KA BUKE MUA A MOSE, I KAPA ʻIA KINOHI 47 - Ka Baibala Hemolele

1 Hōʻike Iosepa i kekahi o nā hoahānau, a me kona makua kāne iā Paraʻo. 11 Hāʻawi i ʻāina no lākou. 13 Lilo ke kālā o ʻAigupita no Paraʻo, 20 a kūʻai ʻia hoʻi ka ʻāina nona. 27 Ko Iakoba noho ʻana ma ʻAigupita.

MOKUNA XLVII.

¹ ¶ Hele aʻela ʻo Iosepa, haʻi akula iā Paraʻo, ʻī akula, “Ua hiki mai nei koʻu makua kāne a me koʻu poʻe hanauna, a me kā lākou hipa, a me kā lākou holoholona, a me kā lākou mea a pau, mai ka ʻāina mai ‘o Kanaʻana, aia hoʻi lākou ma ka ʻāina, i Gosena.”

² Lawe aʻela ia i ʻelima o kona poʻe hanauna, hoʻonoho ihola iā lākou i mua o Paraʻo.

³ ʻŌlelo maila ʻo Paraʻo i nā hoahānau o Iosepa, “He aha kā ʻoukou ʻoihana?” ʻĪ maila lākou iā Paraʻo, “He poʻe kahu hipa kāu poʻe kauā nei, ʻo mākou a me ko mākou poʻe mākua.”

⁴ ʻĪ hou maila lākou iā Paraʻo, “Ua hele mai nei mākou e noho ma kēia ʻāina; no ka mea, ʻaʻole ʻai na ka poʻe holoholona a kāu poʻe kauā, no ka nui o ka wī ma ka ʻāina ʻo Kanaʻana. No ia mea, ke noi aku nei mākou iā ʻoe, e noho mākou ma ka ʻāina i Gosena”

⁵ A ʻōlelo maila ʻo Paraʻo iā Iosepa, ʻī maila, “Ua hiki mai i ou lā kou makua kāne a me nā hoahānau ou.

⁶ “ʻO ka ʻāina ʻo ʻAigupita, eia nō ia i mua ou; i ka ʻāina maikaʻi nui, e hoʻonoho ai ʻoe i kou makua kāne a me nā hoahānau ou; e noho iho lākou i ka ʻāina ʻo Gosena. A inā i ʻike ʻoe i nā kānaka akamai o lākou, e hoʻonoho ʻoe iā lākou i mau kahu no kaʻu poʻe holoholona.”

⁷ Alakaʻi maila ʻo Iosepa iā Iakoba i kona makua kāne, a hoʻonoho maila iā ia i mua o Paraʻo. Hoʻomaikaʻi akula ʻo Iakoba iā Paraʻo.

⁸ Nīnau maila ʻo Paraʻo iā Iakoba, “ʻEhia lā nā makahiki o kou ola ʻana?”

⁹ ʻĪ akula ʻo Iakoba iā Paraʻo, “ʻO nā lā o koʻu mau makahiki i noho malihini ai, hoʻokahi ia haneri makahiki a me kanakolu. He hapa a he ʻino hoʻi nā lā o koʻu mau makahiki e ola nei; ʻaʻole naʻe i loaʻa iaʻu nā lā a me nā makahiki o koʻu poʻe kūpuna i ko lākou noho malihini ʻana.”

¹⁰ Hoʻomaikaʻi akula ʻo Iakoba iā Paraʻo, a hele akula mai ke alo aku o Paraʻo.

¹¹ Hoʻonoho ihola ʻo Iosepa i kona makua kāne a me kona poʻe hoahānau, a hāʻawi akula ʻo ia iā lākou i wahi e noho ai ma ka ʻāina ʻo ʻAigupita, i kahi ʻāina maikaʻi, i ka ʻāina ‘o Ramese, e like me ke kauoha ʻana mai a Paraʻo.

¹² Mālama akula ʻo Iosepa i kona makua kāne, a me kona poʻe hoahānau, a me ka ʻohana a kona makua kāne a pau i ka ʻai, e like me nā waha o ka ʻohana.

¹³ ¶ ʻAʻole ʻai ma ka ʻāina a pau; no ka mea, ua hanahana loa ka wī. Oki loa ihola ka ʻāina ʻo ʻAigupita a me ka ʻāina ʻo Kanaʻana i ka wī.

¹⁴ Hoʻoʻiliʻili ihola ʻo Iosepa i ke kālā a pau loa ma ka ʻāina ʻo ʻAigupita, a ma ka ʻāina ʻo Kanaʻana, no ka ʻai a lākou i kūʻai ai; a lawe maila ʻo Iosepa i ke kālā i loko o ka hale o Paraʻo.

¹⁵ Pau ihola ke kālā ma ka ʻāina ʻo ʻAigupita, a ma ka ʻāina ʻo Kanaʻana, a hele maila ko ʻAigupita a pau i o Iosepa lā, ʻī maila, “Hō mai i ʻai na mākou, no ke aha lā mākou e make ai i mua o kou alo i ka pau ʻana o ke kālā?”

¹⁶ ʻĪ maila ʻo Iosepa iā lākou, “Inā i pau ke kālā, hō mai i kā ʻoukou holoholona, a e hāʻawi aku au i ʻai na ʻoukou no kā ʻoukou holoholona.”

¹⁷ Lawe maila lākou i kā lākou holoholona iā Iosepa, a hāʻawi akula ʻo Iosepa i ʻai na lākou, no nā lio, a no nā hipa, a no nā bipi, a no nā hoki, a mālama akula ʻo ia iā lākou i ka ʻai ia makahiki, no kā lākou holoholona.

¹⁸ A pau aʻela ia makahiki, hele maila lākou iā ia, i ka lua o nā makahiki, ʻī maila iā ia, “ʻAʻole mākou e hūnā mai ko mākou haku aku, i ka pau ʻana o ko mākou kālā, a me kā mākou holoholona iā ʻoe i ko mākou haku. ʻAʻohe mea i koe i mua ou, ʻo ko mākou kino, a me ko mākou ʻāina wale nō.

¹⁹ “No ke aha lā mākou e make ai i mua o kou mau maka, ʻo mākou a me ko mākou ʻāina? E kūʻai ʻoe iā mākou a me ko mākou ʻāina, no ka ʻai, a lilo mākou a me ko mākou ʻāina i kauā na Paraʻo. E hāʻawi mai hoʻi i hua, i ola mākou, ʻaʻole hoʻi e make, i ʻole ai e neoneo ka ʻāina.”

²⁰ ¶ Kūʻai ihola ʻo Iosepa i ka ʻāina a pau i ʻAigupita no Paraʻo; no ka mea, kūʻai akula nā kānaka a pau o ʻAigupita i ko lākou ʻāina; no ka mea, ua hanahana loa ka wī ma luna o lākou, a lilo aʻela ka ʻāina no Paraʻo.

²¹ A lawe aʻela ia i kānaka o kekahi kihi, a hoʻonoho iā lākou ma nā kūlanakauhale ma kēlā kihi o ka ʻāina.

²² ʻO ka ʻāina o nā kāhuna, ʻaʻole ia i kūʻai; no ka mea, na Paraʻo mai, kā nā kāhuna, a ʻai ihola lākou i ka mea a Paraʻo i hāʻawi mai ai na lākou, no ia mea, ʻaʻole lākou i kūʻai i ko lākou ʻāina.

²³ ʻŌlelo iho ʻo Iosepa i kānaka, “Eia hoʻi, ua kūʻai au iā ʻoukou i kēia lā no Paraʻo, a me ko ʻoukou ʻāina; eia nō ka hua na ʻoukou e kanu i ka ʻāina.

²⁴ “Eia hoʻi kekahi, i ka hua ʻana mai, e hāʻawi ʻoukou i ka hapalima na Paraʻo, a koe nō ʻehā mau hapa na ʻoukou, i mea kanu o ka ʻāina, a i mea ʻai na ʻoukou, a na ko ʻoukou kānaka, a i mea ʻai hoʻi na kā ʻoukou kamaliʻi.”

²⁵ ʻĪ maila lākou, “Ua hoʻōla mai ʻoe iā mākou, inā e loaʻa iā mākou ka lokomaikaʻi ʻia mai i mua o nā maka o koʻu haku, a e lilo auaneʻi mākou i poʻe kauā na Paraʻo.”

²⁶ Hoʻopaʻa ihola ʻo Iosepa ia mea i kānāwai, mai ia manawa mai, ma ka ʻāina ʻo ʻAigupita, na Paraʻo ka hapalima o ka ʻai; ʻo ka ʻāina o nā kāhuna wale nō kai koe, ʻaʻole ia i lilo na Paraʻo.

²⁷ ¶ Noho ihola ʻo ʻIseraʻela, ma ka ʻāina ʻo ʻAigupita, i ka ʻāina ʻo Gosena, a loaʻa maila iā lākou ka waiwai i laila, a hānau maila lākou, a lilo aʻela i poʻe nui loa.

²⁸ ʻO nā makahiki o ka noho ʻana o Iakoba i ka ʻāina ʻo ʻAigupita, he ʻumikumamāhiku; a ʻo nā makahiki a pau o ke ola ʻana o Iakoba, hoʻokahi haneri makahiki a me kanahākumamāhiku.

²⁹ A kokoke akula ka lā e make ai ʻo ʻIseraʻela, hea akula ia i kāna keiki iā Iosepa, ʻī akula iā ia, “Inā i loaʻa mai iaʻu ke aloha ʻia i mua o kou maka, e kau mai ʻoe i kou lima ma lalo o koʻu ʻūhā, a e hana mai ʻoe iaʻu ma ka lokomaikaʻi a me ka ʻoiaʻiʻo; ʻeā, mai kanu ʻoe iaʻu ma ʻAigupita nei.

³⁰ “E moe au me oʻu mau mākua. E lawe ʻoe iaʻu mai ʻAigupita aku, a e kanu iaʻu ma ko lākou ilina.” ʻĪ maila kēlā, “E hana nō wau e like me kāu ʻōlelo.”

³¹ ʻĪ akula kēia, “E hoʻohiki mai ʻoe iaʻu,” a hoʻohiki ihola kēlā, a kūlou hoʻomana ihola ʻo ʻIseraʻela ma ke poʻo o kona wahi moe.