KA BUKE MUA A MOSE, I KAPA ʻIA KINOHI 46 - Ka Baibala Hemolele

1 Hōʻoluʻolu mai ke Akua iā Iakoba. 5 Kona iho ʻana i ʻAigupita. 8 Kāna mau keiki. 28 Ka hālāwai pū me Iosepa.

MOKUNA XLVI.

¹ ¶ Hele maila ʻo ʻIseraʻela me kāna mau mea a pau loa, a hiki maila i Beʻereseba, a mōhai akula ia i nā mōhai i ke Akua o kona makua kāne ʻo ʻIsaʻaka.

² ʻŌlelo maila ke Akua iā ʻIseraʻela ma ka hihiʻo i ka pō, ʻī maila, “E Iakoba, e Iakoba!” ʻĪ akula kēia, “Eia nō wau.”

³ ʻĪ maila kēlā, “ʻO wau nō ke Akua, ʻo ke Akua o kou makua kāne; mai makaʻu ʻoe ke iho i lalo i ʻAigupita; no ka mea, e hoʻolilo au iā ʻoe i lāhui kanaka nui ma laila.

⁴ “A e iho pū aku nō au me ʻoe i ʻAigupita; e ʻoiaʻiʻo nō hoʻi, e lawe hou mai au iā ʻoe ma laila mai, a e kau nō ʻo Iosepa i kona lima ma kou mau maka.”

⁵ Ala maila ʻo Iakoba mai Beʻereseba mai, a lawe aʻela nā keiki a ʻIseraʻela iā Iakoba, ko lākou makua kāne, a me nā kamaliʻi, a me kā lākou mau wāhine ma luna o nā kaʻa a Paraʻo i hoʻouna aku ai e lawe iā lākou.

⁶ Lawe aʻela lākou i kā lākou mau holoholona, a me ka waiwai a lākou i loaʻa ai ma ka ʻāina ma Kanaʻana, a hele mai i ʻAigupita; ʻo Iakoba, lākou pū me nā keiki āna a pau.

⁷ ʻO kāna mau keiki kāne, a me kā lākou mau keiki kāne me ia, ʻo kāna mau kaikamāhine, a me nā kaikamāhine a kāna mau keiki kāne, a me kāna mau hua a pau kāna i lawe pū mai ai me ia i ʻAigupita.

⁸ ¶ Eia nā inoa o nā keiki kāne a ʻIseraʻela i hele i ʻAigupita; ʻo Iakoba a me kāna mau keiki kāne: ʻo Reubena, kā Iakoba makahiapo.

⁹ A ʻo nā keiki kāne a Reubena: ʻo Hanoka, ʻo Palu, ʻo Hezerona, a ʻo Karemi.

¹⁰ ʻO nā keiki kāne a Simeona: ʻo Iemuʻela, ʻo Iamina, ʻo ʻOhada, ʻo Iakina, ʻo Zohara, a ʻo Saula, ke keiki a kekahi wahine no Kanaʻana.

¹¹ ʻO nā keiki kāne a Levi: ʻo Geresona, ʻo Kohata, a ʻo Merari.

¹² ʻO nā keiki kāne a Iuda: ʻo ʻEra, ʻo ʻOnana, ʻo Sela, ʻo Pereza, a ʻo Zara; akā, make ihola ʻo ʻEra lāua ʻo ʻOnana ma ka ʻāina ʻo Kanaʻana. A ʻo nā keiki kāne a Pereza; ʻo Hezerona a ʻo Hamula.

¹³ ʻO nā keiki kāne a ʻIsakara: ʻo Tola, ʻo Puva, ʻo Ioba a ʻo Simerona.

¹⁴ ʻO nā keiki kāne a Zebuluna: ʻo Sereda, ʻo ʻElona a ʻo Iahelela.

¹⁵ ʻO lākou nā keiki kāne a Lea, āna i hānau ai na Iakoba ma Padana ʻArama, a me kāna kaikamahine ʻo Dina; ʻo kāna poʻe keiki kāne a pau a me nā kaikamāhine, he kanakolukumamākolu o lākou.

¹⁶ ʻO nā keiki kāne a Gada: ʻo Zipiona, ʻo Hagi, ʻo Suni, ʻo ʻEzebona, ʻo ʻEri, ʻo ʻArodi, a ʻo ʻAreli.

¹⁷ ʻO nā keiki kāne a ʻAsera: ʻo Iimena, ʻo ʻIsua, ʻo ʻIsui, ʻo Beria, a ʻo Sera ko lākou kaikuahine; a ʻo nā keiki kāne a Beria: ʻo Hebera, a ʻo Malekiʻela.

¹⁸ ʻO lākou nā keiki kāne a Zilepa, a Labana i hāʻawi aku ai i kāna kaikamahine iā Lea; a ʻo lākou kāna i hānau ai na Iakoba: he poʻe ʻumikumamāono.

¹⁹ ʻO nā keiki kāne a Rāhela a ka wahine na Iakoba: ʻo Iosepa, a ʻo Beniamina.

²⁰ A ua hānau na Iosepa ma ka ʻāina ʻo ʻAigupita: ʻo Manase a ʻo ʻEperaima, a ʻAsenata a ke kaikamahine na Potipera ke kahuna no ʻOna, i hānau ai nāna.

²¹ A ʻo nā keiki kāne a Beniamina: ʻo Bela, ʻo Bekera, ʻo ʻAsebela, ʻo Gera, ʻo Naʻamana, ʻo ʻEhi, ʻo Rosa, ʻo Mupima, ʻo Hupima, a ʻo ʻAreda.

²² ʻO lākou nā keiki a Rāhela i hānau na Iakoba: a ʻo lākou a pau, he ʻumikumamāhā.

²³ ʻO nā keiki kāne a Dana: ʻo Husima.

²⁴ ʻO nā keiki a Napetali: ʻo Iahezela, ʻo Guni, ʻo Iezera, a ʻo Silema.

²⁵ ʻO lākou nā keiki kāne a Bileha, a Labana i hāʻawi aku ai na Rāhela na kāna kaikamahine; a hānau maila ʻo ia iā lāua na Iakoba: a ʻo lākou a pau, ʻehiku lākou.

²⁶ ʻO nā kānaka a pau i hele pū me Iakoba i ʻAigupita, ʻo ka poʻe mai loko mai o kona pūhaka; kanaono lākou, a me kumamāono, ʻaʻole hoʻi i helu ʻia nā wāhine a kāna mau keiki.

²⁷ A ʻo nā keiki a Iosepa, i hānau ʻia nāna ma ʻAigupita, ʻelua lāua. ʻO nā kānaka a pau ma ka hale o Iakoba i hele mai i ʻAigupita, kanahiku lākou.

²⁸ ¶ A hoʻouna akula ʻo ia iā Iuda, ma mua ona i o Iosepa lā, e kuhikuhi aku ma mua ona i Gosena; a hiki maila lākou i ka ʻāina ʻo Gosena.

²⁹ A hoʻomākaukau aʻela ʻo Iosepa i ke kaʻa ona, piʻi akula ia e hālāwai me ʻIseraʻela, me kona makua kāne i Gosena, a ʻike akula ʻo ia iā ia, kau ihola ia ma kona ʻāʻī, a uē ihola ma kona ʻāʻī, a liʻuliʻu wale.

³⁰ ʻŌlelo akula ʻo ʻIseraʻela iā Iosepa, “ʻĀnō, e pono iaʻu ka make, no kuʻu ʻike ʻana i kou maka; no ka mea, e ola ana ʻoe.”

³¹ ʻŌlelo akula ʻo Iosepa i kona poʻe hoahānau a me ka poʻe o kona makua kāne, “Ē, e piʻi aku au, e hoʻākāka aku iā Paraʻo, a e haʻi aku au iā ia; ‘ʻO koʻu poʻe hoahānau, a me ka poʻe o koʻu makua kāne i noho ai i ka ʻāina ʻo Kanaʻana, ua hele mai i oʻu nei.

³² ‘He poʻe kānaka mālama hipa lākou, he poʻe kānaka hānai holoholona, a ua hele mai lākou me kā lākou hipa, a me kā lākou holoholona, a me kā lākou mea a pau.’

³³ “A hiki i ka wā e hea mai ai ʻo Paraʻo iā ʻoukou, a e nīnau mai, ‘He aha kā ʻoukou ʻoihana?’

³⁴ “A laila, e ʻōlelo aku, ‘He poʻe kānaka hānai holoholona kāu mau kauā nei, mai ka wā kamaliʻi mai, ʻo mākou, a me ko mākou poʻe mākua’; i noho ai ʻoukou ma ka ʻāina, ma Gosena; no ka mea, he haumia i ko ʻAigupita, nā kahu hipa a pau.”