʻi akula ʻo ia iā lāua ia lā, ʻī akula, “I loko ou e hoʻomaikaʻi aku kā ʻIseraʻela,” me ka ʻī ʻana aku, “E hoʻohālike mai ke Akua iā ʻoe me ʻEperaima a me Manase.” Hoʻonoho nō ʻo ia iā ʻEperaima ma mua o Manase.

²¹ ʻĪ maila ʻo ʻIseraʻela iā Iosepa, “Eia hoʻi, ua kokoke au e make, a e noho ana nō ke Akua me ʻoukou, a e hoʻihoʻi aku nō ia iā ʻoukou i ka ʻāina o ko ʻoukou poʻe mākua.

²² “Ua hāʻawi hoʻi au iā ʻoe i kekahi puʻu waiwai ma luna o kou poʻe hanauna, i ka mea aʻu i loaʻa ai ma ka lima o ka ʻAmora, me kuʻu pahi kaua a me kuʻu kakaka.”