KA BUKE MUA A MOSE, I KAPA ʻIA KINOHI 45 - Ka Baibala Hemolele

1 Ka hōʻike ʻana o Iosepa iā ia iho i kona poʻe hoahānau. 9 Ke kiʻi ʻana i kona makua kāne. 25 Ka haʻi ʻana iā Iakoba.

MOKUNA XLV.

¹ ¶ A laila ʻaʻole e hiki iā Iosepa ke ʻuʻumi iho i ke aloha i loko ona i mua o lākou a pau, ʻo ka poʻe i kū pū maila me ia; a hea akula ia, “E hele aku nā kānaka a pau i waho, mai oʻu aku nei!” ʻAʻole i noho mai kekahi kanaka me ia, i ka manawa a Iosepa i hōʻike ai iā ia iho i kona poʻe hoahānau.

² Hoʻōho aʻela ia i kona leo me ka uē nui ʻana; a lohe aʻela nā kānaka o ʻAigupita a lohe pū nō ko ka hale o Paraʻo.

³ ʻŌlelo akula ʻo Iosepa i kona poʻe hoahānau, “ʻO wau nō ʻo Iosepa; ke ola lā nō anei koʻu makua kāne?” ʻAʻole i hiki ke ʻekemu iki mai kona poʻe hoahānau iā ia; no ka mea, makaʻu nui iho lākou i mua ona.

⁴ A ʻōlelo akula ʻo Iosepa i kona poʻe hoahānau, “E neʻeneʻe mai ʻoukou i oʻu nei.” A neʻeneʻe maila lākou. ʻŌlelo akula ia, “ʻO wau nō ʻo Iosepa, ko ʻoukou kaikaina a ʻoukou i kūʻai ai i loko o ʻAigupita.

⁵ “Eia hoʻi, mai hoʻokaumaha ʻoukou, ʻaʻole hoʻi e huhū ʻoukou iā ʻoukou iho i kā ʻoukou kūʻai ʻana iaʻu i ʻaneʻi. No ka mea, na ke Akua au i hoʻouna mai ma mua o ʻoukou e hoʻōla aku.

⁶ “No ka mea, ua wī aʻe nei ka ʻāina i kēia mau makahiki ʻelua; a ʻelima hoʻi makahiki e koe, ʻaʻole e mahi, ʻaʻole hoʻi e ʻohi mai.

⁷ “A ua hoʻouna mai ke Akua iaʻu ma mua o ʻoukou, e hoʻokoe aku iā ʻoukou ma ka honua, a e hoʻōla iā ʻoukou i ke ola nui.

⁸ “Aia hoʻi, ʻaʻole na ʻoukou i hoʻouna mai au i ʻaneʻi, na ke Akua nō, a ua hoʻolilo aʻe ia iaʻu i makua kāne no Paraʻo, a i haku no kona hale a pau, a i kiaʻāina no ʻAigupita a pau.

⁹ “E wikiwiki ʻoukou, e hoʻi aku i koʻu makua kāne, a e ʻī aku iā ia, ‘Penei i ʻōlelo mai ai kāu keiki ʻo Iosepa, “Ua hoʻolilo mai ke Akua iaʻu, i haku no ka ʻāina ʻo ʻAigupita a pau; e hele mai ʻoe i lalo i oʻu nei, mai hoʻokaʻulua aku ʻoe.

¹⁰ “A e noho ʻoe ma ka ʻāina ʻo Gosena, a e kokoke mai ʻoe me aʻu, ʻo ʻoe, a me kāu poʻe keiki, a me kāu poʻe moʻopuna, a ʻo kāu poʻe hipa a me kāu poʻe holoholona a me kou mea a pau loa.

¹¹ “I laila au e mālama ai iā ʻoe; no ka mea, ʻelima makahiki wī e koe; o ʻilihune ʻoe, a me ko ka hale ou, a me kāu mau mea a pau.”’

¹² “Aia hoʻi, ua ʻike ko ʻoukou mau maka, a me ka maka o koʻu kaikaina, ʻo Beniamina, ʻo koʻu waha nō kai ʻōlelo aku iā ʻoukou.

¹³ “A e haʻi aku ʻoukou i koʻu makua kāne i kuʻu hanohano a pau ma ʻAigupita nei, a i nā mea a pau a ʻoukou i ʻike ai; a e wikiwiki ʻoukou e lawe mai i koʻu makua kāne i lalo nei.”

¹⁴ Kau ihola ia ma ka ʻāʻī o kona kaikaina, ʻo Beniamina, a uē ihola; a uē ihola hoʻi ʻo Beniamina ma kona ʻāʻī.

¹⁵ Honi akula ʻo Iosepa i kona poʻe hoahānau a pau, a uē ihola i luna o lākou. A ma hope iho o ia mea, kamaʻilio pū kona poʻe hoahānau me ia.

¹⁶ ¶ Lohea ihola kēia mea ma ka hale o Paraʻo, ʻōlelo ʻia ihola, “Ua hiki mai nā hoahānau o Iosepa.” Ua pono hoʻi ia i nā maka o Paraʻo, a i nā maka o kāna poʻe kauā.

¹⁷ ʻŌlelo maila ʻo Paraʻo iā Iosepa, “E ʻī aku ʻoe i kou poʻe hoahānau, ‘E hana pēnēia, e kau i ko ʻoukou mea ma nā hoki a hoʻi aku a hiki i ka ʻāina ʻo Kanaʻana.

¹⁸ ‘E kiʻi i ko ʻoukou makua kāne, a me nā mea o ko ʻoukou hale, a e hele mai i oʻu nei, a naʻu nō e hāʻawi aku na ʻoukou i ka maikaʻi o ka ʻāina ʻo ʻAigupita, a e ʻai hoʻi ʻoukou i ka momona o ka ʻāina.’

¹⁹ “Ua kauoha ʻia ʻoe, e hana hoʻi i kēia, ‘E lawe i mau kaʻa no ʻoukou, mai ka ʻāina ʻo ʻAigupita aku, no kā ʻoukou kamaliʻi a no kā ʻoukou wāhine, a e kiʻi i ko ʻoukou makua kāne, a e hele mai.

²⁰ ‘Mai ʻauʻa ko ʻoukou mau maka ma ko ʻoukou mea a pau; no ka mea, no ʻoukou ka maikaʻi o ka ʻāina a pau ma ʻAigupita.’”

²¹ ¶ A hana ihola nā keiki a ʻIseraʻela pēlā; a hāʻawi akula ʻo Iosepa iā lākou i mau kaʻa e like me ka ʻōlelo a Paraʻo, a hāʻawi nō hoʻi i ō na lākou ma ke ala.

²² Hāʻawi akula hoʻi ia i kapa komo no lākou a pau; a iā Beniamina, hāʻawi akula ʻo ia iā ia, i ʻekolu haneri moni, a me nā kapa komo ʻelima.

²³ A hoʻouna akula ia no kona makua kāne, he ʻumi nā hoki e lawe ana i nā mea maikaʻi o ʻAigupita, a he ʻumi nā hoki wahine, e lawe ana i ka palaoa a me ka ʻai i ō na kona makua kāne ma ke alanui.

²⁴ Pēlā hoʻi i hoʻouna aku ai ʻo ia i kona poʻe hoahānau, a hoʻi akula lākou. ʻŌlelo aku ia iā lākou, “Mai paio ʻoukou ma ke alanui.”

²⁵ A hoʻi akula lākou, mai waho mai o ʻAigupita, a hiki akula i ka ʻāina ʻo Kanaʻana, iā Iakoba, i ko lākou makua kāne.

²⁶ A haʻi akula lākou iā ia, ʻī akula, “Ē, ke ola lā nō ʻo Iosepa, ʻo ia ke kiaʻāina o ka ʻāina ʻo ʻAigupita a pau.” A maʻule ihola ko Iakoba naʻau; no ka mea, ʻaʻole kēlā i manaʻoʻiʻo i kā lākou.

²⁷ A laila, haʻi akula lākou iā ia i ka ʻōlelo a pau a Iosepa i ʻōlelo mai ai iā lākou. A ʻike akula ia i nā kaʻa a Iosepa i hoʻouna mai ai e lawe iā ia, pohala ihola ka naʻau o ko lākou makua kāne.

²⁸ A ʻōlelo akula ʻIseraʻela, “Ua nui ia, ua ola ʻo Iosepa kuʻu keiki; e hele aku au e ʻike iā ia ma mua o kuʻu make ʻana.”